៦ខែឆ្នាំ២០១៦កម្ពុជាបណ្ដេញជនអន្តោប្រវេសន៍ជាង២០០០នាក់
គិតត្រឹមខែមិថុនាឆ្នាំ២០១៦នេះ អាជ្ញាធរកម្ពុជាបានបណ្ដេញជនអន្តោប្រវេសន៍ជាង២.០៦៩ នាក់ ដែលមាន១២សញ្ជាតិ។ ក្នុងនោះជនជាតិវៀតណាមនាំមុខគេដែលត្រូវបានអាជ្ញាធរបណ្ដេញចេញ។ បន្ទាប់មកចិនដីគោក ចិនតៃវ៉ាន់ នីហ្សេរីយ៉ា និង ហ្វីលីពីនជាដើម។ មូលហេតុនៃការបណ្ដេញចេញដោយសារពួកគេលួចស្នាក់ដោយខុសច្បាប់ ហួសទិដ្ឋាការ និង ប្រព្រឹត្តបទល្មើស។ តាមមន្ត្រីឲ្យដឹងថា ជនអន្តោប្រវេសន៍ជាង២០០០នាក់នេះមិនអាចចូលកម្ពុជាវិញបានទេ។
ចុះផ្សាយនៅថ្ងៃ៖
ស្តាប់ - ០២:១៨
លោក អ៊ុក ហៃសិលា ប្រធានផ្នែកស៊ើបអង្កេត និងអនុវត្តនីតិវិធី នៃអគ្គនាយកដ្ឋាន អន្តោប្រវេសន៍ក្រសួងមហាផ្ទៃបានប្រាប់វិទ្យុបារាំងថា រយៈពេល៦ខែក្នុងឆ្នាំ២០១៦នេះការបណ្ដេញជនអន្តោប្រវេសន៍មានការកើនឡើងគួរឲ្យកត់សម្គាល់បើប្រៀបធៀបរយៈពេលដូចគ្នាកាលពីឆ្នាំទៅមិញ។
ក្នុងចំណោមជនអន្តោប្រវេសន៍ជាង២.០០០នាក់ និង ១២សញ្ជាតិដែលអាជ្ញាធរកម្ពុជាបណ្ដេញ នេះគឺ ៨០ភាគរយនៃជនជាតិវៀតណាមមានចំនួន១៩០០នាក់ត្រូវបានបញ្ជូនចេញ។ ចំនួននេះ ត្រូវបានចាត់ទុកថា ជនជាតិវៀតណាមនាំមុខគេក្នុងការរស់នៅដោយខុសច្បាប់នៅកម្ពុជា។ បន្ទាប់មកចិនតៃវ៉ាន់ និង ចិនដីគោកជាច្រើនរយនាក់ត្រូវបានបញ្ជូនចេញបន្ទាប់ពួកគេបានប្រព្រឹត្តបទល្មើសមួយចំនួនដូចជាជំរិតទារប្រាក់តាមប្រព័ន្ធអ៊ិនធើណេត និង ជួញដូរគ្រឿងញៀនជាដើម។ ក្រៅពីនេះជនជាតិផ្សេងទៀតស្ថិតនៅក្នុងតួលេខបន្ទាប់បន្សំមានដូចជាៈ ហ្វីលីពីន នីហ្សេរីយ៉ា កូរ៉េ ជាដើម។
លោក អ៊ុក ហៃសិលា ឲ្យដឹងទៀតថា ជនបរទេសមួយចំនួនភាគច្រើនជាអឺរ៉ុបដែលមានបញ្ហាស្មារតីក៏ត្រូវបានបញ្ជូនចេញផងដែរព្រោះថាពួកគេទាំងនេះធ្វើឲ្យខូចខាតសណ្ដាប់ធ្នាប់សង្គម។យ៉ាងណាក៏ដោយក្រោយការបណ្ដេញចេញជនអន្តោប្រវេសន៍ជាង២០០០នាក់នេះនឹងមិនអាចត្រលប់មកកម្ពុជាជាថ្មីទៀតបានទេ។ ត្រលប់មកវិញបានលុះត្រាតែមានលិខិតឆ្លងដែនគឺពួកគេអាចចូលមកកម្ពុជាបានក្នុងរយៈពេល៦ខែទៅមួយឆ្នាំ។ ហើយចំពោះអ្នកប្រព្រឹត្តបទឧក្រិដ្ឋធ្ងន់ធ្ងរមិនអាចចូលកម្ពុជាបានទេរហូតដល់ទៅបីឆ្នាំ។
លោក អ៊ុក ហៃសិលា បានថ្លែងការពារថា មិនមែនអាជ្ញាធរកម្ពុជាបណ្ដែតបណ្ដោយឲ្យជនអន្តោប្រវេសន៍ហូរចូលដោយសេរីនោះទេ ខណៈតួលេខនៃការបណ្ដេញចេញមានការកើនឡើង។ ដោយសារតែបែបនេះហើយទើបអគ្គនាយកដ្ឋានរបស់លោកចុះធ្វើការត្រួតពិនិត្យនិងឃាត់ខ្លួនបានរាល់ថ្ងៃចំពោះជនបរទេសលួចស្នាក់នៅនិងធ្វើការដោយខុសច្បាប់នៅកម្ពុជា។
ប្រឈមបញ្ហានេះ លោក អ៊ុក ហៃសិលា បានអំពាវនាវទៅប្រជាពលរដ្ឋកម្ពុជារាយការណ៍ទៅអគ្គនាយកដ្ឋាន អន្តោប្រវេសន៍ ប្រសិនបើសង្ស័យថា មានជនបរទេសកំពុងលួចរស់នៅដោយខុសច្បាប់។ សូមបញ្ជាក់ថា នីតិវិធីនៃការបណ្ដេញជនអន្តោប្រវេសន៍ចេញធ្វើឡើងបន្ទាប់ពីអាជ្ញាធរឃាត់ខ្លួនហើយគឺនៅចន្លោះពេលមួយសប្ដាហ៍ទៅពីរសប្ដាហ៍ក្រោយការសាកសួរនិងរាយការណ៍ទៅកាន់ស្ថានទូតរបស់ពួកគេដើម្បីឲ្យចេញលិខិតអនុញ្ញត្តរួចហើយបញ្ជូនពួកគេចេញតែម្ដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ