រដ្ឋាភិបាលកម្ពុជា ដកបំរាមរារាំងការវិលត្រលប់របស់លោក សម រង្ស៊ី តែមិនដកបណ្តឹងនៅតុលាការ
រដ្ឋាភិបាលកម្ពុជា នៅថ្ងៃទី ១៤ មិថុនានេះ បានសម្រេចដកមកវិញ នូវបំរាម ទប់ស្កាត់ការវិលត្រលប់របស់លោក សម រង្ស៊ី មកវិញហើយ។ ការសម្រេចនេះ គឺធ្វើឡើងតាមការណែនាំរបស់លោកនាយករដ្ឋមន្ត្រី ហ៊ុន សែន។ អ្នកនាំពាក្យគណបក្សប្រឆាំង បានស្វាគមន៍ចំពោះសេចក្តីសម្រេចនេះ ប៉ុន្តែអ្នកតាមដានសភាពការណ៍នយោបាយនៅកម្ពុជា បានមើលឃើញថា នេះគឺជាយុទ្ធសាស្ត្ររុញទូកបណ្តោយទឹក ដែលមានន័យថា រដ្ឋាភិបាលចង់ដឹងថា តើលោក សម រង្ស៊ី មានភាពក្លាហានគ្រប់គ្រាន់ក្នុងការវិលត្រលប់មកកាន់ប្រទេសកម្ពុជាវិញ ដោយពុំមានការលើកលែងទោសពីព្រះមហាក្សត្រឬទេ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៦
ដំណឹងដ៏គួរឲ្យភ្ញាក់ផ្អើលនេះ បានធ្លាក់មកនៅប៉ុន្មានម៉ោងក្រោយពីលោក សម រង្ស៊ី អតីតប្រធានគណបក្សសង្គ្រោះជាតិ បានប្រកាសពីការវិលត្រលប់មកកាន់ប្រទេសកម្ពុជាវិញ ដើម្បីប្រកួតប្រជែងការបោះឆ្នោតជាតិនៅក្នុងឆ្នាំ២០១៨ខាងមុខ។ តាមរយៈបទសម្ភាសន៍ជាមួយវិទ្យុអាស៊ីសេរី កាលពីរាត្រីថ្ងៃទី១៣មិថុនា លោក សម រង្ស៊ី បានអះអាងថា លោកនឹងវិលត្រលប់មកកាន់ប្រទេសកម្ពុជាវិញភ្លាម បើរដ្ឋាភិបាលកម្ពុជាដកបំរាម រារាំងមិនឲ្យយន្តហោះដឹកអ្នកដំណើរដឹករូបលោកមកកាន់ប្រទេសកម្ពុជានោះ។ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានលើកឡើងថា ទំនងដើម្បីឆ្លើយតបទៅនឹងការប្រកាសនេះហើយ ទើបទីស្តីការគណៈរដ្ឋមន្ត្រី បានចេញសេចក្តីសម្រេចលុបចោលបំរាមរបស់ខ្លួន កាលពីថ្ងៃទី ១២ តុលា ឆ្នាំ២០១៦ ដើម្បីចង់ដឹងថា តើលោក សម រង្ស៊ី មានភាពក្លាហានឬទេ?
សូមបញ្ជាក់ថា សេចក្តីសម្រេចរបស់ទីស្តីការគណៈរដ្ឋមន្ត្រី ចុះថ្ងៃទី១៤ មិថុនានេះ គឺធ្វើឡើងទៅតាមបទបញ្ជាររបស់លោកនាយករដ្ឋមន្ត្រី ហ៊ុន សែន។
គួររំលឹកជូនថា កាលពីថ្ងៃទី ១២ តុលា ឆ្នាំ២០១៦ ទីស្តីការគណៈរដ្ឋមន្ត្រី បានចេញបំរាមទប់ស្កាត់មិនឲ្យលោក សម រង្ស៊ី ចូលមកកាន់ប្រទេសកកម្ពុជាបាននោះទេ បន្ទាប់ពីលោកបានចាកចេញពីប្រទេសកម្ពុជាកាលពីអំឡុងខែតុលាឆ្នាំ២០១។ នៅក្នុងលិខិតផ្ញើទៅកាន់លោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ កាលណោះ ទីស្តីការគណៈរដ្ឋមន្ត្រីបានបង្កើតគណៈកម្មាធិការសន្តិសុខមួយ បានស្នើឲ្យលោក សុខ ផល ចាត់គ្រប់វិធានការទប់ស្កាត់កុំឲ្យលោក សម រង្ស៊ី វិលចូលប្រទេសកម្ពុជាវិញបាន។ បំរាមកាលណោះ មាន៤ចំណុច ដែលទី១. បានបញ្ជាឲ្យគ្រប់ក្រុមហ៊ុនអាកាសចរទាំងអស់ ដែលធ្វើប្រតិបត្តិការហោះហើរមកកម្ពុជា មិនត្រូវអនុញ្ញាតឲ្យលោក សម រង្ស៊ី ឡើងជិះយន្តហោះមកកម្ពុជាទេ។ ទី២. ក្នុងករណីដែលលោក សម រង្ស៊ី ធ្វើដំណើរមកកាន់កម្ពុជា តាមរយៈយន្តហោះណាមួយ យន្តហោះនោះ នឹងត្រូវបង្វែរឲ្យវិលត្រលប់ទៅកាន់អាកាសយានដ្ឋានដើមវិញ ដោយមិនអនុញ្ញាតឲ្យចុះចតនៅកម្ពុជាឡើយ។
សូមបញ្ជាក់ថា លោក សម រង្ស៊ី អតីតប្រធានគណបក្សសង្គ្រោះជាតិ បានចាកចេញពីប្រទេសកម្ពុជា តាំងពីខែតុលាឆ្នាំ២០១៦ បានសម្រេចចិត្តលើកពេលវិលត្រលប់មកកាន់ប្រទេសកម្ពុជាវិញ កាលពីយប់ថ្ងៃទី១៦ វិច្ឆិកា បន្ទាប់ពីរដ្ឋាភិបាលកម្ពុជាបានដាក់កម្លាំងត្រៀមចាប់ខ្លួនលោកបញ្ជូនទៅកាន់ពន្ធនាគា ទៅតាមដីការបស់តុលាការក្រុងភ្នំពេញតាមរយៈបណ្តឹងរបស់លោកឧបនាយករដ្ឋមន្ត្រី ហោ ណាំហុង អតីតរដ្ឋមន្ត្រីកាបរទេសកម្ពុជា។
យ៉ាងណាក៏ដោយ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានស្វាគមន៍ចំពោះសេចក្តីសម្រេចនេះ តែបានបដិសេធមិនអត្ថាធិប្បាយច្រើនលើករណីនេះទេ។ ចំណែកអ្នកស្រាវជ្រាវពីសង្គមកម្ពុជាលោកបណ្ឌិត មាស នី បានលើកឡើងថា នេះទំនងជាយុទ្ធសាស្ត្ររុញទូកបណ្តោយទឹករបស់រដ្ឋាភិបាលកម្ពុជា។ រដ្ឋាភិបាលកម្ពុជា ដែលចង់ដឹងថា តើលោក សម រង្ស៊ី ពិតជាមានភាពក្លាហាន ដើម្បីវិលត្រលប់មកកាន់ប្រទេសកម្ពុជាវិញ ដោយពុំមានការលើកលែងទោសពីព្រះមហាក្សត្រដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ