ទេសចររាប់សែននាក់ចូលរួមឆ្លងឆ្នាំសាកលកាលពីយប់៣១ធ្នូ
ពិធីឆ្លងឆ្នាំសាកលបានប្រព្រឹត្តទៅកាលពីពាក់កណ្តាលអធ្រាត្រថ្ងៃទី ៣១ ធ្នូដោយមានភាពអធិកអធមទាំងនៅទីក្រុងភ្នំពេញនិងបណ្តាខេត្តទេសចរណ៍ធំៗ។ នៅភ្នំពេញមានមនុស្សច្រើនម៉ឺននាក់ នៅសៀមរាបមាន១០ម៉ឺននាក់ និងក្រុងព្រះសីហនុជាង ១១ ម៉ឺននាក់។ ដោយឡែកពលរដ្ឋខ្មែរដែលចាកចេញទៅបរទេសក៏កើនឡើងដែរ។ ឆ្នាំនេះ ជាលើកដំបូងដែលកម្ពុជារៀបចំឆ្លងឆ្នាំសាកលថ្នាក់ជាតិនៅទូទាំងប្រទេស។
ចុះផ្សាយនៅថ្ងៃ៖
ស្តាប់ - ០២:២៣
នៅភ្នំពេញ មនុស្សម្នាក្មេងចាស់ ប្រុសស្រីច្រើនម៉ឺននាក់បានជួបជុំគ្នាដើម្បីឆ្លងឆ្នាំសាកលនៅកោះពេជ្រនិងនៅសណ្ឋាគារ កាំបូឌីយ៉ាណាដែលធ្វើឲ្យចរាចរណ៍មានសភាពចង្អៀតយ៉ាងខ្លាំងកាលពីល្ងាចថ្ងៃទី៣១ធ្នូ។ យ៉ាងណាក៏ដោយ សាលារាជធានីភ្នំពេញមិនបានបង្ហាញតួលេខច្បាស់លាស់ស្តីពីចំនួនអ្នកចូលរួមឆ្លងឆ្នាំសាកលនេះទេ។ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានបញ្ជាក់ថា នេះជាលើកទី១ហើយដែលមានការរៀបចំឆ្លងឆ្នាំសាកលថ្នាក់ជាតិនៅកម្ពុជា។ សាលារាជធានីភ្នំពេញបានរៀបចំឲ្យមានការប្រគុំតន្ត្រី ការសម្តែងសិល្បះ មានបាញ់កាំជ្រួចផងដែរ។
នៅឯខេត្តសៀមរាប អ្នកទេសចរប្រមាណជា ១០ ម៉ឺននាក់ក៏បានទៅចូលរួមអបអរពិធីឆ្លងឆ្នាំសាកលក្នុងរយៈពេល៣ថ្ងៃនេះដែរដោយរាប់ចាប់ពីថ្ងៃទី២៩ដល់៣១ធ្នូ ក្នុងនោះទេសចរបរទេសមានប្រហែលជិត ៣ម៉ឺននាក់។ នេះបើយោងតាមប្រធានមន្ទីរទេសចរណ៍ខេត្តសៀមរាបលោក ង៉ូវ សេងកាក់ ដែលបានថ្លែងប្រាប់វិទ្យុបារាំងអន្តរជាតិនៅថ្ងៃទី១មករានេះ។ លោកបញ្ជាក់ថា ខេត្តសៀមរាបមានបន្ទប់ផ្ទះសំណាក់និងសណ្ឋាគារគ្រប់គ្រាន់សម្រាប់ទទួលភ្ញៀវទេសចរ។
ដោយឡែក ទីក្រុងមាត់សមុទ្រ ក្រុងព្រះសីហនុឯណោះវិញ ក៏មានអ្នកទេសចរជាតិនិងអន្តរជាតិប្រមាណជាង ១១ម៉ឺននាក់ទៅឆ្លងឆ្នាំសាកលនៅទីនោះក្នុងនោះមានភ្ញៀវបរទេសជាង ១ម៉ឺន៣ពាន់នាក់ ។ លោក នូ សុផល ប្រធានមន្ទីរទេសចរណ៍ខេត្តព្រះសីហនុបនាឲ្យដឹងថា ចំនួនភ្ញៀវទេសចរក្នុងអំឡុងពេលឆ្លងឆ្នាំសាកលឆ្នាំនេះមានប្រហាក់ប្រហែលកាលពីឆ្នាំទៅដែរ។ លោកទទួលស្គាល់ថា ម្ចាស់សណ្ឋាគារ និងផ្ទះសំណាក់មួយចំនួនបានបំពានសេចក្តីណែនាំរបស់មន្ទីរទេសចរណ៍ដោយដំឡើងថ្លៃបន្ទប់ស្នាក់នៅខ្ពស់ខុសពីធម្មតា។
ក្រៅពីភ្ញៀវទេសចរដែលធ្វើដំណើរកម្សាន្តក្នុងស្រុក ក៏មានដែរភ្ញៀវទេសចរខ្មែរដែលចាកចេញទៅក្រៅប្រទេសក្នុងអំឡុងបុណ្យឆ្លងឆ្នាំសាកលនេះ។ លោក អាង គឹមអ៊ាង ប្រធានសមាគមភ្នាក់ងារទេសចរណ៍កម្ពុជាឲ្យដឹងថា មានប្រទេស៤ដែលមានអ្នកចេញទៅច្រើនជាងគេគឺ សិង្ហបូរី ម៉ាឡេស៊ី ថៃ និង ចិន។ ប្រទេសទាំង៤នេះបានស្រូបទាញទេសចរខ្មែរលើសឆ្នាំមុនពី១៥ទៅ២០ភាគរយ។ លោក អាង គឹមអ៊ាង កត់សម្គាល់ទៀតថា ឆ្នាំនេះ ក៏មានអ្នកទេសចរខ្មែរចាកចេញទៅកាន់គោលដៅថ្មីចំនួនបីដែរគឺ អឺរ៉ុប អូស្ត្រាលី និងមជ្ឈឹមបូព៌ា។ យ៉ាងណាក៏ដោយ លោកមិនអាចបញ្ជាក់តួលេខច្បាស់លាស់អំពីភ្ញៀវទេសចរខ្មែរដែលចេញទៅក្រៅប្រទេសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ