លោក ហ៊ុន សែន បើកផ្លូវឲ្យលោក លឺ ឡាយស្រេង ចូលស្រុក តែត្រូវឈប់ប្រមាថព្រះមហាក្សត្រ
លោកនាយករដ្ឋមន្ត្រី ហ៊ុន សែន នៅថ្ងៃទី ០១ មេសានេះ បានប្រកាសបើកផ្លូវឲ្យលោក លឺ ឡាយស្រេង អតីតឧបនាយករដ្ឋមន្ត្រីកូតាគណបក្សហ្វ៊ុនស៊ិនប៉ិច ចូលស្រុកវិញ ដោយគ្មានការភ័យខ្លាច។ លោក លឺ ឡាយស្រេង ដែលបច្ចុប្បន្នកំពុងស្ថិតនៅក្នុងប្រទេសថៃ បានអំពាវនាវសុំការលើកលែងទោស ដើម្បីបានវិលត្រលប់មក ប្រទេសកំណើតវិញ បន្ទាប់ពីបានឃ្លាតឆ្ងាយពីប្រទេសកំណើតអស់រយៈពេល២ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃនេះថា នឹងគ្មានការចោទប្រកាន់ ឬចាប់ខ្លួនលោក លឺ ឡាយស្រេង អតីតឧបនាយករដ្ឋមន្ត្រីនិងជាអតីតមន្ត្រីជាន់ខ្ពស់គណបក្សរាជានិយមហ្វ៊ុនស៊ិនប៉ិចនោះឡើយ ប្រសិនបើអតីតឧបនាយករដ្ឋមន្ត្រីវ័យ៨០ប្លាយឆ្នាំរូបនេះ វិលត្រលប់មកកាន់ប្រទេសកម្ពុជាវិញក្នុងពេលនេះ។ ការប្រកាសរបស់លោកនាយករដ្ឋមន្ត្រី ហ៊ុន សែន នៅពេលនេះ គឺបន្ទាប់ពីកាសែតបាងកកប៉ុស្តិ៍ បានចុះផ្សាយពីការអំពាវនាវរបស់ លោក លឺ ឡាយស្រេង អតីតឧបនាយករដ្ឋមន្ត្រី និងជាអតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិច និងការអំពាវនាវតាមរយៈគណនីហ្វេសប៊ុករបស់ខ្លួន កាលពីថ្ងៃទី២៩ មីនា ដោយសុំការលើកលែងទោសពីលោកនាយករដ្ឋមន្ត្រី ហ៊ុន សែន ដើម្បីបានវិលត្រឡប់ចូលមករស់នៅក្នុងជីវិតចុងក្រោយរបស់លោកនៅក្នុងប្រទេសកំណើតវិញ។
ឆ្លើយតបនឹងការអំពាវនាវនេះ លោកនាយករដ្ឋមន្ត្រី ហ៊ុន សែន បានថ្លែងពីលើវេទិការចែកសញ្ញាប័ត្រដល់និស្សិតនៅថ្ងៃនេះ ដោយធ្វើកាយវិការបក់ដៃហៅ លោក លឺ ឡាយស្រេង ឲ្យវិលចូលស្រុកខ្មែរវិញ ប៉ុន្តែត្រូវឈប់ប្រមាថព្រះមហាក្សត្រតទៅទៀត។
សូមបញ្ជក់ជូនថា លោក លឺ ឡាយស្រេង អតីតឧបនាយករដ្ឋមន្ត្រីនិងជាអតីតមន្ត្រីជាន់ខ្ពស់គណបក្សរាជានិយមហ្វ៊ុនស៊ិនប៉ិច បានគេចខ្លួនទៅកាន់ទីក្រុងបាងកកប្រទេសថៃ កាលពីថ្ងៃទី ២៣ តុលា ឆ្នាំ២០១៧ បន្ទាប់ពីលោកនាយករដ្ឋមន្ត្រី ហ៊ុន សែន បានប្តឹងលោកទៅកាន់តុលាការក្រុងភ្នំពេញ ក្នុងបណ្តឹងប្រមាថព្រះមហាក្សត្រ។ បណ្តឹងកាលណោះ បានកើតចេញពីការបែកធ្លាយនៃសារសំលេងសន្ទនាគ្នារវាងលោក លឺ ឡាយស្រេង ជាមួយលោកស្រី គី លំអង អតីតតំណាងរាស្ត្រគណបក្សហ្វ៊ុនស៊ិនប៉ិច ដែលមានខ្លឹមសារជាអាថ៌ បានធ្វើឲ្យប៉ះពាល់ដល់ព្រះចេស្តាព្រះមហាក្សត្រ សម្តេចក្រុមព្រះ នរោត្តម រណឬទ្ធិ ព្រមទាំងទាំងធ្វើឱ្យប៉ះពាល់ដល់កេរ្តិ៍ឈ្មោះប្រមុខរដ្ឋាភិបាលកម្ពុជាផង។ បណ្តឹងកាលណោះ តុលាការក្រុងភ្នំពេញ បានកាត់ក្តីឲ្យលោក លឺ ឡាយស្រេង ចាញ់និងសងសំណងទៅលោកនាយករដ្ឋមន្ត្រី ហ៊ុន សែន ចំនួន ១២ម៉ឺន៥ពាន់ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ