ដំរីព្រៃ១១ក្បាលធ្លាក់ចូលក្នុងរណ្ដៅនៅខេត្តមណ្ឌលគិរី ត្រូវបានជួយសង្គ្រោះដោយសុវត្ថិភាព
ដំរីព្រៃចំនួន១១ក្បាល ដែលបានធ្លាក់ចូលទៅក្នុងរណ្ដៅនៅស្រុកកែវសីមា ខេត្តមណ្ឌលគិរី នាថ្ងៃសៅរ៍ ទី២៥មីនានេះ ត្រូវបានជួយសង្គ្រោះប្រកបដោយសុវត្ថិភាព។ ប្រតិបត្តិការជួយសង្គ្រោះនេះ ត្រូវចំណាយពេលអស់ជាង៥ម៉ោង ក្រោមការជួយជ្រោមជ្រែងពីមន្ទីរបរិស្ថានខេត្ត មន្ដ្រីអង្គការអភិរក្សសត្វព្រៃ និងប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០១:៤៩
ប្រតិបត្តិការជួយសង្គ្រោះដំរីព្រៃទាំង១១ក្បាល ដែលធ្លាក់ចូលទៅក្នុងរណ្ដៅភក់នាថ្ងៃសៅរ៍នេះ ចំណាយពេលប្រមាណ៥ម៉ោង ដោយមានការចូលរួមពីមន្ទីរបរិស្ថានខេត្តមណ្ឌលគិរី មន្ដ្រីអង្គការអភិរក្សសត្វព្រៃ ឧទ្យានុរក្ស និងប្រជាពលរដ្ឋមួយចំនួនទៀត។
គួរជម្រាបថា ការធ្លាក់ចូលទៅក្នុងរណ្ដៅភក់របស់សត្វដំរីព្រៃមួយហ្វូងនេះ កើតឡើងនាវេលាម៉ោងប្រមាណ១១ព្រឹកថ្ងៃទី២៥មីនា នៅភូមិអូរអាម ឃុំស្រែខ្ទម ស្រុកកែវសីមា ខេត្តមណ្ឌលគិរី។ ជាទីដែលសត្វដំរីទាំងនោះរស់នៅ។ បើតាមលោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី សត្វដំរីទាំងនោះទំនងជាចេញពីព្រៃដើម្បីដើររកស៊ី ហើយចៃដន់ធ្លាក់ទៅក្នុងរណ្ដៅភក់ដែលសល់ពីសង្គ្រាមជម្រៅ៣ម៉ែត្រនោះតែម្ដង។
ប្រធានមន្ទីរបរិស្ថានខេត្តមណ្ឌលគិរី លោក កែវ សុភគ៌ ឲ្យដឹងថា នៅក្នុងប្រតិបត្តិការជួយសង្គ្រោះសត្វដំរីទាំង១១ក្បាលនេះ អាជ្ញាធរបានជួបការលំបាកនិងចំណាយពេលច្រើន។ នោះក៏ព្រោះតែទីតាំងរណ្ដៅដែលដំរីធ្លាក់ចូលទៅនោះ ស្ថិតនៅក្នុងព្រៃ ដែលមានស្ថានភាពមិនអំណោយផលដល់ការបើកយានយន្តចូលទៅភ្លាមៗបាន។ ដើម្បីជួយសង្គ្រោះដំរីមួយហ្វូងនេះ មន្ដ្រីឧទ្យាននុរក្ស រួមទាំងប្រជាពលរដ្ឋ ត្រូវវេចស្ពាយសម្ភារៈសង្គ្រោះ ហើយធ្វើដំណើរដោយថ្មើរជើងចូលទៅកាន់ទីតាំងកើតហេតុ។ ការជួយសង្គ្រោះធ្វើឡើងដោយកាប់ដីធ្វើជម្រាល និងកាប់មែកឈើទម្លាក់ចូលទៅក្នុងរណ្ដៅភក់ដើម្បីឲ្យដំរីតោងឡើងបាន។
ចំណាយពេលជាង៥ម៉ោង នៅទីបំផុត ដំរីព្រៃទាំងមេទាំងកូនសរុប១១ក្បាល ត្រូវបានជួយសង្គ្រោះចេញពីរណ្ដៅជម្រៅ៣ម៉ែត្រដោយសុវត្ថិភាព ហើយត្រូវព្រលែងឲ្យចូលព្រៃវិញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ