ការសិក្សា៖សត្វខ្លារខិនកំពុងប្រឈមនឹងភាពផុតពូជក្នុងលោក
ការសិក្សាមួយចុះផ្សាយដោយទស្សនាវដ្តីវិទ្យាសាស្រ្តអាមរិកាំងឈ្មោះ Proceeding of the National Academy of Sciences បានឲ្យដឹងថា ខ្លារខិនដែលជាសត្វជើង ៤ រត់លើដីលឿនជាងគេក្នុងលោកកំពុងឈានទៅរកភាពផុតពូជហើយ។ នៅក្នុងន័យនេះ ទស្សនាវដ្តីបានអំពាវនាវសហភាពអន្តរជាតិដើម្បីអភិរក្សធម្មជាតិឲ្យដកសត្វខ្លារខិនចេញពីប្រភេទសត្វដែលងាយរងគ្រោះថ្នាក់ទៅជាប្រភេទសត្វដែលកំពុងជួបគ្រោះថ្នាក់វិញ។ កម្មវត្ថុ គឺដើម្បីទប់ស្កាត់ការវិនាសផុតពូជរបស់ខ្លារខិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
បច្ចុប្បន្ននៅទូទាំងពិភពលោក នៅមានវត្តមានសត្វខ្លារខិនស្ថិតក្នុងសេរីភាពពេញលេញមិនដល់ ៧ ១០០ក្បាលផង និងដែលមាន ៩៩% កំពុងរស់នៅលើទឹកដីអាហ្រ្វិក។ ទន្ទឹមគ្នានេះ ទីធ្លាដែលសត្វជើង ៤មួយនេះកំពុងរស់នៅក៏មានទំហំកាន់តែតូចទៅៗដែរ ពោលនៅសល់តែជាង ៩% ប៉ុណ្ណោះ។ តួលេខនៃវត្តមានសត្វខ្លារខិនចុះផ្សាយដោយទស្សនាវដ្តីអាមេរិកពេលនេះបានធ្លាក់ចុះច្រើន បើធៀបនឹងតួលេខចុះផ្សាយដោយក្រុមហ៊ុនសត្តវិទ្យាក្នុងប្រទេសអង់គ្លេសកាលពីពេលថ្មីៗកន្លងទៅដែលថា ចំនួនខ្លារខិនមានប្រមាណជា ១០០ ០០០ក្បាលនៅទូទាំងពិភពលោកនាដើមសតវត្សទី២០។
ក្រុមហ៊ុនសត្តវិទ្យាក្នុងប្រទេសអង់គ្លេសដដែលបានបញ្ជាក់នៅក្នុងសេចក្តីជូនដំណឹងថា ខ្លារខិនដែលជាសត្វជើង ៤ រត់លើដីលឿនជាងគេក្នុងលោកអាចនឹងផុតពូជឆាប់រហ័ស ប្រសិនបើគ្មានវិធានការទប់ស្កាត់ទេនោះ។ ទាក់ទងនឹងពូជខ្លារខិនអាស៊ី គេឃើញមាននៅសល់ចំនួន ៤៣ក្បាលនៅក្នុងប្រទេសអ៊ីរ៉ង់។ នៅក្នុងប្រទេសអាហ្រ្វិកស៊ីមបាវ៉េ ចំនួនខ្លារខិនបានធ្លាក់ចុះពី ១ ២០០ក្បាលមកនៅត្រឹម ១៧០ក្បាលប៉ុណ្ណោះក្នុងរយៈពេល ១៦ឆ្នាំ ពោលធ្លាក់ចុះ ៨៥%។
សូមជម្រាបជូនថា ពិតមែនតែជាសត្វដែលរត់លឿនជាងគេក៏ដោយ ក៏ខ្លារខិនត្រូវការទីធ្លាធំធេងដើម្បីអាចរត់គេចផុតពីចំណីរបស់សត្វមានឥទ្ធិពលផ្សេងទៀត ដូចជាសត្វតោជាដើម។ ម្យ៉ាងទៀត និងដោយមាន ៧៧% កំពុងរស់នៅក្នុងតំបន់មិនមានការ ការពារ ខ្លារខិនក៏កំពុងស្ថិតក្នុងស្ថានភាពងាយរងគ្រោះថ្នាក់ដោយសារសកម្មភាពរបស់មនុស្ស។ នៅក្នុងន័យនេះ និងដើម្បីទប់ស្កាត់ការវិនាសផុតពូជរបស់ខ្លារខិន ទស្សនាវដ្តីអាមេរិកបានអំពាវនាវសហភាពអន្តរជាតិដើម្បីអភិរក្សធម្មជាតិឲ្យដកសត្វខ្លារខិនចេញពីប្រភេទសត្វដែលងាយរងគ្រោះថ្នាក់ទៅជាប្រភេទសត្វដែលកំពុងជួបគ្រោះថ្នាក់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ