លោក ហ៊ុន សែន អំពាវនាវឲ្យរោងចក្រW&Dបើកទ្វារទទួលកម្មករ កម្មការិនីចូលធ្វើការវិញ
ពីលើវេទិកាចែកសញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិPPIUនៅថ្ងៃចន្ទនេះលោក ហ៊ុន សែន អំពាវនាវឲ្យរោងចក្រW&D ទទួលយកកម្មករ កម្មការិនីចូលធ្វើការវិញ។ ការអំពាវនាវរបស់លោកនាយករដ្ឋមន្ត្រីធ្វើឡើង បន្ទាប់ពីរោងចក្រW&D បានបណ្ដេញកម្មករ កម្មការិនី ប្រមាណជា១០០នាក់មិនឲ្យចូលធ្វើការ ក្រោយពួកគេធ្វើកូដកម្មទាមទារ បើកប្រាក់អតីតភាពសរុបពេញមួយឆ្នាំ។
ចុះផ្សាយនៅថ្ងៃ៖
តាមរយៈកិច្ចអន្តរាគមន៍ជាសាធារណៈដើម្បីឲ្យថៅកែរោងចក្រ W&D បើកទ្វារទទួលយកកម្មករ កម្មការិនី ប្រមាណជា១០០នាក់ក្នុងចំណោមអ្នកធ្វើកូដកម្ម១៨០០នាក់ ឲ្យចូលធ្វើការវិញ លោក ហ៊ុន សែន ក៏បានរំឭកឲ្យក្រុមកម្មករកម្មការិនី មិនត្រូវទាមទារហួសហេតុពេកទេ នៅពេលដែលខ្លួនអាក់ខានមិនបានបំពេញការងាររាប់ខែ តែបែរជាធ្វើកូដកម្មទាមទារប្រាក់ខែ។
បើតាមលោកប្រមុខរដ្ឋាភិបាល កូដកម្មមិនមែនជាដំណោះស្រាយ ហើយការបណ្ដេញកម្មករ កម្មការិនី ក៏មិនមែនជាមធ្យោបាយដោះស្រាយបញ្ហាដែរ។ ដូចនេះលោកស្នើឲ្យភាគីទាំងពីរផ្ដល់ភាពកក់ក្ដៅទៅវិញទៅមក រវាងថៅកែនិងកម្មករ។
ជុំវិញសំណុំរឿងនេះ កាលពីសប្ដាហ៍មុនលោក ហ៊ុន សែន ស្នើលោក អាត់ ធន់ ប្រធានសហភាពការងារកម្ពុជា ប្រាប់ក្រុមកម្មករ ឈប់ធ្វើកូដកម្មទាមទារ បើកប្រាក់អតីតភាព សរុបក្នុងពេលតែមួយ ព្រោះការទាមទារនេះជាទង្វើខុសច្បាប់ ខណៈច្បាប់ការងារ តម្រូវឲ្យបើកប្រាក់ អតីតភាពការងារ៦ខែម្ដង។
លោក អាត់ ធន់ ប្រធានសហភាពការងារកម្ពុជាស្វាគមន៍ចំពោះកិច្ចអន្តរាគមន៍របស់ប្រមុខរដ្ឋាភិបាល លោក ហ៊ុន សែន ដែលអំពាវនាវឲ្យរោងចក្រW&D ទទួលយកកម្មករ កម្មការិនីចូលធ្វើការវិញ។ បើតាមលោក អាត់ ធន់ កន្លងមកក្រសួងការងារធ្លាប់ចរចាជាមួយរោងចក្រដែរ តែខាងរោងចក្រនៅតែមិនទទួលកម្មករចូលធ្វើការងារវិញ។ ចូលធ្វើការវិញបាន លុះត្រាជាកម្មករថ្មីដែលប្រឈមនឹងការបាត់បង់ប្រាក់អតីតភាព ដែលចំណុចនេះហើយធ្វើឲ្យក្រុមកម្មករមិនសុខចិត្ត។
គួររំឭកឡើងវិញបន្តិចថា ដំបូងឡើយកម្មករ កម្មការិនី១៨០០នាក់ ធ្វើការនៅរោងចក្រ W&D ស្ថិតនៅខណ្ឌមានជ័យ បានធ្វើកូដកម្ម កាលពីចុងឆ្នាំ២០១៨ និងបានហែរញត្តិយកទៅដាក់ នៅខុទ្ទកាល័យនាយករដ្ឋមន្រ្តី ដើម្បីសុំកិច្ចអន្តរាគមន៍ ស្នើសុំបើកប្រាក់អតីតភាពការងារ មុនឆ្នាំ២០១៩ ឲ្យអស់សិន មុននឹងអនុវត្តច្បាប់ថ្មី ដែលនឹងត្រូវបើកប្រាក់អតីតភាពរៀងរាល់៦ខែម្ដង។ ក្នុងនោះដែរបញ្ហា អូសបន្លាយមកដល់ពេលនេះ គឺក្នុងចំណោមអ្នកតវ៉ា១៨០០នាក់នៅសល់តែជាង១០០នាក់ទៀតដែល ថៅកែរោងចក្រមិនទទួលយកធ្វើការវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ