ក្រុមប្រឹក្សាធម្មនុញ្ញជំនុំជម្រះបណ្តឹងសុំលុបជនបរទេសជិត ៦០០ នាក់
ក្រុមប្រឹក្សាធម្មនុញ្ញនៅថ្ងៃទី ៣០ មករានេះ បានផ្តើមបើកសវនាការជាសាធារណៈលើបណ្តឹងរបស់គណបក្សសង្គ្រោះជាតិបន្ទាប់ពីមិនសះជាក្នុងកម្រិតគណៈកម្មាធិការជាតិរៀបចំការបោះឆ្នោត។ សវនាការជាសាធារណៈនេះនឹងធ្វើឡើងរយៈពេលបីថ្ងៃចាប់ពីថ្ងៃទី ៣០ មកការរហូតដល់ថ្ងៃទី ១ កុម្ភៈ។ គិតត្រឹមថ្ងៃ ៣០ មករានេះ ក្រុមប្រឹក្សាធម្មនុញ្ញ បានសម្រេចរក្សាឈ្មោះជនប្រទេសជាង ៧០ ឱ្យនៅក្នុងបញ្ជីដដែល។
ចុះផ្សាយនៅថ្ងៃ៖
ស្តាប់ - ០២:០០
មានសំណុំរឿងចំនួន ១១ ដែលក្រុមប្រឹក្សាធម្មនុញ្ញនឹងដោះស្រាយក្នុងរយៈពេលបីថ្ងៃ។ ជាបណ្តឹង ដែលភាគច្រើនបំផុត ជំទាស់ការមានឈ្មោះក្នុងបញ្ជីបោះឆ្នោតនៃក្រុមមនុស្សប្រមាណជិត ៦រយនាក់ (៥៨៧) ដែលបក្សសង្គ្រោះជាតិថាជាជនជាតិវៀតណាម។ ក្រៅពីនេះ មានបណ្តឹង ២ ឬ ៣ប៉ុណ្ណោះជាបណ្តឹងស្តីពីភាពមិនប្រក្រតីនៃលំនៅដ្ឋាន និងថ្ងៃខែឆ្នាំកំណើត។ នៅថ្ងៃទី ៣០ មករានេះ ក្រុមប្រឹក្សាធម្មនុញ្ញ បានបើកសំណុំរឿងចំនួនពីរ គឺសំណុំរឿង លេខ ២៦៣ និង ២៦៤ ដែលសុទ្ធតែស្នើឱ្យលុបឈ្មោះជនជាតិវៀតណាមចំនួន ៧៦នាក់ នៅខេត្តព្រះសីហនុ។ ជាលទ្ធផល ក្រុមប្រឹក្សាធម្មនុញ្ញបានសម្រេចតម្កល់ការសម្រេចរបស់គ.ជ.ប និងថ្នាក់ឃុំ គឺបន្តរក្សាឈ្មោះមនុស្សទាំង ៧៦ រូបនេះ ក្នុងបញ្ជីបោះឆ្នោតថ្មីដដែល។
ក្រុមប្រឹក្សាធម្មនុញ្ញ ដែលជាស្ថាប័នដោះស្រាយបណ្តឹងចុងក្រោយស្តីពីការបោះឆ្នោត បានសំអាងហេតុផលលើការកាន់អត្តសញ្ញាណបណ្ណ ដែលបុគ្គលទាំងនោះមាន។ ហើយបានសារភាពថាខ្លួនគ្មានសមត្ថកិច្ចទៅបញ្ជាក់ពីភាពស្របច្បាប់ ឬទុច្ចរិតភាព នៃអត្តសញ្ញាណបណ្ណនោះឡើយ។
លោកស្រីម៉េង សុភារី ប្រធាននាយកដ្ឋាននីតិកម្ម និងការបោះឆ្នោតរបស់គណបក្សសង្គ្រោះជាតិ បានបង្ហាញពីសុទិដ្ឋិនិយមតិចតួចបំផុតសម្រាប់ការប្តឹងក្នុងសវនាការ ៣ថ្ងៃនេះ។ យ៉ាងណាក៏ដោយ លោកស្រី បានបន្ថែមថា អ្វីដែលបក្សប្រឆាំងបានប្តឹងពីក្រោមឡើងមកលើនេះ គឺដើម្បីបង្ហាញការមិនពេញចិត្តចំពោះរដ្ឋាភិបាលជាពិសេសក្រសួងមហាផ្ទៃ ក៏ដូចជាអាជ្ញាធរមូលដ្ឋាន ដែលផ្តល់អត្តសញ្ញាណបណ្ណដល់ជនបរទេសដោយគ្មានតម្លាភាព និងប្រកបដោយអំពើពុករលួយ។
សូមបញ្ជាក់ថា សម្រាប់ថ្ងៃទី ៣១ មករា និងថ្ងៃទី ១ កុម្ភៈ ក្រុមប្រឹក្សាធម្មនុញ្ញនឹងបើកសវនាការលើសំណុំរឿង ចំនួន ៩ផ្សេងទៀត ដែលមានជនបរទេសចំនួន ៥១១នាក់ នៅក្នុងរាជធានីភ្នំពេញ ដែលត្រូវស្នើសុំលុបឈ្មោះចេញពីបញ្ជីបោះឆ្នោតថ្មី។ បញ្ជីបោះឆ្នោតថ្មី ដែលនឹងត្រូវយកទៅប្រើប្រាស់សម្រាប់ការបោះឆ្នោតក្រុមប្រឹក្សាឃុំសង្កាត់ ឆ្នាំ២០១៧ដែលនឹងត្រូវធ្វើឡើងនៅដើមខែមិថុនាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ