បក្សទាំងពីរ៖ ក្រោយបង្កើតក្រុមការងារស្ថានភាពនយោបាយនឹងអាចធូរស្រាល
គណបក្សប្រជាជនកម្ពុជា និងគណបក្សសង្គ្រោះជាតិបានសម្រេចបង្កើតក្រុមការងារចំនួនពីរគឺគណៈកម្មការចំពោះកិច្ចដើម្បីពិនិត្យ និងផ្តល់យោបល់លើសេចក្តីព្រាងច្បាប់ស្តីពីសហជីព និងក្រុមដំឡើងកម្រិតនៃវប្បធម៌សន្ទនា។ ទន្ទឹមនឹងនេះ គណបក្សទាំងពីរបង្ហាញសុទិដ្ឋិនិយមថា ស្ថានភាពនយោបាយនៃបក្សដែលកំពុងតែប្រឈមគ្នានេះនឹងអាចធូរស្រាល។
ចុះផ្សាយនៅថ្ងៃ៖
ស្តាប់ - ០២:២២
គណបក្សសង្គ្រោះជាតិបានបញ្ជូនសមាសភាពក្រុមការងារទាំងពីរទៅកាន់គណបក្សប្រជាជនកម្ពុជារួចហើយ ខណៈដែលគណបក្សប្រជាជនកំពុងបង្កើតក្រុមការងាររបស់ខ្លួនចំនួនពីរដើម្បីធ្វើការជាមួយក្រុមគណបក្សប្រឆាំង។ ការបង្កើតក្រុមការងារទាំងពីរនេះ គឺគណបក្សបានយោងទៅនឹងសេចក្តីថ្លែងការណ៍របស់គណបក្សទាំងពីរកាលពីថ្ងៃទី១០ធ្នូ ក្រោយភាពតានតឹងនយោបាយ។ ក្រុមដំឡើងកម្រិតនៃវប្បធម៌សន្ទនានៃគណបក្សសង្គ្រោះជាតិមានសមាសភាពចំនួន៦រូប ដែលដឹកនាំដោយលោក ប៉ុលហំម និងលោកយឹម សុវណ្ណ ប៉ុន្តែគណបក្សប្រជាជនកម្ពុជានៅមិនទាន់បង្ហាញពីសមាសភាពនៅឡើយទេ។ ដោយឡែកក្រុមការងារពិនិត្យនិងផ្តល់យោបល់លើសេចក្តីព្រាងច្បាប់ស្តីពីសហជីព មកគណបក្សប្រឆាំង មានចំនួន៥រូប នឹងដឹកនាំដោយលោក សុន ឆ័យ និងលោកស្រី កែ សុវណ្ណរតន៍។ ចំណែកឯគណបក្សប្រជាជនកម្ពុជា នឹងដឹកនាំដោយលោក ប៉ែន បញ្ញា ប្រធានគណៈកម្មការនីតិកម្មរបស់រដ្ឋសភា។ នេះបើតាមការបញ្ជាក់ពីលោក សុន ឆ័យដដែល។
គណបក្សទាំងពីរបានលើកឡើងថា គោលបំណងនៃការបង្កើតគឺដើម្បីឱ្យកិច្ចការពិភាក្សាស្តីពីបញ្ហាច្បាប់អាចមានភាពផុលផុស ហើយបញ្ហានយោបាយទៀតសោធនឹងអាចជឿទុកចិត្តកាន់តែច្រើន ក៏ដូចជាការបង្កើនជំនួបដើម្បីនិយាយគ្នាពីបញ្ហាណាមួយដែលជាទស្សនៈ២ផ្ទុយគ្នា មុននឹងជំនួបកំពូលនៃថ្នាក់ដឹកនាំគណបក្សទាំងពីរ។ លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានបន្ថែមថា ក្រុមបច្ចេកទេសទាំងពីររំពឹងថានឹងអាចពិភាក្សាលើច្បាប់ផ្សេងៗទៀតមុននឹងចូលដល់ដៃរបស់រដ្ឋសភា ហើយវប្បធម៌សន្ទនានឹងកាន់តែរឹងម៉ាំដើម្បីដោះស្រាយបញ្ហាជាតិសំខាន់ៗ ដោយឈរលើមូលដ្ឋាន នៃផលប្រយោជន៍ពលរដ្ឋ។ ប៉ុន្តែលោក សុខ ឥសាន្ត អ្នកនាំពាក្យគណបក្សកាន់អំណាច បានលើកឡើងថា ការបង្កើតក្រុមការងារមិនសំខាន់ដូចការអនុវត្តឱ្យបានទៅនឹងខ្លឹមសារ នៃកិច្ចព្រមព្រៀងនោះទេ។
គួររំលឹកថា គណបក្សទាំងពីរកាលពីថ្ងៃទី១០ ធ្នូកន្លងទៅ បានចេញសេចក្តីថ្លែងការរួមចំនួន៤ចំណុច ដូចជាការបង្កើតគណៈកម្មការចំពោះកិច្ច លើសេចក្តីព្រាងច្បាប់សហជីព និងការបង្កើតក្រុមការងារដំឡើងកម្រិតនៃវប្បធម៌សន្ទនា ដើម្បីបង្កើនការជឿទុកចិត្តគ្នារវាងបក្សទាំងពីរជាដើម។ យ៉ាងណាក៏ដោយ លោក អ៊ូ វីរៈ ប្រធានវេទិកាអនាគត និងជាអ្នកវិភាគនយោបាយនៅកម្ពុជា បានស្វាគមន៍ចំពោះយន្តការនេះ ដែលនឹងអាចឱ្យអ្នកតំណាងរាស្ត្រក្នុងសភាជជែកគ្នាដើម្បីផលប្រយោជន៍ជាតិ។ លោក បន្ថែមថាបើទោះបីជាពង្រឹងវប្បធម៌សន្ទនាមែន ប៉ុន្តែភាពតានតឹងនយោបាយនឹងនៅតែក្តៅ ត្រជាក់ៗដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ