កម្មកររោងចក្រកាត់ដេរRCI ទាមទារអោយដោះស្រាយប្រាក់បំណាច់អោយបានឆាប់រហ័ស
ជាថ្មីម្តងទៀតកម្មកររោងចក្ររបស់ក្រុមហ៊ុន RCIនៅខេត្តព្រះសីហនុបានប្រមូលគ្នាប្រមាណជាង ១០០នាក់ ធ្វើការតវ៉ានៅមុខតុលាការខេត្តព្រះសីហនុ ដើម្បីអោយតុលាការពន្លឿនដំណើរការនីតិវិធីនៃការដោះស្រាយបញ្ហាប្រាក់ខែ និងប្រាក់បំណាច់ផ្សេងៗទៀត ជូនដល់កម្មករបន្ទាប់ពីក្រុមហ៊ុនបានធ្វើការបិទទ្វារមិនដំណើរការអស់រយៈពេលជាច្រើនសប្តាហ៍កន្លងទៅនេះ។អត្តបទដោយព្រឿន បញ្ញារី
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ប្រធានសហភាពការងារកម្ពុជា លោក អាត់ ធន បានប្រាប់វិទ្យុបារាំងអន្តរជាតិថា លោកបានជួយធ្វើការងារផ្នែកផ្លូវច្បាប់ ដោយក្នុងនោះក្រុមប្រឹក្សាអាជ្ញាកណ្តាលបានកាត់អោយក្រុមហ៊ុនទូទាត់លក្ខខ័ណ្ឌ៥ចំនុច ដល់កម្មករនយោជិត ព្រមទាំងជួយរៀបចំដាក់ពាក្យបណ្តឹងទៅតុលាការ ដើម្បីសុំការរក្សាការពារ និងចាត់វិធានការផ្សេងៗនៅថ្ងៃទី ២៥ ខែ កក្កដា នៅក្នុងករណី ដែលក្រុមហ៊ុន RCIមិនចេញមុខដោះស្រាយបញ្ហាកម្មករនយោជិតទាំងអស់នេះ។
លោកក៏បានធ្វើការសន្និដ្ឋានថា មូលហេតុនៃការបិទទ្វារឈប់ដំណើរការនៃក្រុមហ៊ុននេះគឺដោយសារតែ២ចំនុចសំខាន់ៗ ទី១គឺការចាត់ចែងរបស់អ្នកគ្រប់គ្រងក្រុមហ៊ុននេះ គឺមិនមានភាពច្បាស់លាស់និងត្រឹមត្រូវ ហើយទី២គឺដោយសារតែបណ្តាញក្រុមហ៊ុនផ្សេងដែលមានពាក់ព័ន្ធជាមួយនឹងក្រុមហ៊ុនRCI ទាំងនៅក្នុងស្រុក និងក្រៅស្រុកកំពុងតែប្រឈមមុខនឹងបញ្ហាសេដ្ឋកិច្ច។
គួរបញ្ជាក់ថា បន្ទាប់ពីក្រុមហ៊ុនបានបិទទ្វារឈប់ដំណើរការ ក្រុមហ៊ុនមិនទាន់មានដំណោះស្រាយពេញលេញ និងសមស្របជូនកម្មករនោះទេ។ ដោយឡែកមានតែតំណាងមិនច្បាស់លាស់ខ្លះៗរបស់ក្រុមហ៊ុន ដែលបានចេញមុខសុំអោយកម្មករទទួលយកប្រាក់ខែតែ ៥០% នៃចំណូលប្រចាំខែនៃប្រាក់ចំនូលរបស់ពួកគាត់ដើម្បីបញ្ចប់ដំណើរការបិទទ្វាររោងចក្រ។
ទោះជាយ៉ាងណាក៏ដោយ កម្មករទាំងអស់មិនយល់ស្របតាមការផ្តល់ជូនរបស់ក្រុមហ៊ុននោះទេ ដោយអះអាងថាវាគ្មានភាពសមាមាត្រនោះទេ ដោយពួកគេបានធ្វើការពេញម៉ោង ហើយមានខ្លះបានខិតខំធ្វើការហើយថែមម៉ោងទាំងយប់ទាំងថ្ងៃ តែបែរជាដល់ថ្ងៃបើកប្រាក់ខែ ប្រធានរដ្ឋបាលនៃរោងចក្រ ទៅជាថាអត់មានលុយបើកអោយទៅវិញ។ ក្រុមកម្មករលើកឡើងថាក្រុមហ៊ុនគួរតែលក់សម្ភារៈ ដូចជាម៉ាស៊ីនមានតម្លៃខ្ពស់ទូទាត់អោយកម្មករ ប្រសិនបើក្រុមហ៊ុនក្ស័យធុនពិតមែន។
គួររំលឹកដែលថា នេះគឺជាលើកទី៤ ដែលកម្មករប្រមាណជាង៩០% នៅក្នុងចំណោមកម្មករ៧០០នាក់បានជួបជុំគ្នាដើម្បីធ្វើការតវ៉ា។ ទោះជាយ៉ាងណាក៏ដោយ កម្មករនាយោជិតទាំងអស់ពុំទាន់បើកការតវ៉ា ឬហែរក្បួនជាទ្រង់ទ្រាយធំនៅឡើយទេ ដោយពួកគេរង់ចាំអោយអាជ្ញាធរខេត្ត តុលាការ និងក្រុមហ៊ុនធ្វើការដោះស្រាយបញ្ហានេះអោយបានសមស្របជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ