ពលរដ្ឋជាប់ជម្លោះដីធ្លីនៅខេត្តក្រចេះជាង ១០០គ្រួសារឡើងមកសុំអន្តរាគមន៍ផ្ទាល់ពីនាយករដ្ឋមន្ត្រី
ពលរដ្ឋជាង ១០០គ្រួសារ ដែលមានជម្លោះដីធ្លីជាមួយក្រុមហ៊ុនចម្ការកៅស៊ូមេមត់ Co.Ltd នៅខេត្តក្រចេះ អះអាងថា ពួកគេសុខចិត្តខ្ចីប្រាក់គេ ដើម្បីបានប្រមូលគ្នាឡើងមកកាន់រាជធានីភ្នំពេញ តាំងពីថ្ងៃអាទិត្យ ក្នុងគោលដៅបង្ហាញពីទុក្ខវេទនារបស់ពួកគេឲ្យលោកនាយរដ្ឋមន្ត្រីហ៊ុន សែន ស្វែងរកដំណោះស្រាយសមរម្យណាមួយ។ ពលរដ្ឋដែលធ្លាប់រងអំពើហិង្សាក្នុងជម្លោះដីធ្លី កាលពីដើមខែមីនានេះ ចង់ឲ្យប្រមុខរដ្ឋាភិបាល និងក្រសួងដែនដី ផ្តល់ដីធ្លី ដើម្បីអាចឲ្យពួកគេធ្វើចម្ការចិញ្ចឹមជីវិតដូចពីដើមវិញ។
ចុះផ្សាយនៅថ្ងៃ៖
ស្តាប់ - ០២:២៥
ពលរដ្ឋម្នាក់ ក្នុងចំណោមពលរដ្ឋជាង ១០០គ្រួសារ មកពីឃុំ ២ធ្នូ ស្រុកស្នួល ខេត្តក្រចេះ ដែលស្នើសុំមិនបញ្ចេញឈ្មោះព្រោះខ្លាចបញ្ហាសុវត្ថិភាពផ្ទាល់ បានប្រាប់វិទ្យុបារាំងអន្តរជាតិ នៅព្រឹកថ្ងៃចន្ទនេះថា ពួកគេ មិនសូវជាមានសង្ឃឹមចំពោះការមកស្វែងរកអន្តរាគមន៍នេះទេ ប៉ុន្តែគាត់ត្រូវតែព្យាយាមដើម្បីបង្ហាញថាពួកគាត់កំពុងជួបគ្រោះធ្ងន់ ត្បិតពេលនេះពួកគាត់បានបាត់បង់ដីហើយ។ ពលរដ្ឋដែលមានដីដាំស្វាយចន្ទី ចំនួន ៣ហិកតារូបនេះ បានប្រាប់ថា ពេលនេះលំនៅស្ថានដែលគាត់បានផ្លាស់ទីមកពីខេត្តត្បូងឃ្មុំរស់នៅជាអចិន្ត្រៃយ៍ ក្នុងឆ្នាំ ២០១៧នោះ ត្រូវបានក្រុមហ៊ុន ធ្វើការឈូសឆាយ ហើយកាប់បំផ្លាញចម្ការរបស់គាត់ខ្ទេចខ្ទីអស់ហើយ។
ពលរដ្ឋ បានរៀបរាប់ថា ដំបូងឡើយពួកគាត់គ្រាន់តែធ្វើចំណាកស្រុកពីខេត្តដទៃ មកស៊ីឈ្មួលដាំដំឡូង ឬ ស៊ីឈ្មួលជាកម្មករក្នុងខេត្តក្រចេះប៉ុណ្ណោះ ប៉ុន្តែក្រោយពីមានការប្រកាសពីលោកនាយករដ្ឋមន្ត្រីហ៊ុន សែន ឲ្យពលរដ្ឋអាចទទួលបានដីសម្បទានសង្គមកិច្ច ពួកគាត់ក៏មកតាំងទីលំនៅជាអចិន្ត្រៃយ៍ ដោយសង្ឃឹមថានឹងបានដីទាំងនោះជាកម្មសិទ្ធិផ្ទាល់ខ្លួន ដើម្បីចាប់ធ្វើចម្ការ។ យ៉ាងណាមិញ ពួកគេអះអាងថាខាងក្រុមហ៊ុនដែលទទួលបានដីសម្បទានពីរដ្ឋាភិបាល បានរុកគួនពួកគាត់ក្នុងពេលថ្មីៗនេះ តាមរយៈការឈូសឆាយ និងដុតបំផ្លាញផ្ទះសម្បែងរបស់ពួកគាត់ ដោយមិនមានជូនដំណឹង ហើយសូម្បីតែអាជ្ញាធរភូមិ ឃុំ ហាក់មិនអើពើនឹងពួកគាត់ទៀត។
តាមពលរដ្ឋដដែល អាជ្ញាធរបានដោះស្រាយផ្តល់ដីដល់ពលរដ្ឋចំនួន ២៣២គ្រួសារហើយ ដែលបានចុះបញ្ជី ប៉ុន្តែអាជ្ញាធរ នៅមិនទាន់ដោះស្រាយដល់ពួកគាត់ដែលនៅឡើយទេ។ ហើយមូលហេតុនោះ ត្រូវបានពលរដ្ឋរងគ្រោះ បញ្ជាក់ថាដោយសារតែគេមិនទាន់យល់ពីចំណាត់ការចុះបញ្ជី ហើយអាជ្ញាធរក៏មិនបានមកពន្យល់ឲ្យបានលម្អិត។
លោក សេង ឡូត អ្នកនាំពាក្យក្រសួងដែនដី បានបញ្ជាក់ប្រាប់វិទ្យុបារាំងថា រដ្ឋបាលរបស់ក្រសួង បានទៅទទួលយកសំណើពីពលរដ្ឋហើយនៅព្រឹកថ្ងៃចន្ទនេះ ហើយសន្យាថានឹងឲ្យអង្គភាពជំនាញពិនិត្យ និងធ្វើការជាមួយអាជ្ញាធរមូលដ្ឋាន ដើម្បីដោះស្រាយបញ្ហាជូនពលរដ្ឋ។ លោកសេង ឡូត ក៏សំណូមពរឲ្យពលរដ្ឋ ត្រលប់ទៅផ្ទះសម្បែងនៅខេត្តវិញផងដែរ ព្រោះថាការសិក្សាដើម្បីរកដំណោះស្រាយនោះ ត្រូវប្រើពេលវេលាយូរបន្តិចដែរ។
បើតាមពលរដ្ឋ ពួកគេទាំងជាង ១០០គ្រួសារ ដែលបច្ចុប្បន្នកំពុងស្នាក់នៅវត្តសាមគ្គីរង្សី បានបញ្ជាក់ថា នឹងនៅវត្តនេះរហូតទាល់តែមានដំណោះស្រាយទើបត្រលប់ទៅវិញ។
មន្ត្រីសមាគមអាដហុក លោក សឹង សែនករុណា ដែលបានឃ្លាំមើលបញ្ហានេះរហូតមក បានលើកឡើងថា ពលរដ្ឋទាំងនោះ ពិតជាជួបនឹងការឈូសឆាយដុតបំផ្លាញផ្ទះសម្បែង និងដំណាំចម្ការមែន។ ហើយអាជ្ញាធរ ហាក់នៅមិនទាន់ផ្តល់ព័ត៌មានផ្នែកច្បាប់ឲ្យពួកគាត់បានគ្រប់ជ្រុងជ្រោយ ដែលជាហេតុធ្វើឲ្យពិបាកឈានដល់ការទទួលបានដំណោះស្រាយជាក់លាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ