សាលាដំបូងច្រានចោលការសុំលើកពេលសវនាការរបស់លោក គឹម សុខ
ព្រះរាជអាជ្ញារងសាលាដំបូងរាជធានីភ្នំពេញ មិនយល់ព្រមតាមការស្នើសុំពន្យារពេលសវនាការតាមសំណើររបស់លោក គឹមសុខ នោះទេ។ នេះគឺជាការបដិសេធភ្លាមៗបន្ទាប់ពីលោក គឹម សុខ នៅព្រឹក ថ្ងៃទី ១៦ កុម្ភៈនេះបានស្នើសុំទៅសាលាដំបូងរាជធានីភ្នំពេញ ដើម្បីពន្យារពេលចូលឆ្លើយបំភ្លឺក្នុងសំណុំរឿងប្ដឹងដោយលោកនាយករដ្ឋមន្ត្រី ហ៊ុន សែន ដែលសវនាការនេះគ្រោងនឹងចាប់ផ្ដើមនៅថ្ងៃទី ១៧ខែកុម្ភៈ។ ខណៈបណ្ដឹងទីមួយមិនទាន់បានដំណើរការផង លោក គឹម សុខ បានរងបណ្ដឹងថ្មីមួយករណីទៀតពីដើមបណ្ដឹងលោកនាយករដ្ឋមន្ត្រី ហ៊ុន សែន។
ចុះផ្សាយនៅថ្ងៃ៖
ស្តាប់ - ០២:១១
ព្រះរាជអាជ្ញារងលោក សៀង សុខ មិនបានបញ្ជាក់ពីមូលនៃការបដិសេធលើសំណើរសុំលើកពេលសវនាការរបស់លោក គឹម សុខ នោះទេដោយគ្រាន់តែចារបន្ថែមលើលិខិតរបស់លោក គឹម សុខ ដែលមានស្រាប់ថា«យើង សៀង សុខ មិនអនុញ្ញាតលើការស្នើសុំនេះទេ សាមីខ្លួនត្រូវតែចូលមកកាន់អយ្យការ តាមកាលកំណត់»។
ថ្លែងជាសាធារណៈនៅចំពោះមុខអ្នកកាសែតនៅព្រឹកថ្ងៃទី ១៦កុម្ភៈនេះលោក គឹម សុខ អ្នកវិភាគសង្គម និងនយោបាយអះអាងថា មូលហេតុនៃការពន្យារពេល ដោយសារតែលោករកមេធាវីការពារក្ដីដែលមិនយកថ្លៃសេវាមិនទាន់បាន។ លោក គឹម សុខ បានបង្ហើបទៀតថា មានការសុំជួបចរចាដោយសម្ងាត់រវាងលោកជាមួយកូនប្រុសច្បងលោកនាយករដ្ឋមន្ត្រី ហ៊ុន សែន លើបញ្ហានេះ។
ជាថ្មីទៀតលោក គឹម សុខ បានបង្ហាញជំហរមិនគេចខ្លួនទៅក្រៅប្រទេស និងនៅតតាំងនឹងបណ្ដឹងរបស់គណបក្សប្រជាជនកម្ពុជាតាមផ្លូវតុលាការ។ ហើយលោក គឹម សុខ មិនដូរដាច់ខាតនូវជំហរអត្ថាធិប្បាយ រឿងសង្គម និងនយោបាយ ទោះមានបណ្ដឹង ១០០ទៀត ត្រូវគេដាក់ទម្លាក់សង្កត់លើរូបលោកក៏ដោយ។
សូមបញ្ជាក់ថា មេធាវីលោកនាយករដ្ឋមន្ត្រី ហ៊ុន សែន បានប្ដឹងលោកគឹម សុខ ទាមទារសំណង់ជំងឺចិត្ត ៥០ម៉ឺនដុល្លារទាក់ទងការធ្វើអធិប្បាយចោទប្រកាន់រដ្ឋាភិបាលជាអ្នកនៅពីក្រោយការបាញ់សម្លាប់លោកបណ្ឌិត កែម ឡី ។ តាមរយៈដីកាកោះហៅលោក គឹម សុខ ព្រះរាជអាជ្ញាបានបង្គាប់ឲ្យសមត្ថកិច្ចត្រួតពិនិត្យច្រកព្រំដែនទាំងផ្លូវគោក ផ្លូវទឹក និងផ្លូវអាកាស និង ហាមឃាត់ឈ្មោះ គឹម សុខ ជាជនសង្ស័យមិនឲ្យទៅក្រៅប្រទេស។
ដោយឡែក បន្ថែមពីលើបណ្ដឹងទាមទារសំណង់ជំងឺចិត្ត ៥០ម៉ឺនដុល្លារនេះលោកនាយករដ្ឋមន្ត្រី ហ៊ុន សែន បានប្ដឹងលោក គឹម សុខ មួយករណីថ្មីបន្ថែមទៀតពីបទ ចោទរដ្ឋាភិបាលបច្ចុប្បន្នបានបង្កើតឲ្យមានប្រព័ន្ធមួយ ដែលមានការសម្លាប់មនុស្សហើយ រកមុខឃាតកមិនឃើញដោយទាមទារសំណងជំងឺចិត្ត១០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ