ខុមហ្វ្រែល រកឃើញគម្រោងរៀបចំការិយាល័យចុះឈ្មោះបោះឆ្នោតនៅក្បែរបន្ទាយយោធាខេត្តកំពង់ស្ពឺ
អង្គការខុមហ្វ្រែល ដែលធ្វើការងារផ្នែកបោះឆ្នោតបានបង្ហើបថា មានគម្រោងរៀបចំការិយាល័យចុះឈ្មោះបោះឆ្នោតមួយនៅក្បែរបន្ទាយយោធាខេត្តកំពង់ស្ពឺ។ នេះជាព័ត៌មានបឋម ដែលខុមហ្វ្រែលទទួលបាន ហើយត្រូវបានបង្ហើបនៅក្នុងសន្និសីទសារព័ត៌មាន នៅថ្ងៃទី ២៦តុលានេះ ស្ដីពីរបាយការណ៍លើដំណើការចុះឈ្មោះបោះឆ្នោតឆ្នាំ២០១៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
គម្រោងនៃការដោះដូរការិយាល័យចុះឈ្មោះបោះឆ្នោតឲ្យនៅជិតបន្ទាយយោធាខេត្តកំពង់ស្ពឺ មិនទាន់មានការឯកភាពពីគណៈកម្មាធិការជាតិរៀបចំការបោះឆ្នោត គ ជ ប នៅឡើយទេ។ ប៉ុន្តែខុមហ្វ្រែលនឹងតាមឃ្លាំមើលលើបញ្ហានេះបន្តទៀត។
លោក គល់ បញ្ញា នាយកប្រតិបត្តិអង្គការខុមហ្វ្រែលពន្យល់ថា ការិយាល័យដែលគេមានគម្រោងដាក់ឲ្យនៅជិតបន្ទាយយោធាវាអាចជាការរិយាល័យចុះឈ្មោះបោះឆ្នោតមួយដែលមានតែយោធាជាអ្នកចុះឈ្មោះបោះឆ្នោត។ លោកបញ្ញាថា បើករណីនេះកើតឡើងមែនវាជារឿងផ្ទុយនឹងច្បាប់ព្រោះថា ពលរដ្ឋត្រូវចុះឈ្មោះបោះឆ្នោតនៅកន្លែងខ្លួនរស់នៅ។ ទោះយ៉ាងណាលោកចាត់ទុកថា នេះមិនមែនជាករណីធំដុំទេ ប៉ុន្តែអង្គការខុមហ្វ្រែលមានការព្រួយបារម្ភខ្លាចប៉ះពាល់ដល់ការសម្ងាត់នៃការបោះឆ្នោត។
ទន្ទឹមនឹងនេះអង្កការនិចហ្វិចដែលចង់សម្ព័ន្ធភាពជាមួយខុមហ្វ្រែលក្នុងការបង្ហាញរបាយការណ៍អង្កេតស្ដីពីដំណើរការចុះឈ្មោះបោះឆ្នោតក៏បានឲ្យដឹងថា កន្លងមកក៏មានករណីដឹកយោធាចេញពីភូមិភាគទៅចុះឈ្មោះបោះឆ្នោតនៅសង្កាត់ប្រាំពីរក្រុងសៀមរាបដែរ។
ដោយឡែកទាក់ទងដំណើរការអង្កេតក្នុងការចុះឈ្មោះបោះឆ្នោតគិតចាប់ថ្ងៃទី១កញ្ញាដល់ថ្ងៃទី១០តុលា សម្ព័ន្ធកំណែទម្រង់ការបោះឆ្នោតហៅកាត់អឺរ៉ា រកឃើញភាពមិនប្រក្រតីកើតឡើងជាង១៤០០ករណីដោយក្នុងមួយថ្ងៃបញ្ហាទាំងនោះកើត៦ឡើងករណី។ បញ្ហាទាំងនោះរួមមាន៖ ព្រះសង្ឃនិមន្តទៅចុះឈ្មោះបោះឆ្នោតមានចំនួនតិចតួចបំផុត ជនពិការជួបការលំបាកទៅចុះឈ្មោះបោះឆ្នោត ពលករចំណាកស្រុកវិលមកចុះឈ្មោះមានចំនួនតិចតួចជាដើម។
អឺរ៉ាបានកត់សម្កាល់ថា បណ្ដឹងដែល គ ជ ប ទទួលបានភាគច្រើនគឺសង្ស័យថា គ្មានសញ្ជាតិខ្មែរ រំខានការចុះឈ្មោះបោះឆ្នោត ការដឹកមនុស្សទៅចុះឈ្មោះខុសទីតាំងជាដើម។ បន្ថែមពីលើនេះ អឺរ៉ារកឃើញថា រហូតមកដល់ពេលចំនួនពលរដ្ឋទៅចុះឈ្មោះមានការថយចុះ។ ពីមុនមួយថ្ងៃមានពលរដ្ឋទៅចុះឈ្មោះបោះឆ្នោតជាង១០ម៉ឺននាក់។ តែឥលូវធ្លាក់មកនៅត្រឹម៦ម៉ឺននាក់។ តែយ៉ាងណាមិញអឺរ៉ាបានលើកសសើរពីកិច្ចខិតខំប្រឹងប្រែងរបស់គជបជុំវិញដំណើការចុះឈ្មោះបោះឆ្នោតជូនពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ