លោក ទៀ បាញ់ ថាករណីនៅខេត្តក្រចេះជាការវាយប្រហារលើបក្សប្រជាជន
ក្រោយពីមានករណីផ្ទុះអំពើហិង្សានៃការប៉ះទង្គិចគ្នារវាងពលរដ្ឋ និងសមត្ថកិច្ច នៅឃុំ ២ធ្នូ ក្នុងស្រុកស្នូល ខេត្តក្រចេះ កាលពីថ្ងៃព្រហស្បតិ៍សប្តាហ៍មុនមក ក្រៅពីទាត់ចោលនូវរាល់ព័ត៌មានដែលថាមានមនុស្សស្លាប់ និងរបួសក្នុងហេតុការណ៍នេះ អាជ្ញាធរ និងមន្ត្រីជាន់ខ្ពស់រដ្ឋាភិបាល បានទម្លាក់កំហុសទាំងស្រុង លើពលរដ្ឋអ្នកតវ៉ា។ ជាមួយគ្នានេះដែរ រដ្ឋមន្ត្រីក្រសួងការពារ លោកទៀ បាញ់ បានថ្លែងនៅថ្ងៃម្សិលមិញដែរថា នេះ "ជារឿងតូច" ដែលគេយកមកធ្វើជារឿងធំ ហើយវាយប្រហារមកលើគណបក្សប្រជាជនកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
រដ្ឋមន្ត្រីក្រសួងការពារជាតិ លោកទៀ បាញ់ បានលើកឡើងកាលពីថ្ងៃអាទិត្យម្សិលមិញ ពីខេត្តកំពង់ឆ្នាំងថា ដោយសារនេះ គឺជារដូវកាលដែលគេត្រូវស្វែងរកគាំទ្រ ដូច្នេះទើបមានការបំភ្លៃព័ត៌មានពីចំនួនមនុស្សស្លាប់ និងរបួស ក្នុងហេតុការណ៍នៅខេត្តក្រចេះ កាលពីសប្តាហ៍មុន មកធ្វើជារឿង ដើម្បីវាយប្រហារលើគណបក្សប្រជាជនកម្ពុជា។ តាមលោក ទៀ បាញ់ នេះគឺ"ជារឿងតូចតាច" សោះ។
ការលើកឡើងរបស់លោក ទៀ បាញ់នេះ ទំនងជាចង់ឌឺដង ទៅកាន់អតីតគណបក្សសង្គ្រោះជាតិ។ អតីតគណបក្សសង្រ្គោះជាតិ ដែលបានចេញសេចក្តីថ្លែងការណ៍ភ្លាមៗ ក្រោយពេលហេតុការណ៍នោះ ដោយបានថ្កោលទោស ចំពោះកងកម្លាំងប្រដាប់អាវុធថា បានបង្រ្កាបយ៉ាងឃោរឃៅទៅលើប្រជាពលរដ្ឋនៅភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះនោះ។ អតីតគណបក្សប្រឆាំង ថែមទាំងបានទាមទារឲ្យរដ្ឋាភិបាលបើកការស៊ើបអង្កេតជាបន្ទាន់ ដើម្បីស្វែងរកជនដៃដល់ និងអ្នកបញ្ជា មកផ្តន្ទាទោសតាមច្បាប់។
ប៉ុន្តែបើតាមអាជ្ញាធរក្នុងតំបន់ ដូចជាអភិបាលស្រុកស្នួលជាដើម បានអះអាងថា ហេតុការណ៍នេះ "បង្កឡើងដោយពលរដ្ឋខ្លួនឯងផ្ទាល់" ហើយបដិសេធថា គ្មានការបង្ក្រាបទ្រង់ទ្រាយធំណាមួយ ដូចការលើកឡើងរបស់មជ្ឈដ្ឋានមួយចំនួននោះទេ។ លោក គង់ គីមនី អភិបាលស្រុកស្នួល បានបញ្ជាក់ប្រាប់វិទ្យុបារាំងថា "គ្មាននរណាម្នាក់បានស្លាប់" ក្នុងហេតុការណ៍នោះទេ គឺមានតែពលរដ្ឋ ២នាក់ប៉ុណ្ណោះ ដែលបានរងរបួសស្រាល ហើយក្រុមសមត្ថកិច្ច ៧នាក់ ក៏រងរបួសផងដែរ។
គិតមកដល់ព្រឹកនេះ សាលាដំបូងខេត្តក្រចេះ កំពុងតែអនុវត្តនីតិវិធី បន្ទាប់ពីបានចាប់ឃុំខ្លួន និងសាកសួរចម្លើយពលរដ្ឋ ៨នាក់។ លោកកែវ សុជាតិ ព្រះរាជអាជ្ញាខេត្តក្រចេះ បានប្រាប់វិទ្យុបារាំងថា ពលរដ្ឋ ៨នាក់ ដែលក្នុងនោះមានស្រី្តតែម្នាក់ ត្រូវបានដាក់ឲ្យស្ថិតនៅក្រោមការឃ្លាំមើលពីតុលាការ ខណៈមាន ម្នាក់ កំពុងស្ថិតនៅមន្ទីរពេទ្យដោយសារ "រងរបួសស្រាល"។
ចំណែក លោកគង់ គីមនី អះអាងទៀតថា ពេលនេះអាជ្ញាធរ ក៏កំពុងតែចាត់វិធានការដោះស្រាយបញ្ហាជូនពលរដ្ឋផ្សេងទៀត ដើម្បីទទួលបានដីសម្បទានស្របច្បាប់ ខណៈដែលពលរដ្ឋមួយចំនួនសម្រេចចិត្តចាកចេញពីខ្ទម ដែលពួកគេបានចំណាកស្រុកមករស់នៅ ហើយត្រលប់ទៅខេត្តរបស់ពួកគេរៀងៗខ្លួនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ