ក្រសួងរ៉ែ បញ្ឈប់ការនាំខ្សាច់ចេញទៅលក់នៅក្រៅប្រទេស ខណៈអ្នកការពារបរិស្ថាន ថាគ្មានប្រសិទ្ធភាពទេ
ក្រសួងរ៉ែនិងថាមពល បានបញ្ឈប់ការនាំខ្សាច់គ្រប់ប្រភេទពីខេត្តកោះកុង ចេញទៅលក់នៅក្រៅប្រទេស។ នេះបើតាមសេចក្តីប្រកាសនិងសារាចររបស់រដ្ឋមន្ត្រី លោក ស៊ុយ សែម កាលពីម្សិលមិញ។ ការប្រកាសបញ្ឈប់នេះ គឺគ្មានកំណត់ពេលថានឹងបើកឲ្យនាំចេញខ្សាច់វិញ នៅពេលណាទេ។ ចំណែកអ្នកការពារបរិស្ថាននៅខេត្តកោះកុងនោះ យល់ថា វិធានដូច្នេះ គឺមិនមែនជារឿងថ្មីទេ ហើយលើកនេះទៀត ក៏នៅតែគ្មានប្រសិទ្ធភាពដែរ។
ចុះផ្សាយនៅថ្ងៃ៖
ស្តាប់ - ០២:៤៤
ចំពោះរាល់អាជីវកម្មនាំចេញខ្សាច់សំណងគ្រប់ប្រភេទនិងខ្សាច់ល្បាយភក់ ពីក្នុងខេត្តកោះកុង ចេញទៅលក់នៅក្រៅប្រទេស គឺត្រូវហាមឃាត់បញ្ឈប់ជាស្ថាពរចាប់ពីពេលនេះតទៅ ហើយក៏គ្មានកំណត់ពេលឲ្យបើកការនាំចេញវិញដែរ។ ការបញ្ឈប់នេះ គឺត្រូវក្រសួងរ៉ែពន្យល់ថា ដើម្បីជៀសវាងការបង្កផលប៉ះពាល់ជាអវិជ្ជមានដល់បរិស្ថាន ជលសាស្ត្រ និងសង្គម រួមទាំងដើម្បីការពារផលប្រយោជន៍សាធារណៈរយៈពេលវែង។
ក្រសួងរ៉ែ យល់ឃើញទៀតថា ខ្សាច់និងខ្សាច់ល្បាយភក់ គឺជាធនធានរ៉ែមានតម្លៃ និងជាវត្ថុធាតុដើមសំខាន់ ចាំបាច់មិនអាចខ្វះបានសម្រាប់វិស័យសំណង់ និងការអភិវឌ្ឍហេដ្ឋារចនាសម្ព័ន្ធរូបវន្តនានា។ ដូច្នេះក្រៅពីបញ្ឈប់ការនាំចេញ ក្នុងការអនុវត្តអាជីវកម្មនៅក្នុងស្រុកវិញ ក្រសួងបានកំណត់គោលការណ៍សំខាន់ៗ យ៉ាងហោច៤ គឺដូចជាការធ្វើអាជីវកម្មប្រកបដោយការទទួលខុសត្រូវ មិនត្រូវបង្កផលប៉ះពាល់ដល់លំនឹងជលសាស្ត្រ ឬធ្វើឲ្យខូចបរិស្ថានធម្មជាតិ, មិនត្រូវបង្កឲ្យប៉ះពាល់ប្រែប្រួលទម្រង់សណ្ឋានរូបសាស្ត្រនៃផ្លូវទឹក ឬធ្វើឲ្យបាក់ច្រាំង, និងមិនត្រូវបំពុលគុណភាពទឹកជាដើម។
ថែមពីនេះ ក្រសួងបញ្ជាក់ថា ការទាញយកខ្សាច់ ពីស្ទឹងឬព្រែក គឺត្រូវកំណត់ជាក់លាក់ពីលក្ខខណ្ឌអាជីវកម្ម និងពីទំហំកម្លាំងម៉ាស៊ីនបូមខ្សាច់ទៀតផង ចាប់ពីកម្លាំង៣០សេះ ទៅដល់២០០សេះជាដើម ទៅតាមប្រភេទអាជីវកម្ម។ ការកំណត់ដូចនេះ សម្រាប់អនុវត្តនៅតាមស្ទឹងស្រែអំបិល, ស្ទឹងតាតៃ, ស្ទឹងត្រពាំងរូង និងស្ទឹងកោះប៉ោ ក្នុងខេត្តកោះកុង។
ដោយឡែក ចំពោះយុវជន ថុន រដ្ឋា សកម្មជនបរិស្ថាន របស់អង្គការមាតាធម្មជាតិ បានថ្លែងប្រាប់វិទ្យុបារាំង RFI ថាការបញ្ឈប់ការនាំចេញខ្សាច់គឺជាអ្វីដែលសកម្មជនបរិស្ថានបានស្នើសុំនិងទាមទារជាយូរមកហើយ។ ក៏ប៉ុន្តែ វិធានរបស់ក្រសួងរ៉ែលើកនេះ ក៏មិនមែនជារឿងថ្មីដែរ។ បើតាមលោក ថុន រដ្ឋា ដដែល, ចំណាត់ការរបស់ក្រសួង គឺមានតែត្រឹមលើក្រដាស ប៉ុន្តែសកម្មភាពជាក់ស្តែង គឺគ្មានប្រសិទ្ធិភាពទេ។ ការដែលលោកគិតថា គ្មានប្រសិទ្ធិភាព ព្រោះថា អាជ្ញាធរនៅតែមិនអាចហាមប្រាម បញ្ឈប់ជាដាច់ខាត់ចំពោះក្រុមហ៊ុនធំៗដែលធ្វើអាជីវកម្មនៅទីនោះ។
សកម្មជនចលនាមាតាធម្មជាតិរូបនេះ បានឲ្យដឹងទៀតថា ទន្ទឹមនឹងក្រសួងចេញលិខិតហាមដូច្នេះ មានក្រុមហ៊ុនមួយ ទើបតែសាងសង់រួច អាងសម្អាតខ្សាច់សម្រាប់នាំចេញថ្មីមួយទៀត នៅក្បែរកោះស្មាច់ ខេត្តកោះកុងនោះឯង។ ដូច្នេះ ចំពោះយុវជន ថុន រដ្ឋា, វិធានថ្មីរបស់ក្រសួង គ្រាន់តែជាក្រដាសបំភ័នភ្នែកពលរដ្ឋតែប៉ុណ្ណោះ។
បើតាមការបញ្ជាក់របស់លោក ថុន រដ្ឋា សកម្មជនឈរជើងនៅមូលដ្ឋាននោះស្រាប់, វិបត្តិនិងការប៉ះពាល់ពីការបូមខ្សាច់ បានកើតឡើងខ្លាំងជាង១០ឆ្នាំមកហើយ និងបានធ្វើឲ្យបាត់បង់លុយជាតិ រាប់រយម៉ឺនដុល្លារ ដែលមិនទាន់មានការបកស្រាយច្បាស់លាស់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ