ក្រសួងការពារជាតិ ប្រកាសជ្រើសរើសទាហានបន្ថែមជិត ៦០០នាក់
ចាប់ពីថ្ងៃទី ១ ខែកញ្ញា រហូតដល់ថ្ងៃទី ១៣ ខែវិច្ចិកា ឆ្នាំ២០១៥ ក្រសួងការពារជាតិ បាននឹងកំពុង ចែក និងទទួលពាក្យប្រឡងចូលបម្រើការងារជាទាហាន ពីសំណាក់ក្រុមយុវជនទាំងពីរភេទ ដែលមានអាយុចន្លោះពី ១៨ ដល់២៥ឆ្នាំ។ តាមសេចក្តីប្រកាស សម្រាប់ឆ្នាំសិក្សា ២០១៥-២០១៦នេះ ក្រសួងការពារជាតិ ត្រូវការទាហានថ្មី នៅទូទាំងប្រទេស ប្រមាណ ៦០០នាក់។ ហើយទាហានថ្មីទាំងនោះ នឹងបែកចែកឲ្យសិក្សាលើជំនាញ ៣វគ្គផ្សេងគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ក្រសួងការពារជាតិ បានប្រកាសជ្រើសរើសយុវជនប្រមាណ ៦០០នាក់ ដើម្បីចូលបម្រើការងារក្នុងផ្នែកទាហាន ៣វគ្គ សម្រាប់ឆ្នាំសិក្សា ២០១៥-២០១៦។ លោកនាយឧត្តមសេនីយ៍ឯក ប៊ុត សុភាព នាយករងសាលានាយទាហានសកម្ម និងជាសមាជិកក្នុងអនុគណៈកម្មាការជ្រើសរើសទាហានជំនាន់ថ្មី បានប្រាប់វិទ្យុបារាំងថា ក្រសួងការពារជាតិ ត្រូវការនាយទាហានបន្តវេន សម្រាប់វគ្គសិក្សារយៈពេល ៦ខែ ចំនួន ៣០០នាក់ វគ្គនាយទាហានទ័ពជើងគោក ១២០នាក់ និងវគ្គនាយទាហានសកម្ម ចំនួន ១២០ ដែលវគ្គសិក្សាទាំងពីរ មានរយៈពេល៤ឆ្នាំ។
លក្ខខណ្ឌដែលអាចចូលរួមនៅក្នុងការជ្រើសរើសនេះ គឺបេក្ខជនទាំងពីរភេទ ត្រូវមានសញ្ជាតិខ្មែរ មានអាយុពី ១៨ ដល់ ២៥ឆ្នាំ។ មានកាយសម្បទាគ្រប់គ្រាន់តាមតម្រូវការ ដើម្បីបំពេញមុខងារ។ មិនធ្លាប់ត្រូវបានតុលាការផ្តន្ទាទោស។ និងត្រូវមានសញ្ញាបត្រមធ្យមសិក្សាទុតិយភូមិ (បាក់ឌុប) ឬសញ្ញាបត្រប្រហាក់ប្រហែល ហើយប្រសិនបើមិនទាន់ទទួលបានសញ្ញាបត្របាក់ឌុបទេ ត្រូវមានការបញ្ជាក់ពីក្រសួងអប់រំសិន ទើបអាចដាក់ពាក្យបាន។
លោកឧត្តមសេនីយ៍ឯក ប៊ុត សុភាព បានបញ្ជាក់ថា ចំពោះយុវជនខ្មែរ ដែលចាប់អារម្មណ៍ អាចទៅយក និងដាក់ពាក្យនៅតាមមណ្ឌលចំនួន ៥ទូទាំងប្រទេស គឺនៅសាកលវិទ្យាល័យការពារជាតិ សម្រាប់រាជធានីភ្នំពេញ។ នៅយោធភូមិភាគទី១ ទី២ ទី៣ ទី៤ និងទី៥ នៅតាមបណ្តាខេត្តមួយចំនួន ដូចជា កំពង់ចាម កំពង់ស្ពឺ សៀមរាប និងខេត្តបាត់ដំបង។
ក្រោយពីទទួលបានពាក្យគ្រប់ចំនួនតាមតំរូវការហើយ នោះក្រសួងនឹងចាប់ផ្តើមការប្រឡងចំរាញ់បន្ត នៅថ្ងៃទី ២១ ២២ និង២៣ ខែធ្នូ ឆ្នាំ ២០១៥ខាងមុខ លើចំណេះដឹងយោធា ចំណេះដឹងទូទៅ និងកីឡា។ ក្នុងរយៈពេលដែលបេក្ខជន រងចាំការប្រឡង ក្រសួងក៏តំរូវឲ្យពួកគេ ត្រូវទៅពិនិត្យសុខភាពផងដែរ។ ពេលបញ្ចប់វគ្គសិក្សា កម្មសិក្សាការី ត្រូវធ្វើការប្រឡង ហើយនិងត្រូវបានដំឡើងឋានន្តរសក្តិ ពេលដែលប្រឡងជាប់។
សូមបញ្ជាក់ថា ជារៀងរាល់ឆ្នាំ ក្រសួងការពារជាតិ តែងតែប្រកាសជ្រើសរើសទាហានថ្មី ចូលបម្រើការងារ ខណៈទាហានចាស់មួយចំនួន ត្រូវចូលនិវត្តន៍។ កាលពីឆ្នាំមុន ក្រសួងការពារជាតិ បានទទួលពាក្យពីបេក្ខជនដែលចាប់អារម្មណ៍ជាង ២ពាន់នាក់ ខណៈតម្រូវការរាល់ឆ្នាំ មានប្រមាណ ៦០០នាក់។ តាមក្រសួងការពារជាតិ នេះគឺជាឱកាស និងជាចំណុចចាប់ផ្តើមនៃការកសាងអនាគត សម្រាប់យុវជន យុវនារី ចំពោះខ្លួនឯង ក្រុមគ្រួសារ និងជាតិមាតុភូមិ។ នាយទាហានវ័យក្មេងទាំងនេះ នឹងបានចូលរៀនសូត្រ ហ្វឹកហ្វឹន ហាត់ពុត លុតដំ ទាំងកាយសម្បទា ចិត្តគំនិត ប្រាជ្ញាស្មារតី សិក្សាទាំងចំណេះដឹង ផ្នែកវិទ្យាសាស្រ្ត យោធា និងវិទ្យាសាស្រ្តសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ