លោកហ៊ុន សែន ទៅដល់អាមេរិក ខណៈបាតុកម្មប្រឆាំងរូបលោកមិនទាន់កើតមាន
នៅរសៀលថ្ងៃទី ២៧ខែកញ្ញា ម្សិលមិញនេះ ត្រូវនឹងថ្ងៃទី២៨នៅកម្ពុជា លោកនាយករដ្ឋមន្ត្រីហ៊ុន សែន និងគណៈប្រតិភូកម្ពុជា បានទៅដល់ទីក្រុងញូវយ៉ក សហរដ្ឋអាមេរិកហើយ ដើម្បីត្រៀមចូលរួមក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី៧៣។ ពេលទៅដល់ លោកប្រមុខដឹកនាំរដ្ឋាភិបាល ត្រូវបានទទួលស្វាគមន៍ដោយមន្ត្រីជាន់ខ្ពស់ខ្មែរ និងតំណាងសហគមន៍ពលរដ្ឋខ្មែរមួយចំនួនប្រចាំអាមេរិក។ ជាការស្វាគមន៍ មុនពេលក្រុមអ្នកគាំទ្រអតីតគណបក្សសង្គ្រោះជាតិ នឹងរៀបចំបាតុកម្មទ្រង់ទ្រាយធំប្រឆាំងវត្តមានលោកហ៊ុន សែន នៅថ្ងៃទី ២៩កញ្ញាស្អែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
មុនពេលក្រុមអ្នកគាំទ្រអតីតគណបក្សសង្គ្រោះជាតិ រៀបចំបាតុកម្មទ្រង់ទ្រាយធំមួយ លោកនាយករដ្ឋមន្ត្រីហ៊ុន សែន ត្រូវបានទទួលស្វាគមន៍យ៉ាងរាក់ទាក់ ពីសំណាក់ពលរដ្ឋខ្មែរមួយចំនួន ដែលរស់នៅសហរដ្ឋអាមេរិក ពេលលោកបានទៅដល់ទឹកដីនៃប្រទេសមហាអំណាចនេះ។ យ៉ាងណាក៏ដោយ លោកប្រមុខដឹកនាំរដ្ឋាភិបាលកម្ពុជា អាចត្រូវប្រឈមនឹងបាតុកម្មរបស់ពលរដ្ឋខ្មែរនៅអាមេរិកមួយចំនួនទៀត ពេលដែលលោកចេញដំណើរទៅកាន់ស្នាក់ការអង្គការសហប្រជាជាតិ នៅរសៀលថ្ងៃទី ២៨ខែកញ្ញានេះ។
បើតាមគម្រោង នៅថ្ងៃសុក្រនេះ លោកហ៊ុន សែន ត្រូវចូលរួមក្នុងពិធីចុះហត្ថលេខាលើអនុស្សារណៈស្តីពីការវះកាត់ប្រកបដោយសុវត្ថិភាពឆ្នាំ ២០២០ រវាងកម្ពុជា និងមូលនិធិ GE។ បន្ទាប់មកលោកហ៊ុន សែន នឹងមានជំនួបជាមួយលោក Alexander Feldman ប្រធាន និងជានាយកប្រតិបត្តិក្រុមប្រឹក្សាធុរកិច្ចសហរដ្ឋអាមេរិក -អាស៊ាន នៅក្នុងសណ្ឋាគារដែលលោកបានស្នាក់នៅ។
ដោយឡែក នៅពេលទៅដល់ទីស្នាក់ការអង្គការសហប្រជាជាតិ លោកនាយករដ្ឋមន្ត្រីកម្ពុជា នឹងជួបពិភាក្សាទ្វេភាគីជាមួយ លោក Khadga Prasad Sharma Oli នាយករដ្ឋមន្ត្រីនេប៉ាល់ មុនពេលជួបទ្វេភាគីជាមួយ លោក Boyko Borissov នាយករដ្ឋមន្ត្រីប៊ុលហ្គារី។
បន្ទាប់ពីជំនួបទាំងនេះហើយ លោកហ៊ុន សែន ត្រូវឡើងថ្លែងសុន្ទរកថា ក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី៧៣ មុនពេលជួបទ្វេភាគីជាមួយលោក Antonio Guterres អគ្គលេខាធិការអង្គការសហប្រជាជាតិ នៅល្ងាចថ្ងៃដដែលនេះ។
យ៉ាងណាក៏ដោយ មន្ត្រីជាន់ខ្ពស់របស់អតីតគណបក្សប្រឆាំង លោក អេង ឆៃអ៊ាង បានបង្ហើបឲ្យដឹងតាមបណ្តាញសង្គមរបស់លោក ពេលលោក ហ៊ុន សែន មានវត្តមាននៅសហរដ្ឋអាមេរិកថា លោកនឹងដឹកនាំបាតុកម្មទ្រង់ទ្រាយធំមួយ ជាមួយពលរដ្ឋខ្មែរនៅអាមេរិកមួយចំនួន ក្នុងទីក្រុងញូវយ៉ក នៅអំឡុងថ្ងៃទី ២៨ និង ២៩ខែកញ្ញានេះ។ ជាបាតុកម្ម ដើម្បីប្រឆាំងនឹងវត្តមានលោកនាយករដ្ឋមន្ត្រី ហ៊ុន សែន និងអំពាវនាវដល់សហគមន៍អន្តរជាតិ និងប្រទេសហត្ថលេខីកិច្ចព្រមព្រៀងទីក្រុងប៉ារីស កុំទទួលស្គាល់រាជរដ្ឋាភិបាលអណ្តត្តិថ្មី និងរដ្ឋសភាឯកបក្សរបស់កម្ពុជា។
សូមជម្រាបជូនថា មុនពេលទៅដល់ទឹកដីអាមេរិក លោកហ៊ុន សែន បានបង្ហោះលើបណ្តាញសង្គមរបស់លោកថា លោកនឹងប្រើនយោបាយការទូត នៅលើឆាកអន្តរជាតិ ដោយមិនអាចឲ្យមានអ្នកណាបង្ខូចជាន់ឈ្លីកម្ពុជា ទោះក្នុងរូបភាពណាក៏ដោយ។ ក្នុងនោះ លោកក៏បានអំពាវនាវផងដែរ ដល់ពលរដ្ឋខ្មែរក្រៅប្រទេសដែលមិនចូលចិត្តលោក ត្រូវតែចែកឲ្យដាច់រវាងការស្អប់រូបលោក និងមុខមាត់កម្ពុជាលើឆាកអន្តរជាតិ។ លោកហ៊ុន សែន ស្នើឲ្យការធ្វើបាតុកម្ម ត្រូវមានសម្បជញ្ញៈ និងមនសិការរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ