គណបក្សប្រជាជនឈរនៅលេខរៀងនាំមុខក្នុងការចូលរួមបោះឆ្នោតព្រឹទ្ធសភា
គណៈកម្មាធិការជាតិរៀបចំការបោះឆ្នោត គ.ជ.ប នៅថ្ងៃចន្ទនេះបានចាប់ឆ្នោតលេខរៀងគណបក្សនយោបាយដែលចូលរួមការបោះឆ្នោតព្រឹទ្ធសភានៅថ្ងៃទី២៥កុម្ភៈ។ ក្នុងនោះគណបក្សប្រជាជនទទួលបានលេខរៀងទី១ និងលេខរៀងបន្តបន្ទាប់ទៀតបានទៅលើ គណបក្សយុវជនកម្ពុជា គណបក្សខ្មែររួបរួមជាតិ និងគណបក្សហ្វ៊ុនស៊ិនប៉ិច។
ចុះផ្សាយនៅថ្ងៃ៖
ស្តាប់ - ០១:៥៥
បើតាម គ.ជ.ប ការចាប់លេខរៀង គណបក្សនយោបាយនេះ ធ្វើឡើងតាមប្រការ៥.១២ នៃបទបញ្ជានិងនីតិវិធី សម្រាប់ការបោះឆ្នោតជ្រើសតាំង សមាជិកព្រឹទ្ធសភា នីតិកាលទី៤ ឆ្នាំ២០១៨ ។ ដំណើរការចាប់ឆ្នោតនោះមានការចូលរួមពីសម្ដេចសង្ឃទាំងពីរគណៈ និងលោក ស៊ិក ប៊ុនហុក ប្រធានគ.ជ.ប ដោយក្នុងនោះគណបក្សប្រជាជនទទួលបានលេខរៀងទី១ តាមពីក្រោយដោយគណបក្សយុវជនកម្ពុជាទទួលបានលេខរៀងទី២ គណបក្សខ្មែររួបរួមជាតិលេខ៣ និងគណបក្សហ្វ៊ុនស៊ិនប៉ិចតនៅលេខរៀងទី៤។ ហើយគណបក្សប្រជាជន និងហ៊្វុនស៊ិនប៉ិច បានឈរឈ្មោះបោះឆ្នោតនៅគ្រប់មណ្ឌលទាំងអស់នៅទូទាំងប្រទេស គណបក្សខ្មែររួបរួមជាតិឈរឈ្មោះនៅ៧មណ្ឌល គណបក្សយុវជនកម្ពុជាឈរឈ្មោះ៣មណ្ឌល។
លោក ស៊ិក ប៊ុនហុក ប្រធាន គ.ជ.ប បានគូសបញ្ជាក់ថា ការបោះឆ្នោតជ្រើសរើសសមាជិកព្រឹទ្ធសភានីតិកាលទី៤នេះ ពិតជាមែនការបោះឆ្នោតអសកល តែដំណើរការរៀបចំនៅតែប្រព្រឹត្តទៅដូចការបោះឆ្នោតសកលដែរ ដោយផ្ដើមចេញពីការបោះចុះឈ្មោះបោះឆ្នោត ដំណើរការចុះឈ្មោះគណបក្សនយោបាយនិងបេក្ខជនដែលឈរឈ្មោះបោះឆ្នោត ការឃោសនាបោះឆ្នោត និងការរាប់សន្លឹកឆ្នោត។
សូមរំលឹកថា ការបោះឆ្នោត ព្រឹទ្ធសភា គឺជាការបោះឆ្នោតអសកល មានតែតំណាងរាស្រ្ត១៥៣រូប និងសមាជិកក្រុមប្រឹក្សាឃុំសង្កាត់ក្នុងតំណែង១១,៥៧២ជាអ្នកបោះឆ្នោត។ ទន្ទឹមនឹងនេះ សមាជិកព្រឹទ្ធសភានីតិកាលទី៤នេះ មានចំនួន៦២រូប ដែលចំនួនកើន១រូប។ តាមគម្រោង គ.ជ.ប គ្រោងប្រើប្រាស់ថវិកា ២លានដុល្លារអាមេរិក សម្រាប់ការរៀបចំការបោះឆ្នោត ព្រឹទ្ធសភានេះ ។
ជាការកត់សម្គាល់ ដំណើរការចាប់លេខរៀងគណបក្សនយោបាយ ដែលចូលរួមការបោះឆ្នោតជ្រើសរើសសមាជិកព្រឹទ្ធសភានៅពេលនេះធ្វើឡើងបន្ទាប់ពីគណបក្សសង្គ្រោះជាតិដែលជាបក្សប្រឆាំងដ៏ធំត្រូវបានរំលាយ។ ដែលមូលហេតុនេះបណ្ដាលឲ្យគ.ជ.បប្រឈមនឹងការផ្អាកជំនួយពីសហរដ្ឋអាមេរិក និងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ