ក្រុមមេធាវីនឹងដាក់សំណើសុំឲ្យលោក កឹម សុខា បានចូលរួមសវនាការនៅសាលាឧទ្ធរណ៍
នៅថ្ងៃចន្ទស្អែកនេះ ក្រុមមេធាវីការពារក្ដីឲ្យលោក កឹម សុខា ប្រធានបក្សប្រឆាំង នឹងដាក់សំណើទៅកាន់សាលាឧទ្ធរណ៍ ដើម្បីឲ្យលោក កឹម សុខា ដែលជាជនត្រូវចោទ បានចូលរួមនៅក្នុងសវនាការនាថ្ងៃទី២៦កញ្ញាខាងមុខ។ សវនាការនៅថ្ងៃទី២៦កញ្ញានេះ ផ្ដោតសំខាន់លើបណ្ដឹងជំទាស់នឹងការសម្រេចឃុំខ្លួនលោក កឹម សុខា របស់សាលាដំបូងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:២៨
ក្រុមមេធាវីការពារក្ដី ចង់ឲ្យសាលាឧទ្ធរណ៍និងកងកម្លាំងមានសមត្ថកិច្ច ប្រើប្រាស់គ្រប់មធ្យោបាយទាំងអស់ ដើម្បីធ្វើយ៉ាងណាឲ្យលោក កឹម សុខា បានចូលរួមសវនាការនៅសាលាឧទ្ធរណ៍ ដែលប្រព្រឹត្តទៅនៅថ្ងៃអង្គារទី២៦កញ្ញា។ លោក សំ សុគង់ មេធាវីម្នាក់របស់លោក កឹម សុខា បានអះអាងប្រាប់វិទ្យុបារាំងអន្ដរជាតិនៅថ្ងៃអាទិត្យនេះថា ក្នុងសំណុំរឿងព្រហ្មទណ្ឌ វត្តមានរបស់លោក កឹម សុខា ដែលជាជនត្រូវចោទនៅក្នុងសវនាការ គឺជាការចាំបាច់ខ្លាំងណាស់។ ចាំបាច់ ដើម្បីធានាថា ជនត្រូវចោទមានសិទ្ធិទទួលបាននូវការជំនុំជម្រះដោយយុត្តិធម៌និងត្រឹមត្រូវ ស្របតាមគោលការណ៍អន្ដរជាតិ។
មួយវិញទៀត បើតាមលោកមេធាវី សំ សុគង់ ជនត្រូវចោទមានសិទ្ធិការពារខ្លួន។ ដូច្នេះ ទាមទារឲ្យមានវត្តមានជនត្រូវចោទនៅក្នុងសវនាការ ដើម្បីឆ្លើយដោះបន្ទុកឬបង្ហាញភស្តុតាង បង្ហាញពីភាពគ្មានកំហុសរបស់ខ្លួន ទៅកាន់តុលាការ។ លោកមេធាវីដដែល បន្ថែមទៀតថា លោក កឹម សុខា មានឆន្ទៈចូលរួមនៅក្នុងសវនាការថ្ងៃអង្គារខាងមុខនេះ ដើម្បីមានឱកាសរៀបរាប់ពីរឿងហេតុជូនដល់អង្គសវនាការដោយផ្ទាល់។
សូមជម្រាបជូនថា សំណើរបស់ក្រុមមេធាវីដូច្នេះ ធ្វើឡើងបន្ទាប់ពីអគ្គនាយកដ្ឋានពន្ធនាគារ បង្ហាញភាពរួញរាក្នុងការបញ្ជូនខ្លួនលោក កឹម សុខា មកចូលរួមសវនាការ តាមសំណើសាលាឧទ្ធរណ៍។ នៅក្នុងលិខិតចុះថ្ងៃទី១៨កញ្ញា អគ្គនាយកពន្ធនាគារបានសម្ដែងក្ដីព្រួយបារម្ភពីបញ្ហាសន្តិសុខ សុវត្ថិភាព ក្នុងពេលបញ្ជូនខ្លួនលោកកឹម សុខា មកភ្នំពេញ និងទាំងក្នុងពេលលោក កឹម សុខា ចូលរួមសវនាការនៅសាលាឧទ្ធរណ៍។
រហូតមកទល់ពេលនេះ សាលាឧទ្ធរណ៍នៅមិនទាន់បង្ហាញជំហរជាក់ច្បាស់ណាមួយអំពីវត្តមានលោក កឹម សុខា នៅក្នុងសវនាការនៅថ្ងៃអង្គារទី២៦កញ្ញាទេ។ ប៉ុន្តែអ្នកនាំពាក្យសាលាឧទ្ធរណ៍ លោក ទូច ថារិទ្ធិ បានថ្លែងប្រាប់សារព័ត៌មានក្នុងស្រុកថា អវត្តមានជនត្រូវចោទ មិនប៉ះពាល់ដល់នីតិវិធីឡើយ ព្រោះសវនាការផ្ដោតលើបណ្ដឹងជំទាស់នឹងការសម្រេចឃុំខ្លួនលោក កឹម សុខា តែប៉ុណ្ណោះ។
យ៉ាងណាក៏ដោយ លោកមេធាវីសំ សុគង់ អះអាងថា ក្រុមមេធាវីការពារក្ដីនៅតែទាមទារឲ្យមានវត្តមានលោក កឹម សុខា នៅក្នុងសវនាការជាដាច់ខាត។ ហើយប្រសិនបើសាលាឧទ្ធរណ៍សម្រេចបើកសវនាការដោយគ្មានវត្តមានជនត្រូវចោទ នោះក្រុមមេធាវីនឹងពិចារណាថាតើនឹងត្រូវចូលរួមសវនាការដែរឬក៏អត់។ លើសពីនេះ ក្រុមមេធាវីនឹងបន្តប្ដឹងសារទុក្ខទៅកាន់តុលាការកំពូលទៀត ក្នុងករណីសាលាឧទ្ធរណ៍ប្រកាសសាលដីកាដោយគ្មានវត្តមានលោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ