លោក សម រង្ស៊ី អំពាវនាវឲ្យអ្នកនយាបាយខ្មែររួបរួមសាមគ្គីគ្នា ឈប់ពឹងបរទេស
គណបក្សសង្រ្គោះជាតិនៅថ្ងៃអាទិត្យទី៥កក្កដាឆ្នាំ២០១៥នេះ បានរៀបចំពិធីបង្សុកូលមួយ ដើម្បីគោរពវិញ្ញាណក្ខន្ធជូនជនរងគ្រោះដែលបានស្លាប់បាត់បង់ជីវិតនៅក្នុងព្រឹត្តិការណ៍ថ្ងៃទី ៥-៦ កក្កដា ឆ្នាំ១៩៩៧។ លោក សម រង្ស៊ី ដែលធ្វើជាអធិបតីនៃពិធីនេះ បានមានប្រសាសន៍ថា គណបក្សសង្រ្គោះជាតិនឹងមិនបំភ្លេចជនរងគ្រោះទាំងនោះទេ។ ចំណែកឯគណបក្សហ្វ៊ុនស៊ិនប៉ិចវិញ មិនបានប្រារព្ធពិធីអ្វីនៅថ្ងៃនេះទេ ក៍ប៉ុន្តែជារៀងរាល់ឆ្នាំ គណបក្ស តែងតែរំលឹកវិញ្ញាណក្ខន្ធរបស់ជនរងគ្រោះទាំងនោះ នៅក្នុងអំឡុងពេលបុណ្យភ្ជុំបិណ្ឌវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ពិធីរំលឹកវិញ្ញាណក្ខន្ធជនរងគ្រោះក្នុងព្រឹត្តិការណ៍ថ្ងៃ ៥-៦ កក្កដា ដែលប្រារព្ធធ្វើឡើងនៅឯទីស្នាក់ការគណបក្សសង្រ្គោះជាតិ ក្នុងសង្កាត់ចាក់អង្រែលើ នៅថ្ងៃអាទិត្យទី៥ កក្កដានេះ ក៍មានការចូលរួមពីលោក លឺ ឡាយស្រេង អតីតមន្រ្តីជាន់ខ្ពស់គណបក្សហ្វ៊ុនស៊ិនប៉ិចផងដែរ។ ទាំងលោក លឺ ឡាយស្រេង និងទាំងលោក សម រង្ស៊ី នៅថ្ងៃអាទិត្យនេះ បានអំពាវនាវឲ្យអ្នកនយោបាយខ្មែររួបរួមគ្នា នឹងបញ្ឈប់វប្បធម៌ពឹងបរទេស ដើម្បីដោះស្រាយបញ្ហារបស់ខ្មែរ។
ឥស្សរជននយោបាយជាន់ខ្ពស់ទាំងពីរ ដែលធ្លាប់ធ្វើការនៅក្រោមដំបូលហ្វ៊ុនស៊ិនប៉ិចជាមួយគ្នានេះ ក៍អំពាវនាវឲ្យអ្នកនយោបាយខ្មែររួបរួមគ្នាដោះស្រាយបញ្ហាប្រឈមរបស់ជាតិ ដោយបំភ្លេចចោលនូវទំនាស់យោធាកាលពី១៨ឆ្នាំមុន។
ថ្ងៃទី៥-៦កក្កដាឆ្នាំ១៩៩៧-៥-៦កក្កដា ឆ្នាំ២០១៥ គឺជាខួប១៨ឆ្នាំគត់ នៃព្រឹត្តិការណ៍ផ្ទុះអាវុធកណ្តាលទីក្រុងភ្នំពេញ ដែលបានកើតឡើងរវាងកងកម្លាំងគាំទ្រគណបក្សហ្វ៊ុនស៊ិនប៉ិច ដឹកនាំដោយព្រះអង្គម្ចាស់នរោត្តម រណឬទ្ធិ ដែលកាលណោះគឺជានាយករដ្ឋមន្រ្តីទី១ និងកងកម្លាំងគាំទ្រគណបក្សប្រជាជនកម្ពុជាដែលកាលណោះដឹកនាំដោយលោក ហ៊ុន សែន នាយករដ្ឋមន្រ្តីទី២។ មន្រ្តីគណបក្សប្រជាជនកម្ពុជាមិនបានចាត់ទុកព្រឹត្តិការណ៍នោះថា ជាអំពើរដ្ឋប្រហារនោះទេ។ ចំណែកឯគណបក្សហ្វ៊ុនស៊ិនប៉ិចវិញ ក្នុងរយៈពេលចុងក្រោយនេះ ក៍មិនបានចាត់ទុកថា ជាអំពើរដ្ឋប្រហារនោះដែរ។ ក៍ប៉ុន្តែលោក សម រង្ស៊ី ប្រធានគណបក្សសង្រ្គោះជាតិដែលបានហៅព្រឹត្តិការណ៍នេះថា ជារដ្ឋប្រហារនោះបានបញ្ជាក់ថា គណបក្សសង្គ្រោះជាតិនឹងមិនបំភ្លេចជនរងគ្រោះដែលបានស្លាប់បាត់បង់ជីវិតនៅក្នុងព្រឹត្តិការណ៍នេះទេ។
នៅថ្ងៃនេះ គណបក្សហ្វ៊ុនស៊ិនប៉ិច មិនបានធ្វើពិធីរំលឹកខួបនៅថ្ងៃនេះទេ។ ប៉ុន្តែមន្រ្តីជាន់ខ្ពស់គណបក្សរាជានិយមនេះបានបញ្ជាក់ថា គណបក្សហ្វ៊ុនស៊ិនប៉ិច តែងតែប្រារព្ធពិធីរំលឹកវិញ្ញាណក្ខន្ធជនរងគ្រោះនេះ នៅក្នុងឱកាសនៃពិធីបុណ្យភ្ជុំបិណ្ឌជារៀងរាល់ឆ្នាំ ព្រោះថា គណបក្សហ្វ៊ុនស៊ិនប៉ិចមិនមែនមានតែជនរងគ្រោះដែលពលីជីវិតនៅក្នុងព្រឹត្តិការណ៍ឆ្នាំ១៩៩៧នេះទេ។
លោក ញឹក ប៊ុនឆៃ អនុប្រធានគណបក្សហ្វ៊ុនស៊ិនប៉ិច ក៏ធ្លាប់បានពន្យល់ថា ព្រឹត្តិការណ៍ឆ្នាំ១៩៩៧នោះ គឺកើតឡើងចេញពីរឿងមិនទុកចិត្តគ្នា។ សម្រាប់ហ្វ៊ុនស៊ិនប៉ិច អ្នកនយោបាយណាមួយ ដែលយកថ្ងៃទី៥-៦ ខែកក្កដានេះ ជាថ្ងៃរំលឹកអ្នកដែលបានស្លាប់នោះ ជាការកេង ចំណេញផ្នែកនយោបាយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ