អ្នកឃ្លាំមើល៖ តំណែងប្រធានបក្សប្រឆាំងទំនងជាធ្លាក់ទៅលើលោក កឹម សុខា ចៀសមិនផុត
នាថ្ងៃទី២ខែមីនា សប្ដាហ៍ក្រោយនេះ គណបក្សសង្គ្រោះជាតិនឹងរៀបចំសមាជវិសាមញ្ញ ដើម្បីបោះឆ្នោតជ្រើសតាំងប្រធាននិងអនុប្រធានគណបក្ស។ ការជ្រើសតាំងក្បាលម៉ាស៊ីនដឹកនាំថ្មីនៃបក្សនេះ ធ្វើឡើងបន្ទាប់ពីលោក សម រង្ស៊ី លាលែងចេញពីតំណែងប្រធានបក្ស កាលពីថ្ងៃទី១១ខែកុម្ភៈកន្លងទៅ។រហូតមកទល់ពេលនេះ មន្ដ្រីគណបក្សសង្គ្រោះជាតិនៅទាន់ដឹងទេថា នរណានឹងក្លាយទៅជាប្រធានគណបក្ស បន្ទាប់ពីលោក សម រង្ស៊ី។ ប៉ុន្តែសម្រាប់អ្នកឃ្លាំមើលបញ្ហានយោបាយ តំណែងប្រធានបក្សប្រឆាំងធំជាងគេនៅកម្ពុជា ទំនងជាត្រូវធ្លាក់ទៅលើលោក កឹម សុខា ដោយចៀសមិនផុត។
ចុះផ្សាយនៅថ្ងៃ៖
ស្តាប់ - ០៣:០០
ចាប់តាំងពីលោក សម រង្ស៊ី លាលែងពីតំណែង គណបក្សសង្គ្រោះជាតិមិនដែលគិតគូរពីការរៀបចំប្រធានថ្មីជំនួសតំណែងលោក សម រង្ស៊ី ទេ ដោយយោងតាមលក្ខន្តិកៈគណបក្ស។ ជាលក្ខន្តិកៈដែលចែងថា បើកាលណាប្រធានបក្សលាលែងក្នុងរយៈពេលមួយតិចជាង១៨ខែ គិតទៅដល់ថ្ងៃសមាជថ្មីនៅថ្ងៃទី៧មេសា នោះអនុប្រធាននឹងក្លាយជាប្រធានស្ដីទី។ ប៉ុន្តែឥឡូវនេះ គណបក្សប្រឆាំងធំជាងគេនៅកម្ពុជា បានសម្រេចរៀបចំសមាជវិសាមញ្ញ ដើម្បីជ្រើសតាំងប្រធាននិងអនុប្រធានថ្មី ដោយយោងតាមកាលៈទេសៈ និងស្ថានការណ៍ចាប់បង្ខំ ខណៈសេចក្ដីស្នើវិសោធនកម្មច្បាប់ស្ដីពីគណបក្សនយោបាយចែងថា នៅពេលប្រធានបក្សលាឈប់ គណបក្សនយោបាយត្រូវចាត់នីតិវិធីដើម្បីជំនួសតំណែងប្រធានបក្សនោះ ក្នុងរយៈពេលយ៉ាងយូរ៩០ថ្ងៃ។
គួរកត់សម្គាល់ថា រហូតមកទល់ពេលនេះ មន្ដ្រីជាន់ខ្ពស់គណបក្សសង្គ្រោះជាតិនៅទាន់ដឹងទេថា នរណានឹងក្លាយទៅជាប្រធានគណបក្ស បន្ទាប់ពីលោក សម រង្ស៊ី។ គេគ្រាន់តែដឹងថា ដើម្បីអាចក្លាយជាប្រធានបក្សបាន ឥស្សរជននយោបាយត្រូវឆ្លងកាត់ការបោះឆ្នោតរកសំឡេងគាំទ្រ២ដំណាក់កាល។ ទី១ ការគាំទ្រ១ភាគ៣ ពីគណកម្មការនាយកគណបក្ស ដើម្បីអាចឈរឈ្មោះជាបេក្ខជន។ និងទី២ នៅពេលក្លាយជាបេក្ខជនប្រធានបក្សហើយ ត្រូវទទួលបានការគាំទ្រភាគច្រើនដាច់ខាតពីសមាជគណបក្ស។ នេះបើតាមលោក អេង ឆៃអ៊ាង តំណាងរាស្ត្រ និងជាមន្ដ្រីជាន់ខ្ពស់បក្សប្រឆាំង។
ចំពោះរចនាសម្ព័ន្ធថ្នាក់ដឹកនាំបក្ស ថាតើនឹងរក្សាទម្រង់ប្រធានម្នាក់ អនុប្រធានម្នាក់ ដូចពីមុនឬយ៉ាងណា លោក អេង ឆៃអ៊ាង មិនអាចបំភ្លឺបានទេ។ លោកថា ការរៀបចំក្បាលម៉ាស៊ីនដឹកនាំ នឹងត្រូវរៀបចំឡើងនៅក្នុងសមាជវិសាមញ្ញតែម្ដង ដោយយោងទៅតាមស្ថានការណ៍នយោបាយ។
សូមជម្រាបថា ការរៀបចំសមាជវិសាមញ្ញរបស់បក្សប្រឆាំងដើម្បីជ្រើសរើសប្រធាននិងអនុប្រធានបក្សថ្មីនាពេលនេះ ធ្វើឡើងស្របពេលដែលមានព័ត៌មានលេចឮថា បក្សប្រឆាំងនឹងរៀបចំក្បាលម៉ាស៊ីនដឹកនាំថ្មី ក្រោមរូបមន្តប្រធាន១ អនុប្រធាន៣៖ ក្នុងនោះ លោក កឹម សុខា ជាប្រធាន អមដោយអនុប្រធានចំនួន៣រូប គឺលោកស្រី ជូឡុង ស៊ូមូរ៉ា លោក យឹម សុវណ្ណ និងលោក ប៉ុល ហំម។ នេះបើតាមព័ត៌មានចចាមអារាម ដែលមន្ដ្រីជាន់ខ្ពស់គណបក្សប្រឆាំង បដិសេធមិនធ្វើអត្ថាធិប្បាយ។
យ៉ាងណាក៏ដោយ អ្នកឃ្លាំមើលបញ្ហានយោបាយប្រមើលមើលឃើញថា តំណែងប្រធានបក្សសង្គ្រោះជាតិបន្ទាប់ពីលោក សម រង្ស៊ី ទំនងជាត្រូវធ្លាក់ទៅលើលោក កឹម សុខា ដោយចៀសមិនផុត។ សម្រាប់លោក សូរ ចន្ថា សាស្ត្រាចារ្យវិទ្យាសាស្ត្រនយោបាយ លោក កឹម សុខា គឺជាតួអង្គដ៏សក្តិសម មានប្រជាប្រិយភាព មានឥទ្ធិពល និងដែលត្រូវបានផ្ដល់តម្លៃ ទាំងនៅក្នុងផ្ទៃក្នុងបក្ស និងទាំងសម្រាប់មជ្ឈដ្ឋានទូទៅ។ បើទោះបីជា លោក កឹម សុខា កំពុងរងបណ្ដឹងនៅតុលាការក៏ដោយ ប៉ុន្តែលោក សូរ ចន្ថា យល់ថា គណបក្សសង្គ្រោះជាតិមិនគួរផ្ដោតលើបញ្ហានេះពេកទេ ហើយគួរយកពេលវេលាពង្រឹងគោលនយោបាយនៅតាមមូលដ្ឋានឲ្យច្រើន ខណៈការបោះឆ្នោតកាន់តែខិតជិតចូលមកដល់មែនទែនហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ