កម្ពុជាត្រៀមប្រើប្រព័ន្ធគ្រប់គ្រងចរាចរណ៍ផ្លូវអាកាសថ្មី ពេលដែលការឆ្លងកាត់នឹងកើនខ្លាំង
ស្របពេលដែលចរាចរណ៍ឆ្លងកាត់តាមអាកាសយានដ្ឋានរបស់កម្ពុជាមាននិន្នាការកើនឡើងខ្លាំង រដ្ឋលេខាធិការដ្ឋានអាកាសចរណ៍ស៊ីវិលខ្មែរកំពុងអភិវឌ្ឍប្រព័ន្ធនាំផ្លូវអាកាសថ្មី។ ដោយមានជំនួយឥតសំណងពីរដ្ឋាភិបាលជប៉ុន កម្ពុជាបានទទួលកម្មវិធីកុំព្យូទ័រសម្រាប់គូសផ្លូវហោះហើរ (PANADES Software) កាលពីម្សិលមិញ តាមរយៈគម្រោងពង្រឹងសមត្ថភាពដើម្បីឈានទៅប្រើប្រាស់ប្រព័ន្ធនាំផ្លូវហោះហើរ និងគ្រប់គ្រង់ចរាចរណ៍ផ្លូវអាកាសថ្មី។
ចុះផ្សាយនៅថ្ងៃ៖
ស្តាប់ - ០១:៥២
តាមការព្យាករណ៍ ការហោះហើរតាមអាកាសយានដ្ឋានអន្តរជាតិភ្នំពេញ និងអាកាសយានដ្ឋានអន្តរជាតិសៀមរាប នឹងកើនឡើងលើសពី៦៤០០០ជើងក្នុងឆ្នាំ២០១៨ ហើយនៅឆ្នាំ២០២០ អ្នកដំណើរដែលឆ្លងកាត់អាកាសយានដ្ឋានអន្តរជាតិភ្នំពេញ នឹងកើនដល់ប្រមាណជា៤,២លាននាក់។ ដល់ពេលនោះ អាកាសយានដ្ឋានអន្តរជាតិសៀមរាបនឹងឃើញកំណើនភ្ញៀវរហូតដល់ជិត៥លាននាក់។
ការណ៍នេះជម្រុញឱ្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជារៀបចំអភិវឌ្ឍប្រព័ន្ធនាំផ្លូវអាកាសថ្មី។ ដោយបានចាប់ផ្តើមតាំងពីឆ្នាំ២០១០មក ដោយសារមានជំនួយពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) កម្ពុជាបានអនុវត្តគម្រោងសិក្សាផែនការមេសម្រាប់អភិវឌ្ឍប្រព័ន្ធនាំផ្លូវថ្មីនោះរួចហើយ។ បច្ចុប្បន្ន កម្ពុជាកំពុងបន្តធ្វើតាមគម្រោងពង្រឹងសមត្ថភាពដើម្បីឈានទៅអនុវត្តការប្រើប្រាស់ប្រព័ន្ធនាំផ្លូវហោះហើរ និងគ្រប់គ្រងចរាចរណ៍ផ្លូវអាកាសថ្មីតាមផ្កាយរណប។ ជាក់ស្តែង កាលពីម្សិលមិញ រដ្ឋលេខាធិការដ្ឋានអាកាសចរណ៍ស៊ីវិលខ្មែរ បានទទួលកម្មវិធីគូសផ្លូវហោះហើរ (PANADES Software) ដែលមានតម្លៃ១,៥លានដុល្លារ ក្រោមកិច្ចសហប្រតិបត្តិការជំនួយឥតសំណងរបស់រដ្ឋាភិបាលជប៉ុន។
ក្នុងពិធីផ្លូវការនៅឯទីស្តីការគណៈរដ្ឋមន្ត្រីកម្ពុជាម្សិលមិញនោះ លោកឧបនាយករដ្ឋមន្ត្រី សុខ អាន បានឱ្យដឹងថា កម្មវិធីគូសផ្លូវហោះហើរនេះគឺជា«បច្ចេកវិជ្ជាទំនើប (...) ដែលធានាបាននូវសុវត្ថិភាពខ្ពស់ ចំពោះអ្នកដំណើរតាមផ្លូវអាកាស ចំណេញពេលវេលា កាត់បន្ថយការចំណាយប្រេងសាំង និងរួមចំណែកនូវការការពារបរិស្ថាន កាត់បន្ថយការភាយចេញនូវឧស្ម័នកាបូនិច ពីម៉ាស៊ីនអាកាសយាន្ត»។ ទន្ទឹមនឹងនេះដែរ លោក សុខ អាន បានគូសបញ្ជាក់ទៀតថា កម្មវិធីនេះក៏ពង្រឹងសមត្ថភាពមន្ត្រីនៅរដ្ឋលេខាធិការដ្ឋានអាកាសចរណ៍ស៊ីវិលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ