បក្សប្រឆាំង៖ការដើរចេញពីសហភាពអឺរ៉ុបរបស់អង់គ្លេស មិនប៉ះពាល់ដល់នយោបាយបក្សប្រឆាំងកម្ពុជាទេ
គណបក្សប្រឆាំងធំបំផុតក្នុងប្រទេសកម្ពុជាបានកត់សម្គាល់ថា ការដើរចេញរបស់អង់គ្លេសពីសហភាពអឺរ៉ុប មិនធ្វើឲ្យប៉ះពាល់ដល់ដំណើរការប្រជាធិបតេយ្យ ឬគណបក្សនយោបាយក្នុងប្រទេសកម្ពុជាទេ។ ខណៈដែលកន្លងមកកម្ពុជាធ្លាប់ទទួលជំនួយរាប់លានដុល្លារពីសហគមន៍នេះ ហើយគណបក្សប្រឆាំងផ្ទាល់ក៏ធ្លាប់បានទទួលការគាំទ្រលើការពង្រឹងលទ្ធិប្រជាធិបតេយ្យផងដែរ។ ចំណែកភាគីរដ្ឋាភិបាលបញ្ជាក់ថាបញ្ហារបស់សហភាពអឺរ៉ុបនៅពេលនេះនឹងប៉ះពាល់ដល់បក្សប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កាលពីថ្ងៃទី២៤ ខែមិថុនា ពលរដ្ឋអង់គ្លេសបានសម្រេចបោះឆ្នោតឲ្យអង់គ្លេសចាកចេញពីសហភាពអឺរ៉ុប។ ការសម្រេចចិត្តដើរចេញពីសហភាពអឺរ៉ុបគឺជាជោគជ័យធំធេងសម្រាប់ក្រុមប្រឆាំងនយោបាយអឺរ៉ុប។ ការដើរចេញនេះ ធ្វើឡើងខណៈដែលអឺរ៉ុបកំពុងតែជួបនឹងបញ្ហាអន្តោប្រវេសន៍ និងវិបត្តិសេដ្ឋកិច្ច ហើយចុងក្រោយគឺការដើរចេញរបស់អង់គ្លេសនេះឯង។
លោកស្រី មូរ សុខហួរ ជាអគ្គនាយកទំនាក់ទំនងសាធារណៈ និងជាតំណាងរាស្ត្រនៃគណបក្សសង្គ្រោះជាតិមណ្ឌលខេត្តបាត់តំបងបានឲ្យវិទ្យុបារាំងដឹងថា ទាំងផ្នែកជំនួយ និងផ្នែកនយោបាយ ដែលសហភាពអឺរ៉ុបធ្លាប់ផ្តល់មកកម្ពុជា គឺមិនមានអ្វីប៉ះពាល់ទេ បើទោះបីជាសមាជិករបស់អឺរ៉ុបម្នាក់ដើរចេញក៏ដោយ។ លោកស្រីបញ្ជាក់ថាព្រឹតិ្តការណ៍នេះ ក៏មិនប៉ះពាល់ដល់គណបក្សសង្គ្រោះជាតិ ឬចលនាប្រជាធិបតេយ្យណាមួយដែរ។
លោកស្រីបន្ថែមថា កន្លងមកគណបក្សសង្គ្រោះជាតិមិនបានទទួលថវិកាផ្ទាល់ពីសហភាពអឺរ៉ុបទេ ពីព្រោះថវិកាទាំងនោះគឺបានហូរចូលទៅក្នុងដៃរដ្ឋាភិបាលកម្ពុជា។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានបញ្ជាក់ថាការចាកចេញរបស់អង់គ្លេសពីសហភាពអឺរ៉ុបនៅពេលនេះ ធ្វើឲ្យនយោបាយនៅក្នុងតំបន់សហភាពអឺរ៉ុបគឺមិនមានស្ថិរភាព ដូច្នេះការដំឡើងសម្លេងរបស់ក្រុមមួយ ដែលគាំទ្រលោកសម រង្ស៊ី គឺបាត់បង់ឥទ្ធិពលទៅហើយ។ លោកក៏បានបន្ថែមដែរថាផល់ប៉ះពាល់ក៏មានច្រើនមកលើអង្គការក្រៅរដ្ឋាភិបាលកម្ពុជា ដែលកន្លងមកធ្លាប់បានទទួលជំនួយពីសហភាពអឺរ៉ុប។
សូមបញ្ជាក់ថាកាលដើមខែមិថុនា សភាអឺរុប បានចេញសេចក្តីសម្រេច ៧ចំនុច ដែលមានខ្លឹមសារឲ្យរដ្ឋាភិបាលកម្ពុជា ត្រូវតែបន្ធូរបន្ថយភាពតានតឹងនយោបាយ ដោយដោះលែងសកម្មជននយោបាយ និងសកម្មជនការពារសិទ្ធិមនុស្ស ឲ្យបានមុនការបោះឆ្នោតឆ្នាំ ២០១៧ និង២០១៨។
សម្រាប់កម្ពុជា! អឺរ៉ុបបានផ្តល់ជំនួយជាច្រើនលានដុល្លារអាមេរិកលើផ្នែកអប់រំ មនុស្សធម៌ បរិស្ថាន សិទ្ធិមនុស្ស និងគាំទ្រអង្គការក្រៅរដ្ឋាភិបាលនានា។ ចាប់ពីឆ្នាំ២០០០ រហូតដល់ឆ្នាំ២០១៣ សហភាពអឺរ៉ុបបានផ្តល់ជំនួយយ៉ាងហោចណាស់ ៧០០ដុល្លារអាមេរិក ហើយពីឆ្នាំ២០១៤ ដល់ឆ្នាំ២០២០ អឺរ៉ុបគ្រោងផ្តល់ជំនួយទឹកប្រាក់៦០០ដុល្លារអាមេរិក។ បើនិយាយពីផ្នែកពាណិជ្ជកម្ម រវាងកម្ពុជានឹងសហភាពអឺរ៉ុបក្នុងឆ្នាំ២០១៥កន្លងទៅ ភាគីទាំងពីរបានដោះដូរពាណិជ្ជកម្មនឹងគ្នាក្នុងរង្វង់ទឹកប្រាក់ ជិត៥ពាន់លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ