លោកហ៊ុន សែន ទាមទារឲ្យមានការទទួលស្គាល់ប្រវត្តិសាស្រ្តមុនមានកិច្ចព្រមព្រៀង២៣តុលា
នៅមុនមួយថ្ងៃនៃការប្រារព្ធខួបកិច្ចព្រមព្រៀងសន្តិភាពទីក្រុងប៉ារីសមកដល់ លោកនាយករដ្ឋមន្រ្តី ហ៊ុន សែន បានអំពាវនាវឲ្យមានការទទួលស្គាល់ប្រវត្តិសាស្រ្ត មុនមានកិច្ចព្រមព្រៀងសន្តិភាពទីក្រុងប៉ារីស។ បើតាមលោកនាយករដ្ឋមន្រ្តី មានមនុស្សមួយចំនួននិយាយតែពីស្លឹកឈើ តែមិនព្រមនិយាយពីឬសគល់នៃដើមឈើនោះទេ។
ចុះផ្សាយនៅថ្ងៃ៖
ស្តាប់ - ០២:១៥
ពោលគឺនៅថ្ងៃទី២២តុលា មុនមួយថ្ងៃនៃការប្រារព្ធខួបលើកទី២៤នៃកិច្ចព្រមព្រៀងសន្តិភាពទីក្រុងប៉ារីសថ្ងៃ២៣តុលាមកដល់ លោកនាយករដ្ឋមន្រ្តី ហ៊ុន សែន បានអំពាវនាវឲ្យមានការទទួលស្គាល់ការពិត នៃប្រវត្តិសាស្រ្តប្រទេសកម្ពុជា មុនពេលមានកិច្ចព្រមព្រៀងសន្តិភាពទីក្រុងប៉ារីសថ្ងៃ២៣តុលាឆ្នាំ១៩៩១នេះ។ នៅក្នុងសុន្ទរកថារយៈពេលជិតមួយម៉ោង របស់លោកនាយករដ្ឋមន្រ្តី នៅក្នុងពិធីសម្ពោធដាក់ឲ្យប្រើប្រាស់ស្ពានមិត្តភាព កម្ពុជា-ចិន ឬស្ពានជ្រោយចង្វាទី២ ថ្ងៃទី២២តុលានេះ លោក ហ៊ុន សែន បានអះអាងថា «មានមនុស្សមួយចំនួនបានចាប់យកតែចំណុចមួយមកនិយាយ តែពួកគេមិនបាននិយាយពីប្រវត្តិសាស្រ្តទាំងមូលនោះទេ»។
ថ្ងៃទី២៣តុលា ឆ្នាំ១៩៩១-២៣តុលាឆ្នាំ២០១៥ គឺជាខួបលើកទី២៤ នៃកិច្ចព្រមព្រៀងសន្តិភាពទីក្រុងប៉ារីស ដែលបានឈានទៅរកតុចរចា៤ភាគី ដើម្បីឈានទៅបញ្ចប់សង្រ្គាមស៊ីវិលជាង២ទស្សវត្សន៍នៅកម្ពុជា តាមរយៈការបោះឆ្នោតជាតិមួយកាលពីឆ្នាំ១៩៩៣។
អ្វីជាការកត់សំគាល់ ឲ្យតែដល់ការប្រារព្ធខួបនេះម្តងៗ ភាគីអ្នកនយោបាយខ្មែរ តែងតែឲ្យតម្លៃផ្សេងៗគ្នានៃប្រវត្តិសាស្រ្តនេះ។ ភាគីម្ខាង បានឲ្យតម្លៃទៅលើកិច្ចព្រមព្រៀងសន្តិភាព២៣តុលាថា បាននាំមកនូវសន្តិភាពនៅកម្ពុជា ហើយថា ថ្ងៃរំដោះ៧មករាឆ្នាំ១៩៧៩ គឺជាពេលដែលទាហ៊ានវៀតណាមបានចូលមកឈ្លានពានកម្ពុជា ក្រោមហេតុផលវាយរំដោះប្រទេសកម្ពុជាពីរបបប្រល័យពូជសាសន៍ប៉ុលពត។ ចំណែកឯភាគីខាងរដ្ឋាភិបាលវិញ ក៏បានការពារអំណះអំណាងរបស់ខ្លួនថា បើគ្មានថ្ងៃរំដោះ៧មករាឆ្នាំ១៩៧៩ទេ ក៏គ្មានកិច្ចព្រមព្រៀងសន្តិភាពនៅទីក្រុងប៉ារីស២៣តុលានោះដែរ។ ថ្ងៃ២៣តុលា ត្រូវបានរដ្ឋាភិបាលសម្រេចលុបចេញពីប្រតិទិននៃបុណ្យជាតិម្តងកាលពីឆ្នាំ២០០៤ ប៉ុន្តែក្រោយមកបានដាក់បញ្ចូលឡើងវិញ ចាប់តាំងពីឆ្នាំ២០១២។
បើតាមប្រសាសន៍របស់នាយករដ្ឋមន្រ្តីហ៊ុន សែន បើគ្មានរដ្ឋប្រហារទំលាក់សម្តេច នរោត្តម សីហនុនៅឆ្នាំ១៩៧០ ក៏គ្មានរបបប្រល័យពូជសាសន៍ប៉ុលពតនៅឆ្នាំ១៩៧៥ ហើយបើគ្មានរបបប៉ុលពតឆ្នាំ១៩៧៥ ក៏គ្មានថ្ងៃរំដោះ៧មករាឆ្នាំ១៩៧៩ ហើយបើគ្មានថ្ងៃរំដោះ៧មករាឆ្នាំ១៩៧៩ ក៏គ្មានថ្ងៃកិច្ចព្រមព្រៀងសន្តិភាពទីក្រុងប៉ារីស២៣តុលា ឆ្នាំ១៩៩១នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ