លោក ហ៊ុន សែនប្រកាសលេងល្បែងនយោបាយបន្តគ្រប់រស់ជាតិជាមួយបក្សប្រឆាំង
លោកនាយករដ្ឋមន្ត្រី ហ៊ុន សែន បានបង្ហាញសារនយោបាយថ្មីនៅថ្ងៃនេះថា កំដៅនយោ បាយរវាងគណបក្សប្រជាជននិងគណបក្សសង្គ្រោះជាតិនៅមិនទាន់បិទ បញ្ចប់ទេ ។ កំដៅនយោបាយមិនទាន់បញ្ចប់ផងលោកនាយករដ្ឋមន្ត្រីក៏បានប្រកាសលេងល្បែង នយោបាយគ្រប់រស់ជាតិបន្តទៀតជាមួយប្រមុខបក្សប្រឆាំងលោក សម រង្ស៊ី។ សម្រាប់ លោក កឹម សុខា អនុប្រធានបក្សប្រឆាំងចាត់ទុកការឡើងរបស់លោក ហ៊ុន សែន មិនមែនជារឿងថ្មីនិងថាបក្សប្រជាជនកំពុងខ្លាចចាញ់ឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
សារនយោបាយថ្មីនេះគឺលោក ហ៊ុន សែន លើកឡើងនៅក្នុងសម័យប្រជុំរដ្ឋសភានៅព្រឹកថ្ងៃអង្គារទី២០តុលាបន្ទាប់លោកនាយករដ្ឋមន្ត្រីបានប្រតិកម្មខ្លាំងៗទៅកាន់តំណាងរាស្ត្រគណបក្សសង្គ្រោះជាតិដែលបានលើកសំណួរទៅកាន់តំណាងរដ្ឋាភិបាលបែបចាក់ប្រធានបទទាក់ទងសារៈប្រយោជន៍នៃកិច្ចព្រមព្រៀងពាណិជ្ជកម្មរវាងកម្ពុជានិងបេឡារុស។
ការលើកឡើងរបស់តំណាងរាស្ត្របក្សប្រឆាំង លោក លីម គីមយ៉ា ជាអ្វីដែលលោក ហ៊ុន សែន ចាត់ទុកថាជាការ«ផ្ដើមសេដ្ឋកិច្ចបិទបញ្ចប់ដោយនយោបាយ»ការណ៍នេះបានជម្រុញឲ្យលោកនាយករដ្ឋមន្ត្រីសុំសិទ្ធពីប្រធានរដ្ឋសភាលោក ហេង សំរិន ងើបឡើងចង្អុលមុខក្រុមតំណាងរាស្ត្រសង្គ្រោះជាតិដោយប្រកាសលេងល្បែងនយោបាយគ្រប់រសជាតិជាមួយប្រមុខបក្សប្រឆាំង លោក សម រង្ស៊ីដែលមានទាំង ក្ដៅ ត្រជាក់ ផ្អែម ល្វីង ជូចត់ ។ បើតាមលោកនាយករដ្ឋមន្ត្រីល្បែងនយោបាយគ្រប់រស់ជាតិនេះលោកបានប្រាប់ទៅលោក សម រង្ស៊ី រួចហើយ។
នៅក្នុងបទអន្តរាគន៍ជិត២០នាទីលោកនាយករដ្ឋមន្ត្រីក៏ថ្លែងការពារខ្លួនថាការឡើងបកស្រាយរបស់លោកមិនមែនក្នុងបំណងគំរាមបុគ្គលណាម្នាក់នោះទេ ។ ក្រៅពីលោក លីម គីមយ៉ា តំណាងរាស្ត្រគណបក្សសង្គ្រោះជាតិ២រូបទៀតគឺ លោក សុន ឆ័យ និង លោក យ៉ែម ប៉ុញ្ញាឬទ្ធក៏ទទួលរងការបំបាក់មុខពីលោកនាយករដ្ឋមន្ត្រី ផងដែរ។
ថ្លែងនៅចំពោះមុខអ្នកកាសែតក្រោយកិច្ចប្រជុំសភាបញ្ចប់ លោក កឹម សុខា ចាត់ទុកពាក្យពេជន៍លោក ហ៊ុន សែន ថាជារឿងដដែល។ ជារឿងដដែលដែលលោកអនុប្រធានគណបក្សសង្គ្រោះជាតិរូបនេះចំអកទៅលោក ហ៊ុន សែន ថាកំពុងភ័យខ្លាចចាញ់ឆ្នោតនៅអាណត្តិក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ