នៅខេត្តកំពត ទឹកស្រកអស់ ប្រជាជនចូលផ្ទះវិញដោយសុវត្ថិភាព
ប្រជាជននៅតំបន់លិចទឹកក្នុងខេត្តកំពតបានត្រឡប់ចូលផ្ទះវិញអស់ហើយ បន្ទាប់ពីបានរត់រកកន្លែងសុវត្ថិភាព អំឡុងពេលទឹកជំនន់កាលពីថ្ងៃទី១៥ ១៦ និង១៧ ខែកញ្ញា ឆ្នាំ២០១៥។ តាមអាជ្ញាធរខេត្ត ពុំមានគ្រោះថ្នាក់ណាមួយគួរឱ្យកត់សម្គាល់ទេ ក្រោយសម្រក ប៉ុន្តែភ្នាក់ងារជួយសង្គ្រោះនៅបន្តផ្តល់ជំនួយតាមស្ថានភាពជាក់ស្តែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
តាំងពីថ្ងៃសៅរ៍ ភ្នាក់ងាកាកបាទក្រហម និងមន្ត្រីថ្នាក់ខេត្ត និងថ្នាក់ស្រុក នៅខេត្តកំពត ជាខេត្តដែលបានលិចទឹកខ្លាំងកាលពីសប្តាហ៍មុន បានចាប់ផ្តើមផ្តល់ជំនួយចាំបាច់ដល់ប្រជាពលរដ្ឋដែលវិលមកលំនៅដ្ឋានរបស់ខ្លួនវិញ បន្ទាប់ពីរត់គេចពីទឹកជំនន់។
ជំនួយសង្គ្រោះទាំងនោះមានដូចជាអង្ករ ម្ហូបអាហារ មី ត្រីខជាដើម។ លើសពីនេះទៀត បើតាមលោក ខូយ ឃុនហួរ អភិបាលខេត្តកំពត ក្រុមអ្នកជួយសង្គ្រោះពិនិត្យមើលលំនៅដ្ឋានណាដែលខូចខាត ដើម្បីជួយជួសជុលទៅតាមស្ថានភាពជាក់ស្តែង។
ទឹកជំនន់ខ្លាំងក្នុងខេត្តកំពតដែលបង្កឡើងដោយសារព្យុះភ្លៀង និងការបើទ្វារទំនប់ទឹកវារីអគ្គិសនីកំចាយ កាលពីថ្ងៃទី១៥ ១៦ និង១៧ ខែកញ្ញា ឆ្នាំ២០១៥ បានពន្លិច៥ឃុំនៅស្រុកទឹកឈូរ និង៣សង្កាត់ទៀតក្នុងក្រុងកំពត ក្នុងនោះផ្ទះប្រជាជនប្រហែល៤៣០០ខ្នង និងដីស្រែប្រមាណជា៥០០ហិកតាស្ថិតក្នុងទឹក។ នេះបើតាមស្ថិតិបឋមដែលផ្តល់ដោយភ្នាក់ងារគ្រប់គ្រងគ្រោះមហន្តរាយ កាលពីសប្ដាហ៍មុន។
ប្រជាជនបានវិលត្រឡប់ពីទីទួលសុវត្ថិភាព មកកាន់លំនៅដ្ឋានវិញ តាំងពីថ្ងៃសុក្រ ពេលទឹកចាប់ផ្តើមស្រកទៅវិញ។ រហូតមកដល់ពេលនេះ អាជ្ញារធរខេត្តកំពត មិនទាន់ស្រង់បានស្ថិតិពិតប្រាកដអំពីជនរងគ្រោះ និងទំហំខូចខាតទ្រព្យសម្បត្តិនៅឡើយទេ។
លោក ខូយ ឃុនហួរ អភិបាលខេត្តកំពត បានកត់សម្គាល់ឃើញថា «ដូចជាមិនមានដល់ថ្នាក់ប្រកាសថាការបាត់បង់ប៉ុន្មានលានៗគឺអត់ទេ ហើយបើនិយាយពីស្រូវវិញគឺល្អលើសដើម» ហើយរហូតមកដល់ថ្ងៃអាទិត្យ ក្រុមអ្នកជួយសង្គ្រោះនៅតែបន្តផ្តល់ជំនួយដល់ប្រជាពលរដ្ឋមួយចំនួនដែលមានការលំបាក និងរងផលប៉ះពាល់ខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ