ការប្រឡងបាក់ឌុប មួយថ្ងៃកន្លះនេះ គ្មានអ្នកសង្កេតការណ៍ណាម្នាក់រងការគំរាម ឬហិង្សានោះទេ
ការប្រឡងបាក់ឌុប មួយថ្ងៃកន្លះមកនេះ គឺមិនទាន់អ្នកសង្កេតការណ៍ណាម្នាក់រងការគំរាម ឬរងការប្រើហិង្សានោះទេ។ នេះបើតាមលោក រស់ សាលីន អ្នកនាំពាក្យរបស់ក្រសួងអប់រំយុវជននិងកីឡា។ ចំណែកនាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ក៏បានមើលឃើញភាពល្អប្រសើរនេះដែរ បើធៀបនឹងឆ្នាំមុនៗ។
ចុះផ្សាយនៅថ្ងៃ៖
ស្តាប់ - ០២:១៣
តាមរបាយការណ៍បូកសរុបពីប្រធានមណ្ឌលប្រឡងទូទាំងប្រទេស បង្ហាញថា រហូតមកទល់នឹងពេលនេះ គឺមិនទាន់មានការប្រើហិង្សា ឬការគំរាមកំហែងណាមួយ ទៅលើអ្នកសង្កេតការណ៍នោះទេ។ នេះបើតាមអ្នកនាំពាក្យក្រសួងអប់រំ ដែលបានបញ្ជាក់ប្រាប់វិទ្យុបារាំង RFI។ អ្នកសង្កេតការណ៍ស្ម័គ្រចិត្តនៅឆ្នាំនេះ គឺមានប្រមាណ ៦២០០ នាក់ ដែលបានចុះទៅគ្រប់ខេត្តក្រុង ដើម្បីតាមដាន និងសង្កេតការណ៍គ្រប់មណ្ឌលប្រឡង ទាំង១៥៧ និងត្រូវជាង៣.៧៨១បន្ទប់។
សូមបញ្ជាក់ថា កាលពីឆ្នាំដំបូងៗនៃកំណែទម្រង់ ពោលគឺក្នុងការប្រឡងបាក់ឌុប កាលពីឆ្នាំ២០១៤ និង២០១៥ គឺមានការប្រើហិង្សាខ្លះៗទៅលើអ្នកសង្កេតការណ៍ ដូចជា ការប្រើពាក្យសម្តីមិនសមរម្យ ការជិះម៉ូតូប្រុងបុក រហូតដល់ការស្ទុះវ៉ៃយ៉ាងកម្រោល និងចាក់អ្នកសង្កេតការណ៍នឹងប៊ិក ដែលបណ្តាលឲ្យរបួសជាដើម។ ក៏ប៉ុន្តែសម្រាប់ឆ្នាំទី៣នៃកំណែទម្រង់សម័យប្រឡងបាក់ឌុបនេះ ត្រូវបានគេមើលឃើញថា មានភាពល្អប្រសើរច្រើន គឺចាប់តាំងពីដំណាក់កាលត្រៀម ការចែកចាយធុងវិញ្ញាសា និងការបិទឈ្មោះបេក្ខជន ព្រមទាំងការសម្របសម្រួលពីសំណាក់ក្រសួងក្នុងការទទួលបណ្ដឹង សំណួរ និងសំណូមពរផ្សេងៗ។ ចំណែកការជួយសម្រួលផ្នែកសង្គ្រោះបឋមក៏បានរៀបចំបានល្អគួរសម និងទាន់ពេលវេលាផងដែរ។
ទន្ទឹមនឹងនេះ គេសង្កេតឃើញថា បេក្ខជនមានរបៀបរៀបរាយរយជាងមុន និងមានភាពស្វាហាប់ រហូតដល់អ្នកខ្លះ ឈឺបន្តោងសឺរ៉ូមទៅហើយ ក៏នៅតែតស៊ូទៅប្រឡងដែរ។ មិនតែប៉ុណ្ណោះ នៅក្នុងការប្រឡងបាក់ឌុបឆ្នាំនេះ គឺបេក្ខជន ជាជនពិការ ក៏ឃើញថា បានចូលរួមប្រឡងនៅឆ្នាំនេះ ច្រើនទៀតផង។
ក្រៅពីសាទរដំណឹងល្អៗទាំងនេះ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា ចំពោះអ្នកប្រឡងដែលជាជនពិការ គួរតែត្រូវបានលើកទឹកចិត្តនិងសម្រួលលក្ខណៈបន្ថែមទៀតសម្រាប់ពួកគេ។
ជាការកត់សម្គាល់ ចំពោះវិញ្ញាសារប្រឡងវិញ បេក្ខជនខ្លះដែលប្រឡងនៅភ្នំពេញ បានប្រាប់វិទ្យុបារាំងថា វិញ្ញាសារប្រឡងបាក់ឌុបនៅឆ្នាំនេះ គឺមានភាពងាយស្រួលច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ