គ្រូបង្រៀនទាមទារប្រាក់ខែគោល ១លាន៥សែន ខណៈដែលរដ្ឋាភិបាលអាចផ្តល់បាន ៩៥ម៉ឺន
នៅថ្ងៃទី ៥ តុលានេះ សមាគមគ្រូបង្រៀនកម្ពុជាឯករាជ្យ បានរៀបចំប្រារព្ឋទិវាគ្រូបង្រៀនពិភពលោកនៅទីលានប្រជាធិបតេយ្យ ក្នុងទីក្រុងភ្នំពេញក្រោមប្រធានបទការផ្តល់តម្លៃជូនគ្រូបង្រៀន និងការពង្រឹងកម្រិតស្ថានភាពនៃគ្រូបង្រៀន។ សមាគមគ្រូបង្រៀន បានទាមទារដំឡើងប្រាក់ឈ្នួលអប្បរមាគោលសម្រាប់ឆ្នាំ ២០១៧ខាងមុខ។ ក្រៅពីនេះ សមាគមគ្រូបង្រៀនបានទាមទារដំឡើងប្រាក់អត្ថប្រយោជន៍ផ្សេងទៀត ដើម្បីពង្រឹងជីវភាពគ្រូបង្រៀន។
ចុះផ្សាយនៅថ្ងៃ៖
ក្នុងញត្តិផ្ញើជូនរដ្ឋសភា រដ្ឋាភិបាល សមាគមគ្រូបង្រៀនបានទាមទារប្រាក់បៀវត្សអប្បបរមា ១លាន៥សែន សម្រាប់ឆ្នាំ២០១៧ ខណៈដែលរដ្ឋាភិបាលមានលទ្ធភាពផ្តល់ត្រឹមតែ ៩៥ម៉ឺនតែប៉ុណ្ណោះ។ អ្នកស្រី អ៊ុក ឆាយាវី ប្រធានស្តីទីសមាគមគ្រូបង្រៀនកម្ពុជាឯករាជ្យ បានអះអាងថា ការទាមទារនេះ គឺដើម្បីអាចឱ្យគ្រូបង្រៀននៅកម្ពុជាទាំងអស់អាចរស់នៅបានសមរម្យ ហើយគ្រូបង្រៀនក៏អាចបង្កើនប្រសិទ្ធភាពការងាររបស់ខ្លួនផងដែរ។
ក្រៅពីប្រាក់បៀវត្សគោល សមាគមគ្រូបង្រៀន បានទាមទារប្រាក់អត្ថប្រយោជន៍មួយចំនួនទៀតដល់លោកគ្រូអ្នកគ្រូផងដែរដូចជា ប្រាក់ឧបត្ថម្តកូន ៤ម៉ឺនរៀល ប្រាក់សម្រាប់ប្រពន្ធ ៥ម៉ឹនរៀល ប្រាក់សុខភាព ៦ម៉ឺន ប្រាក់សម្រាប់ពិធីបុណ្យជាតិនីមួយៗ ១៥ម៉ឺនក្នុងមួយរដូវ និងប្រាក់បង្រៀនថែមម៉ោងមួយចំនួនទៀត។
ក្រសួងអប់រំយុវជន និងកីឡា បានគាំទ្រចំពោះការទាមទារនេះប៉ុន្តែការដំឡើងទាំងអស់ត្រូវការពេលវេលា ហើយក៏ត្រូវផ្គូរផ្គងនឹងកំណើនសេដ្ឋកិច្ចរបស់កម្ពុជាផងដែរ។ លោក រស់ សាលីន អ្នកនាំពាក្យក្រសួងអប់រំបាន អត្ថាធិប្បាយថា ក្នុងរយៈពេល ៣ឆ្នាំមកនេះ ក្រសួងបានដំឡើងប្រាក់បៀវត្សចំនួន ៤ដង ហើយឆ្នាំ ២០១៧ខាងមុខនេះ រដ្ឋាភិបាលនឹងដំឡើងប្រាក់បៀវត្សដល់គ្រូបង្រៀនយ៉ាងតិចបំផុត ៩៥ម៉ឺនដោយមិនទាន់បូកនឹងអត្ថប្រយោជន៍ផ្សេងៗដែលបានមកពីការបង្រៀនលើសម៉ោង ការបង្រៀនគួរថ្នាក់ និងការបង្រៀនពីរវេននោះទេ។
បច្ចុប្បន្ននេះ គ្រូបង្រៀនថ្មីម្នាក់នៅកម្រិតបឋមសិក្សា ដែលទើបចេញពីសាលាទទួលបានប្រាក់បៀវត្សសុទ្ធចំនួន ៨០ម៉ឺន ៥រយរៀល។ ចំនួននេះត្រូវបានដំឡើងពីប្រមាណជាង ៤៦ម៉ឺនកាលពីមុនឆ្នាំ២០១៣។ ក្រៅពីការទាមទារស្តីពីប្រាក់បៀវត្ស និងអត្ថប្រយោជន៍មួយចំនួននោះ សមាគមន៍គ្រូបង្រៀន បានទាមទារឱ្យរដ្ឋាភិបាលត្រូវផ្តល់ការបណ្តុះបណ្តាលបន្ថែម និងផ្គត់ផ្គង់សម្ភារៈសិក្សាទៅដល់សាលានៅតំបន់ដាច់ស្រយាល និងការគោរពសិទ្ធិស្តីពីការបង្កើតសមាគម រួមទាំងការទប់ស្កាត់អំពើពុករលួយនៅតាមស្ថាប័នសិក្សាផងដែរ។
យ៉ាងណាក៏ដោយ ដើម្បីឆ្លើយតបទៅនឹងការទាមទាររបស់គ្រូបង្រៀន ក្រសួងអប់រំបានស្នើសុំថវិកាជាតិប្រមាណ ៥៩០លានដុល្លារអាមេរិកសម្រាប់ឆ្នាំ ២០១៧ ដើម្បីបំពេញសេចក្តីត្រូវការរបស់គ្រូបង្រៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ