និទណ្ឌភាពនៅកម្ពុជាត្រូវបានគេរំលឹកឡើងវិញ
ថ្ងៃទី២វិច្ឆិកានេះគឺជាទិវាអន្តរជាតិដើម្បីបញ្ចប់និទណ្ឌភាពចំពោះបទល្មើសប្រឆាំងនឹងអ្នកសារព័ត៌មាន។ ទិវានេះត្រូវបានកំណត់ដោយអង្គការសហប្រជាជាតិ កាលពីចុងឆ្នាំ២០១៣ ដែលជំរុញឲ្យរដ្ឋជាសមាជិកអនុវត្តន៍វិធានការជាក់លាក់មួយចំនួនដើម្បីប្រឆាំងនឹងវប្បធម៌និទណ្ឌភាពដែលកំពុងកើតមានជុំវិញពិភពលោក។ សម្រាប់កម្ពុជា អង្គការសិទ្ធិមនុស្សមួយ ឲ្យដឹងថា ខ្លួននឹងរៀបចំតាំងពិព័ណ៌ករណីនិទណ្ឌភាពនេះ ដើម្បីលើកពីបញ្ហានិទណ្ឌភាពនៅកម្ពុជា។
ចុះផ្សាយនៅថ្ងៃ៖
ស្តាប់ - ០១:២៨
ដោយ អ៊ឹង ប៊ុនថន
“មិនអាចបំភ្លេច”គឺជាសារដែលមជ្ឈមណ្ឌលសិទ្ធិមនុស្សកម្ពុជា ដាក់ឈ្មោះ សម្រាប់ពិព័ណ៌និទណ្ឌភាពនៅកម្ពុជាដែលចាប់ផ្តើមជាផ្លូវការនៅថ្ងៃ២៣វិច្ឆិកាខាងមុខ។
បើតាមសេចក្តីប្រកាសព័ត៌មាន ពិព័ណ៌នេះ មជ្ឈមណ្ឌលសិទ្ធិមនុស្សកម្ពុជាធ្វើឡើងតាមប្រព័ន្ធអ៊ិនធឺណែត និងជាសាធារណៈ ដាក់បង្ហាញករណីជ្រើសរើសមួយចំនួន ដែលបង្ហាញពីកង្វះ គណនេយ្យភាព និងការស៊ើបអង្កេត ក្នុងការរំលោភសិទ្ធិមនុស្សធ្ងន់ធ្ងរ។
អង្គការសិទ្ធិមនុស្សមួយនេះ គូសបញ្ជាក់ថា តួអង្គសំខាន់ៗដែលត្រូវបានផ្តោតការយកចិត្តទុកពីបញ្ហានិទណ្ឌភាពនេះ គឺអ្នកសារព័ត៌មាន សកម្មជន និងបុគ្គលិកមួយចំនួនដែលត្រូវគេសម្លាប់ ឬទទួលរងគ្រោះថ្នាក់ ដោយពុំទទួលបានយុត្តិធម៌នៅឡើយ។
មជ្ឈមណ្ឌលសិទ្ធិមនុស្សកម្ពុជា បានចាត់ទុកកង្វះខាត គណនេយ្យភាព ចំពោះការស្លាប់អ្នកសារព័ត៌មាន សកម្មជន ឬអ្នករិះគន់ផ្សេងៗ ថាបង្កើននូវការភ័យខ្លាច ការបំបិទសំឡេងខ្លួនឯង ការបដិសេធសិទ្ធិរបស់សាធារណៈជនក្នុងការទទួលបានព័ត៌មាន និងធ្វើឲ្យបាត់បង់ទំនុកចិត្តលើនីតិរដ្ឋ។
ករណីនិទណ្ឌភាពនេះ ត្រូវបានមជ្ឈមណ្ឌលសិទ្ធិមនុស្សកម្ពុជា ពន្យល់ថា គឺជាការគ្មានព័ត៌មានជាសាធារណៈស្តីពីការស៊ើបអង្កេត ក្នុងករណីដែលជនសង្ស័យចម្បងៗមិនត្រូវបានសាកសួរ ឬចាប់ខ្លួន ខណៈជនដែលត្រូវផ្តន្ទាទោសបែរជាត្រូវបានដោះលែងវិញ។
យ៉ាងណាក៏ដោយអង្គការនេះ មិនបានបង្ហាញឈ្មោះចំៗករណីនិទណ្ឌភាពនៅក្នុងសេចក្តីប្រកាសព័ត៌មានទេ ប៉ុន្តែថាមានជនរងគ្រោះ២២នាក់ត្រូវបានជ្រើសរើសដើម្បីបង្ហាញពីទិដ្ឋភាពដែលរីករាលដាល និងជាប្រព័ន្ធនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ