រយៈពេលចុងក្រោយនេះសភាពនយោបាយនៅក្នុងប្រទេសកម្ពុជាមានស្ថេរភាពល្អប្រសើរជាងមុន។ ហើយគេសង្កេតឃើញមានការជឿនលឿនទៅមុខជាវិជ្ជមាន។ ប៉ុន្តែនៅមានកង្វល់មួយចំនួនដែលថាសភាពនយោបាយកម្ពុជាងាយនឹងក្រឡាប់ចក្រទៅរកបទពិសោធន៍នៃអតីតកាលវិញ។បទវិភាគរបស់៖ គង់ សុឋានរិទ្ធ
គណបក្សដែលកំពុងប្រជែងអំណាចគ្នាបានចាប់ដៃគ្នាដើរឆ្ពោះទៅកាន់ភាពវិជ្ជមានមួយជំហានថ្មីទៀតនៅពេលនេះ ខណៈដែលគណបក្សទាំងពីរបានបង្កើតក្រុមការងារចំពោះកិច្ចចំនួនពីរ។ នោះគឺក្រុមការងារពិនិត្យ និងផ្តល់យោបល់លើសេចក្តីព្រាងច្បាប់សហជីពនិងមួយទៀតគឺក្រុមការងារ ដើម្បីសិក្សាស្រាវជ្រាវពិនិត្យលទ្ធភាពដំឡើងកម្រិតនៃវប្បធម៌សន្ទនាគ្នា។
ពិតមែនហើយក្រុមការងារទាំងពីរត្រូវបង្កើតឡើងដោយយោងតាមស្មារតីនៃជំនួបរវាងមេដឹកនាំនយោបាយនៃបក្សទាំងពីរកាលពីថ្ងៃទី១០ ខែធ្នូ។ នេះប៉ុន្តែម្យ៉ាងទៀតនោះគឺការបង្កើតក្រុមការងារទាំងពីរខាងលើនេះបានបង្ហាញពីផលវិជ្ជមានបន្ថែមទៀតក្រោយពីជំនួបនោះ នៅពេលដែលកំដៅនយោបាយក្នុងប្រទេសកាន់តែតានតឹងកម្រិតខ្ពស់គួរឲ្យព្រួយបារម្ភ។
មួយវិញទៀតវាក៏បានបង្ហាញពីភាពចាស់ទុំផ្នែកនយោបាយផងដែរដោយសារតែទាំងគណបក្សប្រជាជនកម្ពុជា ទាំងគណបក្សសង្គ្រោះជាតិចេះបង្វែទិសពីសង្គ្រាមវោហាសាស្ត្រ មកប្រកាន់យកវប្បធម៌ចរចាទល់មុខវិញ។ ជាក់ស្តែងដូចជាក្រុមការងារពិភាក្សាលើសេចក្តីព្រាងច្បាប់ស្តីពីសហជីពជាដើម។ ច្បាប់នេះដែលកំពុងស្ថិតក្រោមក្រសៃភ្នែកយ៉ាងយកចិត្តទុកដាក់ទាំងកម្រិតជាតិនិងអន្តរជាតិដោយសារកង្វល់ពីការរិតត្បិតលើក្រុមសហជីព។
បន្ថែមពីនោះទៀតការបោះជំហានថ្មីបន្ថែមទៀតនេះក៏បានបញ្ជាក់ពីការធានាដល់លំនឹងផ្លូវចិត្តដល់ប្រជាពលរដ្ឋនិងសហគមអន្តរជាតិពីការចេះដោះស្រាយជម្លោះរវាងខ្មែរនិងខ្មែរ។ ហើយវាក៏ជាការធានាដល់សុវត្ថិភាពផ្លូវចិត្តរបស់ប្រជាពលរដ្ឋ និយាយដោយឡែកនិងសុវត្ថិភាពសង្គមទូទៅ និយាយជារួម។ ដ្បិតសុភាសិតខ្មែរមួយនិយាយថា «ដំរីជល់គ្នា ងាប់ស្រមោច»។ ដូច្នេះបើគណបក្សប្រជាជនកម្ពុជា និងគណបក្សសង្គ្រោះជាតិឈ្លោះគ្នា ទោះជាគ្រាន់តែជម្លោះដោយពាក្យសំដីនិងយុទ្ធសាស្ត្រយកចាញ់យកឈ្នះដាច់ខាត ប៉ុន្តែគឺក្រុមប្រជាពលរដ្ឋទេដែលជាអ្នករងគ្រោះជាយថាហេតុណាមួយនោះ។ ពលរដ្ឋខ្មែរអាចនឹងកាន់ជើងបក្សម្ខាងៗដាច់ណាត់ ដោយសារភាពងប់ងល់នឹងនយោបាយ ហើយវាកាន់តែផុយស្រួយ ប្រសិនបើបក្សទាំងពីរបន្តជម្លោះនោះ។
ប្រសិនបើគណបក្សប្រជាជនកម្ពុជា និងគណបក្សសង្គ្រោះជាតិអាចបន្តវប្បធម៌បែបនេះបានតទៅទៀតអាចនឹងធ្វើឲ្យគណបក្សទាំងពីរមានទំនុកចិត្តនឹងគ្នា ហើយការប្រកួតប្រជែងដណ្តើមសម្លេងឆ្នោតនិងមានលក្ខណៈវិជ្ជជីវនយោបាយកម្រិតខ្ពស់ប្រកបដោយតម្លាភាពនិងអហិង្សា។ ក៏ប៉ុន្តែប្រសិនបើភាពត្រូវរ៉ូវគ្នានេះបានតែមួយភ្លើងចំបើងដូចមានបទពិសោធន៍កន្លងមកនៅក្នុងនយោបាយកម្ពុជា នោះវិបត្តិនៃភាពតានតឹងនឹងក្លាយជាជំងឺលាប់ រើឡើងវិញជាមិនខាន។ ជាពិសេសនៅពេលដែលគណបក្សនិយាយៗគិតប្រយោជន៍បក្សធំជាងប្រយោជន៍ប្រជារាស្ដ្រនោះ ជំងឺនយោបាយងាយនឹងលាប់ឡើងវិញខ្លាំងណាស់។
ហេតុដូចនេះគណបក្សនិមួយៗគួរតែស្រង់យកបទពិសោធន៍នៅក្នុងពេលនេះ ហើយពង្រឹងយន្តការការងាររវាងគ្នា។ ជាពិសេសគណបក្សទាំងពីរគួរតែចាប់ផ្តើមដោះស្រាយជម្រះបញ្ហារវាងគ្នាបន្តិចម្តងៗចាប់ពីពេលនេះទៅរហូតដល់មុនការបោះឆ្នោតសំខាន់ៗមកដល់ដើម្បីលាងសម្អាតរាល់ភាពសៅហ្មងនានានិងដើម្បីបង្កបរិយាកាសនយោបាយប្រកបដោយសុខសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ