ក្នុងជម្លោះជាមួយប្រធានរដ្ឋសភា លោកអ៊ុំ សំអានអាចប្រឈមនីតិវិធីរដ្ឋបាល និងតាមផ្លូវតុលាការ
ក្រុមអ្នកច្បាប់របស់រដ្ឋសភានៅថ្ងៃអង្គារនេះ បានបញ្ចប់ការសិក្សាលើករណីលោកអ៊ុំ សំអាន សមាជិកសភាគណបក្សសង្គ្រោះជាតិហើយ។ ជាការសិក្សាដែលបានរកឃើញថាសមាជិកសភាគណបក្សសង្គ្រោះជាតិ បានរំលោភលើបទបញ្ជាផ្ទៃក្នុងរបស់រដ្ឋសភា ដែលនឹងអាចប្រឈមនឹងទណ្ឌកម្មផ្នែករដ្ឋបាលរបស់សភា និងផ្លូវតុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
លោកអ៊ុំ សំអានសមាជិកសភាគណបក្សសង្គ្រោះជាតិ អាចប្រឈមនឹងការដាក់ទោសទណ្ឌតាមបែបរដ្ឋបាលរបស់រដ្ឋសភា និងតាមផ្លូវតុលាការតាមក្រមព្រហ្មទណ្ឌ។ អ្នកនាំពាក្យរដ្ឋភា លោកឈាង វុន បានបញ្ជាក់ថា វិធានការដែលប្រឆាំងនឹងលោកអ៊ុំ សំអាននេះ គឺបន្ទាប់ពីក្រុមអ្នកច្បាប់រដ្ឋសភា បានបញ្ចប់ការអង្កេត ហើយរកឃើញពីកំហុសធ្ងន់ធ្ងរដែលលោកអ៊ុំ សំអាន បានប្រមាថលើលោកហេង សំរិន ប្រធានរដ្ឋសភា។ លោកហេង សំរិនដែលត្រូវបានបក្សប្រឆាំងចោទថា បានរំលោភមាត្រា៩៦ និង១៥០ថ្មី ទាក់ទងនឹងសំណើរពីសមាជិកសភាគណបក្សប្រឆាំងកាលពីសប្តាហ៍មុន។ ប៉ុន្តែលោក អ៊ុំ សំអាន បានបដិសេធ ហើយថាលោកមិនមានការព្រួយបារម្ភអ្វីនោះទេ។
អ្នកនាំពាក្យសភាជាតិលោក ឈាង វុនដដែល បានបញ្ជាក់ថា ក្នុងឋានៈជាប្រធានរដ្ឋសភា លោកហេង សំរិនមិនអាចត្រូវបានគេប្រមាថមើលងាយនោះទេ។ ដូចនេះ គណៈអចិន្ត្រៃយ៍របស់រដ្ឋសភា នឹងបើកកិច្ចប្រជុំនៅក្នុងសប្តាហ៍នេះផ្ទាល់តែម្តងដើម្បីពិភាក្សាពីករណីរបស់លោក អុំ សំអាន តាមនីតិវិធីរដ្ឋបាលរបស់សភា ដោយឡែកតាមផ្លូវតុលាការវិញប្រធានសភា លោកហេង សំរិនខ្លួន ឬសមាជិកសភាណាម្នាក់ អាចប្តឹងលោក អ៊ុំ សំអានទៅតុលាការតាមក្រមព្រហ្មទណ្ឌមាត្រា៣០៥ ។
សូមរំលឹកថា ជម្លោះរវាងលោកហេង សំរិន នឹងលោក អ៊ុំ សំអាន បានកើតឡើងបន្ទាប់ពីលោកហេង សំរិន មិនបានបញ្ជូនលិខិតរបស់តំណាងរាស្ត្រគណបក្សប្រឆាំងទៅកាន់រដ្ឋាភិបាលស្តីពីការស្នើផ្អាកការបោះបង្គោលព្រំដែនរវាងកម្ពុជា និងវៀតណាមដែលកំពុងចម្រូងចម្រាស់។ លោកអ៊ុំ សំអាន បានបន្ថែមថា គ្មានប្រការណាមួយក្នុងបទបញ្ជាផ្ទៃក្នុងរបស់រដ្ឋសភាដែលហាមមិនឱ្យប្រធានសភាមិនបញ្ជូនលិខិតទៅកាន់រដ្ឋាភិបាលនោះទេ។ ការមិនបញ្ជូននេះ គឺការរំលោភសិទ្ធតំណាងរាស្ត្រដែលជាអ្នកតំណាងប្រជាពលរដ្ឋ។ ក្នុងជម្លោះដដែលនេះ លោក ឈាង វុន បានស្នើឱ្យលោកអ៊ុំ សំអាន សម្របសម្រួលជាមួយប្រធានរដ្ឋសភា។
លោក អ៊ុំ សំអាន បានលើកឡើងថា លោកហេង សំរិនក្នុងរយៈពេលកាន់អំណាចជាប្រធានរដ្ឋសភាក្នុង២អាណត្តិនេះ លិខិតមិនតិច៤រយ មិនបានបញ្ជូនទៅកាន់រដ្ឋាភិបាលតាមសំណើររបស់សមាជិកសភា។ យ៉ាងណាក៏ដោយ លោក អ៊ុំ សំអានអះអាងសមាជិកសភាគណបក្សប្រឆាំងនៅមិនទាន់ស្រុះស្រួលគ្នាលើសំណើរប្តឹងប្រធានរដ្ឋសភាលោកហេង សំរិន ទៅកាន់ក្រុមប្រឹក្សាធម្មនុញ្ញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ