តើអ្នកកាសែតស្រុកខ្មែរចង់និយាយប្រាប់លោក ហ៊ុន សែន អ្វីខ្លះ?
តាមគម្រោងថ្ងៃស្អែកនេះ លោកនាយករដ្ឋមន្ត្រី ហ៊ុន សែន នឹងទទួលជួបជុំអ្នកកាសែតទូទាំងប្រទេស ប្រមាណជា១ពាន់នាក់។ អ្នកកាសែតខ្លះ បានត្រៀមសំណួរនិងយោបល់ជាស្រេចដើម្បីនិយាយប្រាប់ប្រមុខរដ្ឋាភិបាល ប្រសិនជាមានឱកាស។ ប៉ុន្តែអ្នកខ្លះទៀត គិតថាជំនួបនេះជារឿងធម្មតា ហើយពួកគេក៏គ្មានចង់និយាយអ្វីប្រាប់លោក ហ៊ុន សែន ទៀតដែរ ព្រោះពួកគេសរសេរនិងនិយាយរាល់ថ្ងៃទៅហើយ។
ចុះផ្សាយនៅថ្ងៃ៖
ស្តាប់ - ០២:១៥
លោក ជាង សុខា ប្រធានគ្រប់គ្រងព័ត៌មានរបស់កាសែតខ្មែរថាមស៍ បានប្រាប់វិទ្យុបារាំងថា ប្រសិនបើមានឱកាសនិយាយចំពោះមុខនាយករដ្ឋមន្ត្រី លោកនឹងលើកឡើងពីសារៈសំខាន់នៃសារព័ត៌មានដែលជួយបម្រើសង្គម ហើយអ្នកកាសែតជើងចាស់រូបនេះ ចង់ប្រាប់លោក ហ៊ុន សែន ឲ្យពិនិត្យមើលមន្ត្រីអ្នកនាំពាក្យតាមក្រសួងនានាដែលបានតែងតាំងហើយ តែគ្មានពាក្យនាំ ហើយគ្មានកិច្ចសហការល្អជាមួយអ្នកកាសែត។ តាមលោក ជាង សុខា, បើមានកិច្ចសហការល្អពីមន្ត្រីអ្នកនាំពាក្យ គឺនឹងធ្វើឲ្យការផ្តល់ព័ត៌មានដល់មហាជនបានទូលំទូលាយ និងច្បាស់លាស់។
រីឯកញ្ញា យ៉ាន់ លីណា និពន្ធនាយិកាសារព័ត៌មាននៃវិទ្យុវាយោ ចង់សុំសម្ភាសផ្ទាល់ជាមួយលោកនាយករដ្ឋមន្ត្រី ពីជីវិតឯកជនរបស់លោក ហ៊ុន សែន ផ្ទាល់តែម្តង។ ធ្វើជាអ្នកកាសែត៨ឆ្នាំហើយនោះ កញ្ញា យ៉ាន់ លីណា មិនចង់និយាយពីរឿងនយោបាយអ្វីទេ ប៉ុន្តែចង់ដឹងពីការលំបាកនានាដែលលោកប្រមុខរដ្ឋាភិបាលរូបនេះជួបប្រទះ ហើយក៏ចង់ដឹងដែរថា តើបន្ទាប់ពីកាន់អំណាច៥អាណត្តិមកនេះ មានប៉ុន្មានដង ដែលលោកលំបាកខ្លាំង និងនឹកចង់ចាកចេញពីតំណែងព្រោះតែសម្ពាធ?
ចំណែក លោក កៃ គឹមសុង នាយកនិពន្ធកាសែតភ្នំពេញ និយាយថា បើក្នុងនាមស្ថាប័នកាសែតរបស់លោក គឺលោកគ្មានអ្វីត្រូវនិយាយទេ។ លោកគ្រាន់តែចង់ទៅចូលរួមស្តាប់នាយករដ្ឋមន្ត្រីតែប៉ុណ្ណោះ។ ប៉ុន្តែបើក្នុងនាមខ្លួនលោកផ្ទាល់, អ្នកកាសែតជើងចាស់រូបនេះ ចង់លើកឡើងពីសេរីភាពសារព័ត៌មានប្រាប់លោក ហ៊ុន សែន និងចង់ប្រាប់ថាមានការអើសអើងអ្នកកាសែតនៅកន្លែងផ្សេងៗ ហើយលោកឲ្យរដ្ឋាភិបាលធានាថាកុំឲ្យមានករណីសម្លាប់អ្នកកាសែត ឬធ្វើទុក្ខបុកម្នេញអ្នកកាសែតដោយសារតែសំណេររបស់ពួកគេ។
ចំណែកអ្នកកាសែតផ្សេងទៀត ដែលសុំមិនបញ្ចេញឈ្មោះ ប្រាប់ថា គ្មានអ្វីពិសេសនោះទេ គឺគ្មានតែជាជំនួបទទួលទានអាហារធម្មតា ហើយពួកគេគ្មានចង់ប្រាប់ ចង់និយាយអ្វីប្រាប់លោកនាយករដ្ឋមន្ត្រីទៀតទេ ព្រោះកិច្ចការសរសេរនិងការផ្សាយរបស់ពួកគេ បើលោក ហ៊ុន សែន ចង់ស្តាប់ ចង់មើល គឺលោកបានឃើញ និងស្តាប់បាន រៀងរាល់ថ្ងៃស្រាប់ហើយ។ អ្នកកាសែតខ្លះទៀត ដែលមិនបានចូលរួម រិះគន់ថា ការរៀបចំជំនួបនេះ គឺមានការអើសអើង និងបក្សពួក។
ជាការកត់សម្គាល់ សារព័ត៌មានធំៗមួយចំនួន វិទ្យុសំឡេងសហរដ្ឋអាមេរិក VOA បានបញ្ជូនឈ្មោះអ្នកកាសែត ៣នាក់ ទៅអ្នករៀបចំកម្មវិធី។ កាសែតខែមបូឌាដេលី Cambodia Daily ផ្ញើឈ្មោះ ២ នាក់ ហើយវិទ្យុបារាំងRFI ២នាក់។ ចំណែកសារព័ត៌មានវិទ្យុ VOD និងវិទ្យុអាស៊ីសេរី RFA គឺគ្មានការអញ្ជើញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ