ចៅក្រមសម្រេចបិទបញ្ចប់ការស៊ើបសួរសំណុំរឿង លោក កឹម សុខា
ចៅក្រមស៊ើបសួរនៃសាលាដំបូងរាជធានីភ្នំពេញ នៅថ្ងៃទី១៥ខែវិច្ឆិកានេះ បានប្រកាសបិទបញ្ចប់ការស៊ើបសួរលើសំណុំរឿងលោក កឹម សុខា ហើយចាប់ពីពេលនេះតទៅ។ សូមម្រាបជូនថា ចៅក្រមបានបើកការស៊ើបសួរក្នុងសំណុំរឿងលោក កឹម សុខា អស់រយៈជាង២ឆ្នាំរួចមកហើយ ពោលគឺតាំងពេលចាប់ខ្លួនប្រធានគណបក្សប្រឆាំងរូបនេះ នៅយប់ថ្ងៃទី៣កញ្ញាឆ្នាំ២០១៧មកម្ល៉េះ។
ចុះផ្សាយនៅថ្ងៃ៖
ស្តាប់ - ០២:២១
ការសម្រេចបិទបញ្ចប់ការស៊ើបសួរក្នុងសំណុំរឿងលោក កឹម សុខា ប្រធានអតីតគណបក្សសង្គ្រោះជាតិ ត្រូវបានប្រកាសឲ្យដឹងតាមរយៈលិខិតរបស់លោក គី ឬទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ ផ្ញើទៅកាន់លោក ផែង ហេង ដែលជាសហមេធាវីការពារក្ដីឲ្យលោក កឹម សុខា។ ក្រៅពីបញ្ជាក់អំពីការបិទបញ្ចប់ការស៊ើបសួរ លិខិតចុះថ្ងៃទី១៥វិច្ឆិការបស់លោកចៅក្រម គី ឬទ្ធី ពុំបានឲ្យដឹងពីថ្ងៃកំណត់បើកសវនាការសម្រាប់សំណុំរឿងនេះឡើយ។
តាមនីតិវិធី ចៅក្រមនឹងចេញដីកាសន្និដ្ឋានមួយទៀតថា តើនឹងចាត់បញ្ជូនសំណុំរឿងនេះទៅជំនុំជម្រៈ ឬក៏ទម្លាក់ចោលបទចោទប្រកាន់។ នេះបើតាមការពន្យល់របស់លោក ផែង ហេង ដែលបានថ្លែងប្រាប់វិទ្យុបារាំងអន្ដរជាតិ RFI នាថ្ងៃសុក្រ ទី១៥វិច្ឆិកានេះ។ លោក ផែង ហេង បញ្ជាក់ថា ជំហរបស់ លោក កឹម សុខា គឺចង់ឲ្យតុលាការទម្លាក់ចោលបទចោទប្រកាន់ទាំងស្រុង ដោយសំអាងថា លោកជាមនុស្សស្អាតស្អំ ពោលគឺមិនមានជាប់ពាក់ព័ន្ធនឹងការឃុបឃិតជាមួយបរទេសដើម្បីរំលំរដ្ឋាភិបាលកម្ពុជា ដូចការចោទប្រកាន់របស់តុលាការនោះឡើយ។
គួរកត់សម្គាល់ថា សំណុំរឿងលោក កឹម សុខា មានការវិវត្តយ៉ាងខ្លាំងនៅក្នុងខែវិច្ឆិកានេះ បន្ទាប់ពីបានជាប់គាំងអស់ពេលយ៉ាងយូរ។ កាលពីប្រាំថ្ងៃមុន ពោលគឺនៅថ្ងៃទី១០វិច្ឆិកា ចៅក្រមបានសម្រេចបន្ធូរបន្ថយលក្ខខណ្ឌមួយចំនួននៃនីតិវិធីត្រួតពិនិត្យតាមផ្លូវតុលាការ ដោយអនុញ្ញាតឲ្យលោក កឹម សុខា អាចធ្វើដំណើរបាននៅទូទាំងប្រទេសកម្ពុជា តែហាមចេញក្រៅប្រទេស និងមិនឲ្យធ្វើនយោបាយ។ ក្រោយពីមានការបន្ថូរបន្ថយលក្ខខណ្ឌមួយចំនួននោះ លោក កឹម សុខា មានឱកាសទទួលជួបតំណាងស្ថានទូតបរទេសខាងលោកសេរីជាបន្តបន្ទាប់ ក្នុងរយៈពេលជិតមួយសប្តាហ៍មកនេះ រួមមាន តំណាងស្ថានទូតបារាំង និងតាមពីក្រោយដោយតំណាងស្ថានទូតអាមេរិក អាល្លឺម៉ង់ និងអូស្ត្រាលី ជាដើម។ ប៉ុន្តែខ្លឹមសារនៃជំនួបទាំងអស់នោះ ត្រូវបានមនុស្សជំនិតរបស់លោក កឹម សុខា បង្ហើបប្រាប់ថា ជាការសួរសុខទុក្ខធម្មតា មិនមានការជជែកពីរឿងនយោបាយឡើយ ដោយសារតែជាប់បំរាមរបស់តុលាការ។
លោក កឹម សុខា ត្រូវបានចាប់ខ្លួននៅពាក់កណ្តាលយប់ថ្ងៃទី៣កញ្ញាឆ្នាំ២០១៧ហើយបញ្ជួនទៅឃុំខ្លួនភ្លាមៗ នៅពន្ធនាគារត្រពាំងផ្លុងមួយឆ្នាំ បន្ទាប់មកចៅក្រមបានប្តូរពីការឃុំខ្លួនក្នុងពន្ធនាគារដោយឲ្យមករស់នៅតែក្នុងផ្ទះរយៈពេលជាងមួយឆ្នាំទៀត ទើបតែត្រូវបានចៅក្រមដដែល បន្ថូរបន្ថយលក្ខខណ្ឌនៃការរស់នៅក្នុងផ្ទះ ដោយអនុញ្ញាតឲ្យធ្វើដំណើរទូទាំងប្រទេសកាលពីថ្ងៃទី១០ខែវិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ