អ្នកនាំពាក្យរដ្ឋសភា៖ សមាជិកសភា និងគ.ជ.បថ្មីនឹងត្រូវប្រកាសសុពលភាពនៅដើមខែក្រោយ
លោកឡេង ប៉េងឡុង អ្នកនាំពាក្យរដ្ឋសភាខ្មែរ បានបង្ហើបប្រាប់វិទ្យុបារាំងអន្តរជាតិនៅព្រឹកនេះថា សមាជិកសភាថ្មីដែលកើតចេញពីការបែងចែកអាសនៈអតីតបក្សសង្រ្គោះជាតិ និងសមាជិកគ.ជ.បថ្មីចំនួនបីរូបទៀត នឹងត្រូវរដ្ឋសភាប្រកាសសុពលភាពឲ្យចូលធ្វើការងារនៅដើមខែក្រោយនេះ។ ការបញ្ជាក់នេះ គឺបន្ទាប់ពីគ.ជ.ប បានបញ្ចប់ការបែងចែកអាសនៈអតីតបក្សសង្រ្គោះជាតិនិងបានបញ្ជូនភ្លាមទៅកាន់រដ្ឋសភានៅព្រឹកថ្ងៃព្រហស្បតិ៍នេះ។
ចុះផ្សាយនៅថ្ងៃ៖
ស្តាប់ - ០២:៤៧
គណៈកម្មាធិការជាតិរៀបចំការបោះឆ្នោត(គ.ជ.ប)បានបញ្ចប់ការបែងចែកអាសនៈរបស់អតីតគណបក្សសង្រ្គោះជាតិដែលត្រូវរំលាយទៅឲ្យគណបក្សមិនជាប់ឆ្នោតទាំង៦គណបក្សរួចហើយ ដោយគណបក្សហ៊្វុនស៊ិនប៉ិច ទទួលបាន៤១អាសនៈ គណបក្សសញ្ជាតិកម្ពុជាទទួលបាន ២អាសនៈ គណបក្សខ្មែរអភិវឌ្ឍន៍សេដ្ឋកិច្ច ១អាសនៈ គណបក្សខ្មែរឈប់ក្រ ៥អាសនៈ និងគណបក្សសម្ព័ន្ធដើម្បីប្រជាធិបតេយ្យបាន៦អាសនៈ។ ចំណែកគណបក្សសាធារណរដ្ឋប្រជាធិបតេយ្យវិញ មិនទទួលបានអាសនៈទេដោយសារតែទទួលបានសំឡេងគាំទ្រតិចពេកកាលពីបោះឆ្នោតឆ្នាំ២០១៣។
បន្ទាប់ពីបែងចែកអាសនៈទាំងនេះរួច គណៈកម្មាធិការជាតិរៀបចំការបោះឆ្នោត(គ.ជ.ប)ក៏បានបញ្ជូនបញ្ចីអាសនៈថ្មីនេះទៅកាន់រដ្ឋសភាភ្លាមៗតែម្តង ដើម្បីឲ្យអនុវត្តទៅតាមនីតិវិធីបន្ត។ ប៉ុន្តែសម្រាប់បញ្ជីថ្មីនេះ គឺមិនទាន់គ្រប់ចំនួនទាំង៥៥កៅអីនៅឡើយទេ ដោយសារតែគណបក្សសម្ព័ន្ធដើម្បីប្រជាធិបតេយ្យដែលទទួលបាន៦អាសនៈ និងគណបក្សខ្មែរឈប់ក្រ ដែលទទួលបាន៥អាសនៈ បដិសេធមិនទទួលយក។ ដូច្នេះ គឺនៅសល់កៅអីទំនេរចំនួន១១ ទៀតដែលត្រូវគ.ជ.បធ្វើការបែងចែកជាលើកទីពីរ។ ទោះបីមិនទាន់រៀបរយ១០០ភាគរយ ប៉ុន្តែគណៈកម្មាធិការជាតិរៀបចំការបោះឆ្នោតត្រូវតែបញ្ជូនបញ្ជីថ្មីនេះទៅរដ្ឋសភា ដើម្បីឲ្យស្របតាមពេលកំណត់នៃការបែងចែកអាសនៈដែលកម្រិតដោយច្បាប់ថ្មីស្តីការជ្រើសរើសតំណាងរាស្រ្ត។ នេះបើតាមការបញ្ជាក់របស់លោកសោម សូរីដា ។ លោកសោម សូរីដា ដែលជាអគ្គលេខាធិការរងគ.ជ.ប បានអះអាងទៀតថា នៅជំហានបន្ទាប់ គ.ជ.ប នឹងធ្វើការបែងចែកអាសនៈដែលនៅសល់ចំនួន១១កៅអីទៅឲ្យគណបក្សដែលព្រមទទួលយក។
បើទោះបីបញ្ជីឈ្មោះសមាជិកសភាបឋមនេះ បានបញ្ជូនទៅដល់រដ្ឋសភាទៅហើយក៏ដោយ ប៉ុន្តែលោកឡេង ប៉េងឡុង អ្នកនាំពាក្យរដ្ឋសភាបានគូសបញ្ជាក់ថា សភាកំពុងតែពិចារណាទទួលយកបញ្ជីឈ្មោះបឋមនេះមកពិនិត្យ ឫក៏រង់ចាំបញ្ជីចុងក្រោយដែលមានគ្រប់កៅអីតែម្តង។ នេះ ដោយសារតែលោកអះអាងថា គ.ជ.ប នឹងបញ្ជូនបញ្ជីឈ្មោះសមាជិកសភាថ្មីទាំងអស់មកកាន់រដ្ឋសភាមិនឲ្យផុតថ្ងៃទី១ធ្នូ ខែក្រោយនេះឡើយ។ បើតាមលោកឡេង ប៉េងឡុង បន្ទាប់ពីនោះ រដ្ឋសភានឹងរៀបចំទទួល និងប្រកាសសុពលភាពសមាជិកសភាថ្មី ហើយក្នុងពេលជាមួយគ្នានោះ រដ្ឋសភាក៏នឹងសម្រេចជ្រើសរើសសមាជិកគ.ជ.បថ្មីចំនួនបីនាក់ ដើម្បីជំនួសសមាជិកកូតាបក្សប្រឆាំងដែលបានលាលែងពីតំណែង។ លោកឡេង ប៉េងឡុង បានបង្ហាញឲ្យដឹងថា សមាជិកគ.ជ.បថ្មី នឹងជ្រើសរើសចេញពីគណបក្សដែលមានអាសនៈក្នុងរដ្ឋសភា តែមិនមែនគណបក្សក្នុងរដ្ឋាភិបាលឡើយ។
យ៉ាងណាក៏ដោយ លោកនាយករដ្ឋមន្រ្តីហ៊ុន សែន កាលពីពុធ បានបញ្ចេញយោបល់ជាសាធារណៈជុំវិញសមាសភាពថ្មីរបស់គ.ជ.បដោយបញ្ជាក់ថា តំណែងអនុប្រធាននៃស្ថាប័ននេះ គួរតែឲ្យទៅគណបក្សហ្វ៊ុនស៊ិនប៉ិច ហើយសមាជិក គួរតែឲ្យទៅគណបក្សសញ្ជាតិកម្ពុជា។ ចំណែកសមាជិកមួយរូបទៀត លោកនាយករដ្ឋមន្រ្តីចង់យកចេញពីអង្គការក្រៅរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ