មេធាវីគ្រោងប្តឹងតុលាការឲ្យចេញការសម្រេចថាត្រូវលើកលែងការចោទប្រកាន់ ឫត្រូវជំនុំជម្រះមន្ត្រីអាដហុកនិងគ.ជ.ប
មេធាវីការពារក្តីឲ្យមន្ត្រីសិទ្ធិមនុស្សអាដហុក និងគ.ជ.ប បានថ្លែងប្រាប់វិទ្យុអន្តរជាតិនៅព្រឹកនេះថា នឹងដាក់ពាក្យប្តឹងមួយទៅកាន់តុលាការក្រុងភ្នំពេញនៅអង្គការស្អែកនេះ ដើម្បីទាមទារឲ្យចៅក្រមចេញដីកាដំណោះស្រាយលើសំណុំរឿងកូនក្តីរបស់ខ្លួន។ ដីកាដំណោះស្រាយនេះ គឺជាការសម្រេចរបស់ចៅក្រមថាត្រូវលើកលែងការចោទឫក៏ត្រូវយកសំណុំរឿងពួកគេទៅជំនុំជម្រះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
មូលហេតុដែលតម្រូវឲ្យមេធាវីត្រូវប្តឹងទៅកាន់សាលាដំបូងរាជធានីភ្នំពេញនេះ ក៏ព្រោះតែមកដល់ពេលនេះទៅហើយ ខាងតុលាការមិនទាន់ចេញដីកាដំណោះស្រាយលើសំណុំរឿងមន្ត្រីសិទ្ធិមនុស្សអាដហុក៤នាក់ និងអគ្គលេខាធិការរងគ.ជ.បម្នាក់ទៀតនៅឡើយ។ លោកមេធាវីសំ សុគង់ បានពន្យល់ថា តាមនិតីវិធីគឺចៅក្រមមានរយៈពេល២០ថ្ងៃប៉ុណ្ណោះក្នុងការចេញដីកាដំណោះស្រាយនេះ បន្ទាប់ពីបិទការស៊ើបសួរ។ ការស៊ើបសួរលើសំណុំរឿងមន្ត្រីសិទ្ធិមនុស្ស ត្រូវបានបិទកាលពីថ្ងៃទី៧ ខែធ្នូ ឆ្នាំ២០១៦ ដែលមកពេលនេះ គឺជាងមួយខែទៅហើយតែចៅក្រមនៅតែមិនទាន់ចេញដីកាដំណោះស្រាយទៀត។
ដីកាដំណោះស្រាយនេះ បើនិយាយឲ្យស្រួលយល់ទៅ គឺជាសេចក្តីសម្រេចមួយរបស់តុលាការថាតើត្រូវលើកយកសំណុំរឿងមន្ត្រីសិទ្ធិអាដហុក និងគ.ជ.បទៅជំនុំជម្រះ ឫក៏ត្រូវលើកលែងការចោទប្រកាន់។ ទោះក្នុងន័យណាមួយក៏ដោយ សេចក្តីសម្រេចនេះត្រូវតែបង្ហាញពីហេតុផលឲ្យបានច្បាស់លាស់។
សូមបញ្ជាក់ថា មកដល់ថ្ងៃនេះ មន្ត្រីសិទ្ធិមនុស្សអាដហុកទាំង៤នាក់ និងមន្ត្រីគ.ជ.បម្នាក់ទៀតកំពុងជាប់ក្នុងពន្ធនាគារជាង៨ខែមកហើយ។ នៅថ្ងៃនេះ ក្រុមសកម្មជនដីធ្លីបឹងកក់ បានចាប់ផ្តើមធ្វើយុទ្ធនាការថ្ងៃចន្ទពណ៌ខ្មៅឡើងវិញផងដែរ បន្ទាប់ពីមន្ត្រីសិទ្ធិមនុស្សទាំងនេះមិនទាន់ត្រូវបានដោះលែងដូចតាមការបង្ហើបឲ្យដឹងពីសំណាក់លោកស ខេង រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជាកាលពីអំឡុងខែធ្នូកន្លងទៅ។
យ៉ាងណាក៏ដោយ គណបក្សប្រជាជនកម្ពុជា និងគណបក្សសង្គ្រោះជាតិគ្រោងនឹងជួបចរចាគ្នាឡើងវិញនៅក្រោយថ្ងៃទី១១មករា អាចប្រហែលជានៅក្នុងសប្តាហ៍នេះផងក៏មិនដឹង។ ជំនួបនេះ បើទោះបីជាមិនទាន់មានរបៀបវារៈជាក់លាក់ក៏ពិតមែន ក៏ប៉ុន្តែទំនងជាមិនមានអ្វីធំដុំជាងនិយាយអំពីការដោះលែងមន្ត្រីសិទ្ធិអាដហុក និងគ.ជ.ប និងសកម្មជនគណបក្សប្រឆាំងនោះឡើយ។ ប៉ុន្តែសម្រាប់លោកមេធាវីសំ សុគង់ រឿងចរចានយោបាយនិងផ្លូវច្បាប់ គឺជារឿងពីរផ្សេងគ្នា មានន័យថា លទ្ធផលចរចានោះបែបណាក៏ដោយ ក៏មេធាវីនៅតែអនុវត្តទៅតាមនីតិវីធីតាមច្បាប់តម្រូវដដែល ដើម្បីការពារដល់ជនរងគ្រោះដែលជាកូនក្តីរបស់ខ្លួន។
មន្ត្រីការពារសិទ្ធិមនុស្សអាដហុកទាំង៤នាក់រួមមានលោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី ត្រូវបានតុលាការក្រុងភ្នំពេញចោទប្រកាន់ពីបទសូកប៉ាន់សាក្សី។ រីឯលោកនី ចរិយាដែលជាអគ្គលេខាធិការរងគណៈកម្មាធិការជាតិរៀបចំការបោះឆ្នោតវិញ ត្រូវបានតុលាការចោទប្រកាន់ពីបទសមគំនិតក្នុងរឿងសូកប៉ាន់សាក្សីនៅក្នុងសំណុំរឿងអាស្រូវស្នេហារវាងលោកកឹម សុខា និងកញ្ញាស្រីមុំ។ ពួកគេទាំងនេះ ក៏ត្រូវតុលាការរាប់តាំងពីថ្នាក់ក្រោម ថ្នាក់កណ្តាល និងកំពូលទាត់ចោលសំណើសុំក្រៅឃុំជាបន្តបន្ទាប់ផងដែរនាពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ