ក្រោយការអំពាវនាវ៖ សមាជិកគណបក្សប្រឆាំងជាង៤០នាក់ បានសម្រេចចុះចូលគណបក្សកាន់អំណាច
គិតត្រឹមថ្ងៃទី៣១ តុលា ម្សិលមិញនេះ មានតំណាងរាស្ដ្រ សមាជិកក្រុមប្រឹក្សាខេត្ត និងមេឃុំ -ចៅសង្កាត់គណបក្សសង្រ្គោះជាតិសរុប៤៣នាក់ហើយ ដែលបានប្រកាសសុំចុះចូលជាមួយគណបក្សប្រជាជនកម្ពុជាដែលជាគណបក្សកាន់អំណាច។ សម្រាប់អ្នកឃ្លាំមើលស្ថានការណ៍នយោបាយនៅកម្ពុជា ចរន្តនៃការចាកចេញនេះ ហាក់មានចំនួនតិចតួចនៅឡើយ បើប្រៀបធៀបនឹងការបោះឆ្នោតមុនៗ។
ចុះផ្សាយនៅថ្ងៃ៖
ស្តាប់ - ០២:៣១
យោងតាមតារាងផ្លូវការនៃបញ្ជីឈ្មោះសមាជិកគណបក្សសង្រ្គោះជាតិដែលសុំចុះចូលជាមួយគណបក្សប្រជាជនកម្ពុជា គិតត្រឹមថ្ងៃទី ៣១ តុលា មានតែសមាជិក៤៣នាក់ប៉ុណ្ណោះ ដែលបានសម្រេចចិត្តចុះចូល។ ក្នុងនោះ មានតំណាងរាស្រ្តម្នាក់ គឺលោក ឡុង ប៊ុន្នី មកពីខេត្តព្រៃវែង។ ក្រៅពីនោះនៅមានសមាជិកក្រុមប្រឹក្សាខេត្តម្នាក់ រួមជាមួយសមាជិកក្រុមប្រឹក្សាក្រុង ស្រុក៤នាក់, មេឃុំ-ចៅសង្កាត់២នាក់, ជំទប់ឬចៅសង្កាត់រងទី១ចំនួន៦នាក់, ជំទប់ ឬចៅសង្កាត់រងទី២ ចំនួន៦នាក់ និងសមាជិកក្រុមប្រឹក្សាឃុំ-សង្កាត់ចំនួន២៣នាក់។ ហើយក្នុងចំណោមនោះ ខេត្តកំពង់ចាម មានអ្នកចុះចូលច្រើនជាងគេ គឺចំនួន១៣នាក់។ នេះបើផ្អែកតាមតារាងបញ្ជីឈ្មោះសមាជិកគណបក្សសង្រ្គោះជាតិ ដែលសុំចូលរួមជីវភាពនយោបាយ ជាមួយគណបក្សកាន់អំណាច ដែលត្រូវបានធ្វើតុល្យការចុងក្រោយកាលពីថ្ងៃទី ៣១ តុលា។
ការសម្រេចចិត្តចាកចេញពីគណបក្សសង្រ្គោះជាតិទៅចូលរួមជាមួយគណបក្សកាន់អំណាចនេះ ត្រូវបានពួកគេលើកហេតុផលដូចៗគ្នាថា គឺដោយសារតែបានមើលឃើញថា លោក កឹម សុខា ដែលជាប្រធានគណបក្សសង្រ្គោះជាតិ ក្បត់ជាតិ ហើយមានបំណងផ្តួលរំលំរដ្ឋាភិបាលកម្ពុជាស្របច្បាប់ និងបន្ថែមដោយមូលហេតុថា បានមើលឃើញពីការបែកបាក់ផ្ទៃក្នុងនៅក្នុងជួរថ្នាក់ដឹកនាំគណបក្សសង្រ្គោះជាតិជាដើម។ យ៉ាងណាក៏ដោយ ចរន្តនៃការចាកចេញនេះ ត្រូវបានគេមើលឃើញថា បានកើតឡើង ក្រោយពីមានការអំពាវនាវរបស់លោកនាយករដ្ឋមន្រ្តី ហ៊ុន សែន កាលពីថ្ងៃទី ២២ តុលា ដោយប្រមុខបក្សកាន់អំណាច លោកបានព្រមានថា គណបក្សប្រឆាំងដែលជាគូរប្រជែងដ៏គ្រោះថ្នាក់របស់លោក នឹងត្រូវរំលាយ នៅក្នុងពេលដ៏ខ្លីខាងមុខនេះ។ ភ្ជាប់ជាមួយនឹងការអំពាវនាវនោះ ប្រមុខរដ្ឋាភិបាលកម្ពុជា ថែមទាំងបានធានាថា នឹងរក្សាមុខតំណែងរបស់ពួកគេឲ្យនៅដដែល ខណៈដែលមន្រ្តីគណបក្សប្រឆាំងបានអះអាងថា តំណែងរបស់ពួកគេនឹងត្រូវបាត់បង់ ស្របពេលដែលសមាជិកភាពនៅក្នុងគណបក្សបាត់បង់ទៅដែរ។
លោក កង សាវ៉ាង មន្ត្រីសម្របសម្រួលផ្នែកអង្កេតរបស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល បានហៅការចាកចេញពីគណបក្សនយោបាយមួយទៅចូលរួមជាមួយគណបក្សនយោបាយមួយទៀតថា គឺជាសិទ្ធសេរីភាពរបស់ប្រជាពលរដ្ឋដែលត្រូវបានធានាដោយច្បាប់។ ប៉ុន្តែការចុះចូលនោះ មិនត្រូវធ្វើឡើង តាមរយៈការបង្ខិតបង្ខំឬការគំរាមកំហែងនោះឡើយ។ អ្នកធ្វើការផ្នែកសង្កេតការលើដំណើរការបោះឆ្នោតនៅកម្ពុជារូបនេះបានកត់សំគាល់ថា ចរន្តនៃការចាកចេញបែបនេះ តែងតែកើតមានឡើងនៅមុនពេលការបោះឆ្នោតមកដល់។ ប៉ុន្តែអ្វីជាការកត់សំគាល់របស់លោក ចរន្តនៃការចាកចេញលើកនេះ ហាក់នៅមានចំនួនតិចតួចនៅឡើយ បើធៀបនឹងការបោះឆ្នោតមុនៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ