សង្គមស៊ីវិល បន្តទាមទារឲ្យទម្លាក់ចោលច្បាប់NGOs ខណៈសភាគ្រោងអនុម័តនៅដើមសប្តាហ៍ក្រោយ
នៅព្រឹកថ្ងៃព្រហស្បតិ៍នេះ ក្រុមសង្គមស៊ីវិលបានធ្វើវេទិកាសាធារណៈមួយស្តី ពីកិច្ចសន្ទនាសង្គមរវាងអ្នកនយោបាយ និងសង្គមស៊ីវិលលើសេចក្តីព្រាងច្បាប់សមាគម និងអង្គការក្រៅរដ្ឋាភិបាលនៅលើទីលានប្រជាធិបតេយ្យ។ សង្គមស៊ីវិល នៅតែបន្តទាមទារឲ្យរដ្ឋសភាទម្លាក់ចោលនូវសេចក្តីព្រាងច្បាប់ដ៏ចម្រូងចម្រាសនេះ ប៉ុន្តែរដ្ឋសភាមិនបានខ្វាយខ្វល់នឹងការទាមទារឡើយហើយថែមទាំងគ្រោងអនុម័តនៅដើមសប្តាហ៍ក្រោយនេះទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នេះមិនមែនជាលើកទីមួយទេដែលក្រុមសង្គមស៊ីវិល បានទាមទារឲ្យរដ្ឋសភាជាតិទម្លាក់ចោលនូវសេចក្តីព្រាងច្បាប់ស្តីសមាគម និងអង្គការមិនមែនរដ្ឋាភិបាល។ តាមគម្រោង ការជួបជុំគ្នានៅថ្ងៃនេះ នឹងមានតំណាងអង្គការសង្គមស៊ីវិល និងប្រជាពលរដ្ឋដែលប្រឆាំងនឹងសេចក្តីព្រាងច្បាប់ដ៏ចម្រូងសម្រាសមួយនេះ ចំនួន៥ពាន់នាក់ចូលរួម។ ក៏ប៉ុន្តែអ្នកចូលរួមជាក់ស្តែង មានចំនួនប្រមាណជាងមួយរយនាក់ប៉ុណ្ណោះភាគច្រើនជាអ្នករត់ម៉ូតូឌុបដែលជាសមាជិករបស់សមាគមឯករាជ្យប្រជាធិបតេយ្យនៃសេដ្ឋកិច្ចក្រៅប្រព័ន្ធ។ ក្នុងនោះតំណាងអង្គការសង្គមស៊ីវិល និងសហជីព ប្រមាណ៦ អង្គភាព បានចូលរួមពិភាក្សា និង ជជែកពីសេចក្តីព្រាងច្បាប់នេះ។
សង្គមស៊ីវិលសម្តែងការព្រួយបារម្ភថា សេចក្តីព្រាងច្បាប់នេះ នឹងរឹតត្បិតសេរីភាពធ្វើសកម្មភាពរបស់ខ្លួន ហើយខ្លឹមសារច្បាប់ទៀតសោត បានរំលោភរដ្ឋធម្មនុញ និងច្បាប់អន្តរជាតិ។ ម្យ៉ាងទៀត ច្បាប់នេះ នឹងប៉ះពាល់ដល់ដំណើរអភិវឌ្ឍសិទ្ធិមនុស្ស សេដ្ឋកិច្ច និងប្រជាធិបតេយ្យនៅកម្ពុជាផងដែរ។ លោកវន់ ពៅ ប្រធានសមាគមឯករាជ្យប្រជាធិបតេយ្យនៃសេដ្ឋកិច្ចក្រៅប្រព័ន្ធ ដែលជាអ្នករៀបចំវេទិកាសាធារណៈនេះ បានបញ្ជាក់ថា ក្រុមអង្គការសង្គមស៊ីវិលនឹងនៅតែបន្តទាមទារឲ្យរដ្ឋសភាទម្លាក់ចោលសេចក្តីព្រាងច្បាប់នេះ រហូតដល់នាទីចុងក្រោយ។
គួរបញ្ជាក់ថា វេទិកាសាធារណៈរបស់ក្រុមអង្គការសង្គមស៊ីវិលនេះ បានធ្វើឡើងតែមួយថ្ងៃប៉ុណ្ណោះ បន្ទាប់ពីរដ្ឋសភាជាតិ បានបើកឲ្យមានពិគ្រោះយោបល់ជាសាធារណៈកាលពីថ្ងៃពុធ។ ផ្ទុយពីការពីព្រួយបារម្ភរបស់ក្រុមសង្គមស៊ីវិល លោកហេង សំរិន ប្រធានរដ្ឋសភាជាតិ បានគូសបញ្ជាក់ថា ច្បាប់ស្តីពីសមាគម និងអង្គការមិនមែនរដ្ឋាភិបាល គឺធ្វើឡើងស្របទៅតាមច្បាប់រដ្ឋធម្មនុញ្ញ និងលើកស្ទួយប្រជាធិបតេយ្យនៅកម្ពុជាថែមទៀត ។
សេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល មាន៩ជំពូក និង៣៩ មាត្រា។ បើតាមអ្នកនាំពាក្យរដ្ឋសភាជាតិកម្ពុជា សេចក្តីព្រាងច្បាប់នេះអាចនឹងត្រូវសភាប្រជុំ និងអនុម័តនៅដើមសប្តាហ៍ក្រោយ។ គណបក្សសង្គ្រោះជាតិដែលមិនគាំទ្រសេចក្តីព្រាងនេះបានអះអាងថា សមាជិកសភាទាំង៥៥រូបរបស់ខ្លួន នឹងមិនបោះឆ្នោតលើកដៃអនុម័តសេចក្តីព្រាងច្បាប់ថ្មីនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ