គណបក្សសង្គ្រោះជាតិកោះប្រជុំគណៈអចិន្ត្រៃយ៍ ២៤ម៉ោងក្រោយការលាលែងរបស់លោក សម រង្ស៊ី
សមាជិកគណៈកម្មាធិការអចិន្ត្រៃយ៍គណបក្សសង្គ្រោះជាតិ បានកោះប្រជុំបន្ទាន់នៅព្រឹកថ្ងៃអាទិត្យនេះ ពោលគឺនៅ២៤ម៉ោងក្រោយពីការប្រកាសលាលែងតំណែងជាប្រធានគណបក្សសង្គ្រោះជាតិរបស់លោក សម រង្ស៊ី។ កិច្ចប្រជុំនៅថ្ងៃនេះ អាចលើកឡើងពីលទ្ធភាពនៃបេក្ខភាពថ្មីដែលនឹងក្លាយជាប្រធានគណបក្សប្រឆាំង បន្តពីលោក សម រង្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
កិច្ចប្រជុំនេះបានធ្វើឡើងនៅឯទីស្នាក់ការគណបក្សសង្គ្រោះជាតិ ស្ថិតនៅសង្កាត់ចាក់អង្រែលើ ក្រុងភ្នំពេញ នៅព្រឹកថ្ងៃអាទិត្យ ទី១២កុម្ភៈនេះ ដោយមានការចូលរួមពីលោក កឹម សុខា ប្រធានស្តីទីគណបក្សសង្គ្រោះជាតិ។ កិច្ចប្រជុំជាបន្ទាន់នេះ បានធ្វើឡើងនៅមួយថ្ងៃក្រោយពីការប្រកាសលាលែងពីប្រធានគណបក្សសង្គ្រោះជាតិរបស់លោក សម រង្ស៊ី ដ៏គួរឲ្យភ្ញាក់ផ្អើល កាលពីល្ងាចថ្ងៃសៅរិ៍ ទី១១កុម្ភៈ ឆ្នាំ២០១៧នេះ។
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានប្រាប់វិទ្យុបារាំងអន្តរជាតិ នៅព្រឹកថ្ងៃអាទិត្យនេះថា កិច្ចប្រជុំនៅថ្ងៃនេះ គឺដើម្បីពិនិត្យមើលពីមូលហេតុពិតប្រាកដនៃការលាឈប់របស់លោក សម រង្ស៊ី និងសម្រេចថាតើ ត្រូវអនុវត្តទៅតាមសំណើរបស់លោក សម រង្ស៊ី ឬយ៉ាងណា? នៅចំពោះមុខនេះ លោក សុន ឆ័យ បានច្រានចោលចំពោះការអះអាងថា កិច្ចប្រជុំរបស់គណៈអចិន្ត្រៃយ៍គណបក្សនៅថ្ងៃនេះ គឺដើម្បីពិនិត្យជ្រើសរើសបេក្ខភាពថ្មី ដើម្បីជំនួសតំណែងលោក សម រង្ស៊ី។ បើតាមប្រធានក្រុមតំណាងរាស្ត្របក្សប្រឆាំងរូបនេះថា គណបក្សនៅមិនទាន់ពិនិត្យលើបញ្ហានេះនៅឡើយទេ។
សូមបញ្ជាក់ថា លោក សម រង្ស៊ី បានប្រកាសលាលែងពីតំណែងប្រធានគណបក្សសង្គ្រោះជាតិនិងសមាជិកភាពរបស់គណបក្សប្រឆាំងដ៏ធំនៅកម្ពុជា កាលពីល្ងាចថ្ងៃទី១១កុម្ភៈ ដោយសាមូលហេតុផ្ទាល់ខ្លួន។ ប៉ុន្តែអ្នកវិភាគបានលើកឡើងថា គម្រោងធ្វើវិសោធនកម្មច្បាប់ស្តីពីគណបក្សនយោបាយដែលហាមឃាត់អ្នកជាប់ទោសមិនឲ្យធ្វើជាប្រធាន ឬ អនុប្រធានគណបក្ស គឺជាដំណើរឆ្ពោះទៅរកការរំលាយគណបក្សប្រឆាំងរបស់លោក សម រង្ស៊ី ខណៈដែលប្រធានគណបក្សប្រឆាំងរូបនេះ កំពុងរងបណ្តឹងជាច្រើនករណីនៅឯតុលាការ។ លោកសម រង្ស៊ី បានសរសេរនៅលើទំព័រហ្វេសបុករបស់លោកអមដោយលិខិតលាលែងរបស់លោកកាលពីថ្ងៃទី១១កុម្ភៈថា “គ្រប់កាលៈទេសៈ លោកនៅតែរក្សាឧត្តមគតិសង្គ្រោះជាតិជានិច្ច នៅក្នុងបេះដូងរបស់លោក។
គួរជំរាបជូនដែរថា ភ្លាមៗក្រោយពីលិខិតលាលែងរបស់លោក សម រង្ស៊ី ត្រូវបានផ្សព្វផ្សាយកាលពីថ្ងៃម្សិលមិញ ក៏មានលេចចេញលិខិតរបស់លោក សម រង្ស៊ី មួយទៀត ដែលបានជំរាបជូនលោក កឹម សុខា ឲ្យតែងតាំងលោកស្រី ជូឡុង ស៊ូម៉ូរ៉ា ភរិយារបស់លោក ធ្វើជាប្រធានគណបក្សថ្មីជំនួសលោក សម រង្ស៊ី។ ក៏ប៉ុន្តែមន្ត្រីគណបក្សសង្គ្រោះជាតិ បានអះអាងថា ជាលិខិតក្លែងក្លាយ។
យ៉ាងណាក៏ដោយ លោក កឹម សុខា ប្រធានស្តីទីគណបក្សសង្គ្រោះជាតិ បានហៅការសម្រេចចិត្តរបស់លោក សម រង្ស៊ី នេះថា គឺជាការសម្រេចចិត្តប្រកបដោយកិត្តិយស និងដោយមានការពិគ្រោះយោបល់ជាមួយថ្នាក់ដឹកនាំគណបក្ស ដើម្បីផលប្រយោជន៍ជាតិ និងគណបក្សជាធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ