រដ្ឋមន្ដ្រីក្រសួងអប់រំចង់បានមហាវិទ្យាល័យច្រើន គុណភាពល្អប្រសើរ ហើយមានតម្លៃទាប
តើក្រសួងអប់រំនឹងមានចំណាត់ការតឹងរ៉ឹងដើម្បីពង្រឹងគុណភាពការសិក្សាកម្រិតឧត្តម ដូចការរឹតបន្ដឹងការប្រឡងបាក់ឌុបដែរឬទេ? នេះគឺជាសំណួររបស់អ្នកចូលរួមម្នាក់នៅក្នុងវេទិកាអប់រំ ទៅកាន់លោកហង់ ជួនណារ៉ុន រដ្ឋមន្ដ្រីក្រសួងអប់រំនិងកីឡា នាថ្ងៃទី២៧តុលា។ វាក៏ទំនងជាសំណួរដែលពលរដ្ឋខ្មែរជាច្រើនចង់បានចម្លើយដែរ បន្ទាប់ពីលោក ហង់ ជួនណារ៉ុន ទទួលបានជោគជ័យចំពោះកំណែទម្រង់ការប្រឡងបាក់ឌុប តាំងពីលោកឡើងកាន់តំណែងនៅឆ្នាំ២០១៣មក។ ជាការឆ្លើយតប លោក ហង់ ជួនណារ៉ុន ពន្យល់ថា ដើម្បីពង្រឹងគុណភាពនៅថ្នាក់ឧត្តមសិក្សា កម្ពុជាត្រូវការមហាវិទ្យាល័យច្រើនជាងសព្វថ្ងៃនេះ ដែលមានគុណភាពប្រសើរជាងនេះ ហើយមានតម្លៃទាប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ដើម្បីពង្រឹងគុណភាពការសិក្សានៅថ្នាក់ឧត្តម គេត្រូវប្រើយុទ្ធសាស្ត្រផ្សេងពីការពង្រឹងគុណភាពនៅថ្នាក់មធ្យមសិក្សា។ នេះគឺជាការអះអាងរបស់លោក ហង់ ជួនណារ៉ុន នៅក្នុងវេទិកាអប់រំស្ដីពី កិច្ចសហប្រតិបត្តិការវិស័យសាធារណៈនិងឯកជន ដើម្បីការអប់រំប្រកបដោយគុណភាព នាថ្ងៃទី២៧តុលា។
ការរឹតបន្ដឹងការប្រឡងបាក់ឌុបនាពេលកន្លងមក សម្រាប់លោករដ្ឋមន្ដ្រី គឺជាការបោះជំហានមួយដ៏សំខាន់ឆ្ពោះទៅកាន់គុណភាពប្រសើរជាងមុននៃការសិក្សានៅក្នុងកម្រិតឧត្តមរួចទៅហើយ។ ហេតុអ្វី? ព្រោះចេញពីវិទ្យាល័យ សិស្សានុសិស្សបានបណ្ដុះទម្លាប់ខិតខំប្រឹងប្រែងរៀនសូត្រ ដើម្បីប្រឡងជាប់បាក់ឌុប។ ហើយលោក ហង់ ជួនណារ៉ុន ជឿថា ទម្លាប់នេះនឹងស្ថិតនៅជាប់ជាមួយសិស្សានុសិស្សរហូតដល់ពួកគេចូលរៀននៅមហាវិទ្យាល័យ។
យ៉ាងណាក៏ដោយ ទម្លាប់តស៊ូប្រឹងប្រែងរៀនសូត្ររបស់សិស្សតែម្យ៉ាង មិនអាចធ្វើឲ្យគុណភាពការអប់រំនៅកម្រិតឧត្តមសិក្សាប្រសើរជាងមុនឡើយ។ បើតាមលោករដ្ឋមន្ដ្រី កម្ពុជាត្រូវការសាស្ត្រាចារ្យដែលមានគុណភាពបន្ថែមទៀត។ ក្រៅពីនេះ លោកថា កម្ពុជាត្រូវការសកលវិទ្យាល័យច្រើនជាងសព្វថ្ងៃនេះ ដែលមានគុណភាពប្រសើរជាងនេះ ហើយមានតម្លៃទាប។ លោក ហង់ ជួនណារ៉ុន ក៏ចង់បង្កើតសកលវិទ្យាល័យនៅតាមបណ្ដាខេត្តឲ្យបានច្រើនផងដែរ ដើម្បីឲ្យពលរដ្ឋគ្រប់ៗរូបមានឱកាសសិក្សារៀនសូត្រខ្ពង់ខ្ពស់។ ការសិក្សាខ្ពង់ខ្ពស់ ដែលបើតាមលោក ហង់ ជួនណារ៉ុន គឺមានន័យថា អនាគតប្រសើរជាងមុន។
យ៉ាងណាក៏ដោយ បំណងចង់បានសកលវិទ្យាល័យច្រើន ដែលមានគុណភាពប្រសើរ និងតម្លៃទាប ទំនងជាពិបាកទៅរួចណាស់។ ពិបាកទៅរួច ព្រោះជាសត្យានុម័ត បើកាលណាតម្លៃទាប ចំណេះដឹងដែលផ្ដល់ឲ្យសិស្សក៏តិចទៅតាមនោះដែរ។ នៅចំពោះមុខបញ្ហាប្រឈមនេះ លោករដ្ឋមន្ដ្រីក្រសួងអប់រំ សង្ឃឹមថានឹងអាចពិភាក្សាជាមួយភាគីពាក់ព័ន្ធ ជាពិសេសវិស័យឯកជន និងអង្គការក្រៅរដ្ឋាភិបាល បន្ថែមទៀត ដើម្បីស្វែងរកដំណោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ