ក្រសួងយុត្តិធម៌កោះប្រជុំមន្រ្តីតុលាការបន្ទាន់ ករណីឃុំខ្លួនបណ្តោះអាសន្នក្នុងសំណុំរឿងដីធ្លី
រដ្ឋមន្រ្តីក្រសួងយុត្តិធម៌លោក អង្គ វង្សវឌ្ឍានា កាលពីថ្ងៃទី១៥មីនា ម្សិលមិញនេះ បានសរសេរលិខិតកោះប្រជុំជាបន្ទាន់ ជាមួយនឹងប្រធានតុលាការសាលាដំបូងរាជធានី-ខេត្ត និងព្រះរាជអាជ្ញាទាំងអស់នៅទូទាំងប្រទេស ជុំវិញគោលការណ៍នៃការឃុំខ្លួនបណ្តោះអាសន្នក្នុងសំណុំរឿងទំនាស់ដីធ្លី។ កិច្ចប្រជុំដែលគ្រោងនឹងធ្វើឡើងនៅចុងសប្តាហ៍នេះ គឺនៅបន្ទាប់ពីមានបទបញ្ជារបស់នាយករដ្ឋមន្រ្តី ហ៊ុន សែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
យោងតាមលិខិតរបស់លោក អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌កម្ពុជា ចុះថ្ងៃទី១៥មីនា បានកោះអញ្ជើញមន្រ្តីតុលាការ ដែលជាប្រធានសាលាដំបូង និងព្រះរាជអាជ្ញានៃអយ្យការអមសាលាដំបូងរាជធានី-ខេត្តទាំងអស់ ចូលរួមកិច្ចប្រជុំនេះ នៅរសៀលថ្ងៃទី១៨ ខែមីនាខាងមុខ។ កិច្ចប្រជុំដែលគ្រោងធ្វើឡើង នៅទីស្តីការក្រសួងយុត្តិធម៌ក្នុងទីក្រុងភ្នំពេញ នាចុងសប្តាហ៍នេះ នឹងផ្តោតទៅលើគោលការណ៍ និងនីតិវិធីនៃការឃុំខ្លួនបណ្តោះអាសន្ន ក្នុងសំណុំរឿងទំនាស់ដីធ្លី។
យោងតាមលិខិតដដែលនេះ លោករដ្ឋមន្រ្តីថែមទាំងបានបង្គាប់បញ្ជាឲ្យលោក-លោកស្រីដែលជាប្រធានតុលាការសាលាដំបូង និងព្រះរាជអាជ្ញានៃអយ្យការអមសាលាដំបូងរាជធានី-ខេត្តទាំងអស់ ប្រមូលទិន្នន័យ និងរាយការណ៍ ពីទិន្នន័យ ស្តីពី ការឃុំខ្លួនបណ្តោះអាសន្ននៅក្នុងសំណុំរឿងទំនាស់ដីធ្លីនេះ។
សូមបញ្ជាក់ថា ការកោះប្រជុំបន្ទាន់នេះ បានធ្វើឡើង ក្រោយពីមានការបញ្ជាផ្ទាល់ពីលោកនាយករដ្ឋមន្រ្តី ហ៊ុន សែន។ លោកនាយករដ្ឋមន្រ្តី ហ៊ុន សែន កាលពីដើមសប្តាហ៍នេះ បានបង្ហាញការខកចិត្តយ៉ាងខ្លាំង ចំពោះតុលាការខេត្តកំពង់ស្ពឺ ដែលបានឃុំខ្លួនតំណាងប្រជាពលរដ្ឋពីរនាក់នៅក្នុងសំណុំរឿងទំនាស់ដីធ្លីមួយកន្លែង ស្ថិតនៅក្នុងស្រុកភ្នំស្រួចខេត្តកំពង់ស្ពឺ។ ក្រៅពីសំដែងការខកចិត្ត លោកនាយករដ្ឋមន្រ្តី ក៏បានបញ្ជាឲ្យកូនប្រុសពីរនាក់របស់លោក គឺលោក ហ៊ុន ម៉ានិត និងលោក ម៉ានី ធ្វើដំណើរទៅកាន់ខេត្តកំពង់ស្ពឺទាំងយប់ ដើម្បីជួយដោះស្រាយករណីនេះ និងបានបញ្ជាទៅអភិបាលខេត្តកំពង់ស្ពឺ ឱ្យធ្វើការជាមួយតុលាការទាំងយប់ ដើម្បីសុំធានាឱ្យតំណាងប្រជាពលរដ្ឋទាំង២នាក់ បានស្ថិតនៅក្រៅឃុំ។ ស្តែងចេញពីករណីនៅក្នុងខេត្តកំពង់ស្ពឺនេះ លោកនាយករដ្ឋមន្រ្តី ក៏បានបញ្ជាទៅកាន់ក្រសួងយុត្តធម៌ ឲ្យពិនិត្យមើលករណីនេះជាបន្ទាន់។
គួរកត់សម្គាល់ថា បញ្ហាទំនាស់ដីធ្លីនៅក្នុងប្រទេសកម្ពុជា គឺជារឿងស្មុគស្មាញមួយ ហើយដែលក្រុមអង្គការសង្គមស៊ីវិល ដែលធ្វើការលើបញ្ហាដីធ្លី ធ្លាប់បានព្រមានពីបដិវត្តន៍ដីធ្លីថា អាចនឹងកើតមានឡើង ប្រសិនបើរដ្ឋាភិបាលកម្ពុជា មិនប្រញ៉ាប់ប្រញ៉ាល់ដោះស្រាយឲ្យទាន់ពេលវេលាទេនោះ។ អ្នកឃ្លាំមើលបញ្ហាទំនាស់ដីធ្លីនៅកម្ពុជា បានលើកឡើងថា ប្រជាពលរដ្ឋ ក្រៅតែជាជនរងគ្រោះដោយសារការរំលោភយកដីធ្លីហើយ ពួកគាត់ក៏ជាជនរងគ្រោះដោយសារ ប្រព័ន្ធតុលាការថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ