ពលរដ្ឋតំបន់កូនកុក មិនព្រមចាកចេញពីដីទេទោះបីជាឲ្យលុយក្តី
ប្រជាពលរដ្ឋនៅតំបន់កូនកុក ខេត្តកោះកុង នៅថ្ងៃសៅរ៍ម្សិលមិញ បាននាំគ្នាតវ៉ាប្រឆាំងនឹងក្រុមហ៊ុនចិន Union Development group ដែលបានយកគ្រឿងចក្រកាយប្រឡាយធ្វើឲ្យប៉ះពាល់ដល់ដីដំណាំរបស់ប្រជាជន។ លោកអភិបាលស្រុកគិរីសាគរ ឃឹម ចន្ទឌី ប្រាប់វិទ្យុបារាំងនៅថ្ងៃអាទិត្យនេះ ថាពលរដ្ឋមិនអាចតាំងទីលំនៅនៅតំបន់កូនកុកនោះទេ ដោយដីត្រូវអភិវឌ្ឍហើយថាគួរតែមានដំណោះស្រាយផ្សេង។ ប៉ុន្តែតំណាងប្រជាពលរដ្ឋបានបង្ហាញជំហរថាពលរដ្ឋទាំងនោះ មិនព្រមចាកចេញពីដីទេ ទោះបីជាផ្តល់សំណងជាប្រាក់ក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
នៅថ្ងៃអាទិត្យនេះ ប្រជាជននៅតំបន់កូនកុកស្រុកគិរីសាគរ ខេត្តកោះកុង ប្រមាណជា៥០នាក់ដែលរងគ្រោះពីគម្រោងអភិវឌ្ឍរបស់ក្រុមហ៊ុន Union Development group បានជួបពិភាក្សាជាមួយអាជ្ញាធរដើម្បីដោះស្រាយទំនាស់ដីធ្លី។
អភិបាលស្រុកគិរីសាគរ លោក ឃឹម ចន្ទឌី បានឲ្យដឹងថាបញ្ហានេះប៉ះពាល់ដល់ប្រជាជន១៨គ្រួសារ ក្នុងនោះមាន២គ្រួសារជាជនចំណូលថ្មីដែលទៅរានកាប់ឆ្ការព្រៃយកដីស្នាក់នៅ។ បើតាមលោក ចន្ទឌី លំនៅដ្ឋានទាំង១៨គ្រួសារនោះខ្លះមានតែដំបូលខ្លះគ្មានជញ្ជាំងផងហើយទៀតខ្លះគ្រាន់តែបោះសសរតែប៉ុណ្ណោះ។ លោកថាដីភូមិតំបន់កូនកុកនោះមិនអាចឲ្យតាំងទីលំនៅបានទេព្រោះក្រសួងបរិស្ថានបានធ្វើសម្បទានឲ្យក្រុមហ៊ុន Union Development group ដើម្បីអភិវឌ្ឍគម្រោងទឹកស្អាតនិងអាងស្តុកទឹកវារីអគ្គិសនី។ ទោះយ៉ាងណាក្តី លោក ឃឹម ចន្ទឌី បញ្ជាក់ថា នឹងយកបញ្ហានេះ ទៅពិភាក្សាជាមួយអភិបាលខេត្ត ហើយពេលនេះ លោកបានសន្យាជាមួយប្រជាពលរដ្ឋថាឲ្យក្រុមហ៊ុនចិននោះ បញ្ឈប់សកម្មភាពរបស់គេសិន។
តំណាងប្រជាពលរដ្ឋលោក ទឹម ទុយ ប្រាប់វិទ្យុបារាំងថា គម្រោងរបស់ក្រុមហ៊ុនចិននៅតំបន់កូនកុកនេះ ប៉ះពាល់ដល់ដល់ប្រជាពលរដ្ឋជាង៥០គ្រួសារឯណោះ គឺទាំងអ្នកនៅលើនិងក្រោមប្រឡាយ។ លោក ទឹម ទុយ បានអះអាងថា ពួកគេនៅទីនោះមិនព្រមចាកចេញនោះទេទោះបីជាផ្តល់សំណងលុយកាក់ក្តី។
ជាមួយគ្នានេះ លោក អ៊ិន គង់ជិត មន្ត្រីស៊ើបអង្កេតសិទ្ធិមនុស្សអង្គការលីកាដូ ដែលបានតាមដានដំណើររឿងនេះ បានប្រាប់វិទ្យុបារាំងបន្ថែមថា ពលរដ្ឋដែលនៅភូមិរងការប៉ះពាល់ទាំងនោះ បានសំណូមពរឲ្យរដ្ឋាភិបាលនិងក្រុមហ៊ុនចិន អភិវឌ្ឍដោយឃ្វាងចេញពីដីសម្រាប់កសិកម្មនិងលំនៅដ្ឋានរបស់ពួកគេ។ លោក អ៊ិន គង់ជិត បានបញ្ជាក់ថា ពលរដ្ឋខ្លះ គឺអ្នកភូមិចាស់និងជាអតីតខ្មែរក្រហម ដែលបានកាន់កាប់ដីយូរណាស់មកហើយ។ គួរជម្រាបជូនថា ក្រុមហ៊ុន Union Development group បានអនុវត្តគម្រោងតាំងពីឆ្នាំ២០១០ នៅស្រុកបទុមសាគរនិងគិរីសាគរ ហើយធ្វើឲ្យប៉ះពាល់ដល់ពលរដ្ឋ៥ឃុំ មាន១១៦៣គ្រួសារ ហើយបច្ចុប្បន្ននៅសល់តែ៣១៨តែប៉ុណ្ណោះ ដែលបន្តក្រាន់ននៀលទ្រាំនៅលើដីនោះដដែល តែជាង៧០០គ្រួសារផ្សេងទៀត បានត្រូវជម្លៀសចេញទាំងបង្ខំទៅភូមិថ្មី ដែលនៅខ្វះខាតសេវកម្ម និងមិនអាចប្រកបជីវភាពដូចមុនទៀត។
សូមបញ្ជាក់ថា នៅខេត្តកោះកុង ពេលកន្លងទៅ ក្រុមហ៊ុន Union Development Group បានមានទំនាស់ជាមួយប្រជាពលរដ្ឋ នៅស្រុកបទុមសាគរ និងស្រុកគិរីសាគរ ហើយបានឈានដល់ការបណ្តេញប្រជាជនចេញពីលំនៅដ្ឋាន ឈូសឆាយនិងដុតបំផ្លាញផ្ទះរបស់ប្រជាពលរដ្ឋអស់ជាច្រើនខ្នងទៀតផង។ នៅថ្ងៃអាទិត្យនេះ វិទ្យុបារាំង RFI មិនបានអាចទាក់ទងសុំការបំភ្លឺណាមួយពីសំណាក់ក្រុមហ៊ុនចិន Union Development group បាននៅឡើយទេដោយសារទូរសព្ទគ្មានអ្នកទទួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ