មន្រ្តីជំនាញ៖ ចំនូនករណីគ្រុនឈាមកើនឡើងនៅដើមឆ្នាំ ២០១៥
ចំនួនករណីគ្រុនឈាមនៅដើមឆ្នាំ ២០១៥ មានការកើនឡើង បើប្រៀបធៀបនឹងឆ្នាំ២០១៤។ ទោះបីជាយ៉ាងណាក៏ដោយ ចំនួនអ្នកស្លាប់ដោយសារជម្ងឺគ្រុនឈាម បានថយចុះ ពី ០.៧% មកនៅត្រឹម ០.៤% ពោលគឺថយចុះចំនួន ១ករណី។ នេះបើយោងតាមរបាយការណ៍តាមប្រព័ន្ធអង្កេតតាមដានរបស់កម្មវិធីជាតិ ជំងឺគ្រុនឈាមនៅ ២៧សប្តាហ៏ដំបូង នៃមជ្ឈមណ្ឌលជាតិប្រយុទ្ធនឹងជម្ងឺគ្រុនចាញ់។
ចុះផ្សាយនៅថ្ងៃ៖
ស្តាប់ - ០១:៥៨
ជម្ងឺគ្រុនឈាមនៅដើមឆ្នាំ ២០១៥ នេះបានកើនឡើងចំនួន ១៩៨ ករណី ពោលគឺ ១៤៤៣ ករណី ធៀបទៅនឹងឆ្នាំ ២០១៤ ដែលមានចំនួន ១២៤៥ករណី ។ ប៉ុន្តែការកើនឡើងករណីនៃជម្ងឺគ្រុនឈាមនៅឆ្នាំ ២០១៥ វានៅទាបជាង នៅឆ្នាំ ២០១១ ២០១២ និង ២០១៣ បើគិតក្នុងរយៈពេលដូចគ្នា។ នេះបើតាម របាយការណ៍ជម្ងឺគ្រុនឈាម ២៧ សប្តាហ៍ដំបូង ឆ្នាំ ២០១៥ នៃមជ្ឈមណ្ឌលជាតិប្រយុទ្ធនឹងជម្ងឺគ្រុនចាញ់ ប៉ារ៉ាស៊ីតសាស្រ្ត បាណកសាស្រ្ត។
ទោះបីជាយ៉ាងណាក៏ដោយ ករណីស្លាប់ដោយសារជម្ងឺគ្រុនឈាម ក្នុងឆ្នាំ ២០១៥ មាន ៩ករណី តិចជាង ឆ្នាំ ២០១៤ ដែលមាន ១០ករណី។ លទ្ធផលតិចជាងមុននេះ ដោយសារតែ ការយល់ដឹងរបស់ប្រជាជន ពីរបៀបការពារជម្ងឺគ្រុនឈាម កាន់តែទូលំទូលាយ។
របាយការណ៍ដដែល ក៏បានបង្ហាញថា ជម្ងឺគ្រុនឈាម នៅ ២៧ សប្តាហ៍ ដំបូង ឆ្នាំ ២០១៥ មានប្រមាណជា ២៧០០ ករណី ដែលក្នុងនោះ ជាង ៨០% មាននៅ កំពង់ចាម សៀមរាប កណ្តាល ភ្នំពេញ បន្ទាយមានជ័យ កំពង់ធំ ព្រៃវែង និង កំពង់ស្ពឺ។
ពាក់ព័ន្ធនឹងចំណាត់ការដើម្បីទប់ស្កាត់ជម្ងឺគ្រុនឈាម លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម បានឲ្យដឹងថា ក្រសួងសុខាភិបាល បានដាក់ចេញនូវសកម្មភាពជាបន្តបន្ទាប់។ ជាក់ស្តែង ក្រសួង បានចាប់ផ្តើមធ្វើសកម្មភាព តាំងពីមុនពេលរដូវវស្សារហូតដល់ផុតរដូវវស្សា ដោយភ្នាក់ងារអប់រំតាមខេត្ត បានចុះ ពន្យល់ឲ្យប្រជាពលរដ្ឋសំអាតបរិស្ថាន កំទេចចោលនូវថ្លុកទឹក ក៏ដូចជាបំផ្លាញកំប៉ុងសំបកកង់ឡាន ដែលអាចជាប្រភពនៃមូសខ្លា។
ទន្ទឹមនឹងនេះ ក្រសួងក៏បានចែកថ្នាំអាល់ប៉ែតតាំងពីខែ ឧសភា រហូតដល់បច្ចុប្បន្ន នៅទូទាំងប្រទេស និងបាញ់ថ្នាំសម្លាប់មូសសម្រាប់តំបន់មួយចំនួន ដែលមានមូសខ្លាច្រើនផងដែរ៕
ទោះបីជាយ៉ាងណាក៏ដោយ បើយោងតាមរបាយការណ៍របស់អង្គការសុខភាពពិភពលោក កាលពីខែ ឧសភា ថ្មីៗនេះ បានបញ្ជាក់ថា ស្ថានភាពជម្ងឺគ្រុនឈាមនៅប្រទេសកម្ពុជា ស្ថិតនៅក្នុងដំណាក់កាលដែលគ្រប់គ្រងបាន បើប្រៀបធៀបនឹងប្រទេសជិតខាងមួយ ចំនួនដូចជា ថៃ និង វៀតណាម នៅក្នុងរយៈពេលដូចគ្នា៕
អត្តបទដោយ៖ ចាន់ ជីវ៉ា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ