លោកម៉ៅ មុនីវណ្ណ៖ ទាហាននិងពលរដ្ឋវៀតណាមបានចូលមកបំផ្លាញដំណាំពលរដ្ឋខ្មែរជាង១០ហិកតា
នៅព្រឹកថ្ងៃអាទិត្យនេះ គណៈប្រតិភូមួយក្រុមរបស់គណបក្សសង្គ្រោះជាតិ ដឹកនាំដោយលោកម៉ៅ មុនីវណ្ណ បានធ្វើដំណើរចុះទៅកាន់ចំណុចជាំ៥ល្វែង ជាប់ព្រំដែនកម្ពុជា-វៀតណាម ដែលស្ថិតនៅក្នុង ភូមិជើង ឃុំជាំ ស្រុកមេមត់ ខេត្ដត្បូងឃ្មុំ ដើម្បីពិនិត្យ និងស៊ើបអង្កេតលើករណីទាហាននិងពលរដ្ឋវៀតណាមចូលមកបំផ្លាញដំណាំពលរដ្ឋខ្មែរ។ ក្រោយពិនិត្យជាក់ស្ដែង គណៈប្រតិភូបក្សប្រឆាំង បានអះអាងថា ដំណាំប្រជាពលរដ្ឋខ្មែរប្រមាណជាង១០ហិកតា ពិតជាត្រូវបានបំផ្លាញដោយទាហាន និងពលរដ្ឋវៀតណាមមែន។
ចុះផ្សាយនៅថ្ងៃ៖
ស្តាប់ - ០២:១៤
ដំណាំប្រជាពលរដ្ឋខ្មែរនៅតាមបណ្តោយព្រំដែនកម្ពុជា-វៀតណាម ដែលមានស្រូវ ពោត និងដំឡូងមីប្រមាណជាង១០ហិកតា ត្រូវបានទាហាន និងពលរដ្ឋវៀតណាមបានឆ្លងដែនចូលមកបាញ់ថ្នាំគីមីពុលសម្លាប់គ្មានសេសសល់។
លោកម៉ៅ មុនីវណ្ណ តំណាងរាស្ត្ររបស់គណបក្សសង្គ្រោះជាតិប្រចាំមណ្ឌលខេត្តកំពង់ចាម និង ជាអនុប្រធានគណៈកម្មការទី៩នៃរដ្ឋសភា ដែលបានដឹកនាំគណៈប្រតិភូមួយក្រុមចុះទៅពិនិត្យជាក់ស្ដែងនៅតំបន់នោះ បានបញ្ជាក់ប្រាប់វិទ្យុបារាំងអន្តរជាតិថា នៅពេលនេះដំណាំទាំងអស់នោះ បានងាប់ដូចបំណងរបស់ពលរដ្ឋ និងទាហានវៀតណាមហើយ។ លោកម៉ៅ មុនីវណ្ណ បានហៅទង្វើរបស់ពលរដ្ឋ និងទាហានវៀតណាមនោះថា គឺជាការមើលស្រាលលើរដ្ឋាភិបាល និង អធិបតេយ្យភាពជាតិរបស់កម្ពុជា។
លោកម៉ៅ មុនីវណ្ណ៖ “ ដំឡូងក៏ងាប់ ពោតក៏ងាប់ ហើយយើងឃើញថា ទិដ្ឋភាពបែបនេះ គឺថា គេធ្វើនេះដូចជាមើលស្រាលមកដល់រដ្ឋាភិបាលរបស់យើងហើយនឹងអធិបតេយ្យភាពជាតិយើងណាស់ ។ អ៊ីចឹងរដ្ឋាភិបាលត្រូវតែចាត់វិធានការដើម្បីដោះស្រាយបញ្ហានេះ ហើយគូរតែកោះអញ្ចើញស្ថានទូតវៀតណាមមកសួរនាំរឿងនេះឲ្យបានច្បាស់លាស់បាទ “។
សូមបញ្ជាក់ថា ហេតុការណ៍នៃការចូលមកបំផ្លាញដំណាំប្រជាពលរដ្ឋខ្មែរពីសំណាក់ប្រជាពលរដ្ឋ និងទាហានវៀតណាមនេះ បានកើតឡើងកាលពីថ្ងៃទី១៩ មេសា កន្លងទៅ។ ចំពោះហេតុការណ៍នេះ កងកម្លាំងការពារព្រំដែនកម្ពុជា បានបកស្រាយបញ្ជាក់ប្រាប់លោកម៉ៅ មុនីវណ្ណ និងគណៈប្រតិភូថា ដោយសារតែពួកគេបានជាប់ទៅចូលរួមពិធីបុណ្យចូលឆ្នាំថ្មីប្រពៃណីខ្មែរ ទើបមិនបានដឹងថា ពលរដ្ឋ និងទាហានវៀតណាមចូលមកបំផ្លាញដំណាំប្រជាពលរដ្ឋខ្មែរយ៉ាងដូច្នេះ។ សម្រាប់លោកម៉ៅ មុនីវណ្ណ ការដែលពលរដ្ឋ និងទាហានវៀតណាមចូលមកបំផ្លាញដំណាំពលរដ្ឋខ្មែរលើទឹកដីខ្មែរបែបនេះ គឺ មានបំណងចង់បាន ទឹកដីខ្មែរ។
ក្រសួងមហាផ្ទៃកម្ពុជា មិនអាចទាក់ទងសុំការអត្ថាធិប្បាយបាននោះទេចំពោះហេតុការណ៍ដែលប្រជាពលរដ្ឋ និងទាហានវៀតណាម បានចូលមកបំផ្លាញទ្រព្យសម្បត្តិប្រជាពលរដ្ឋខ្មែរ និងបំពានដែនអធិបតេយ្យភាពកម្ពុជានេះ។
យ៉ាងណាក៏ដោយ លោកម៉ៅ មុនីវណ្ណ បានលើកឡើងថា លោកនឹងរាយការណ៍រឿងនេះទៅកាន់ថ្នាក់ដឹកនាំរដ្ឋសភា ដើម្បីធ្វើអន្តរាគមន៍។ ជាមួយគ្នានេះ លោកក៏គ្រោងនឹងកោះអញើញរដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងការបរទេស និងគណៈកម្មការព្រំដែន ដើម្បីធ្វើការបកស្រាយ និងបំភ្លឺចំពោះករណីនេះផងដែរ។ បន្ថែមលើនេះ លោកម៉ៅ មុនីវណ្ណ បានព្រមានថា ប្រសិនបើរដ្ឋាភិបាលមិនដោះស្រាយ និងមិនមានវិធានការអ្វីទេនោះ លោកនឹងសូមការគាំទ្រពីតំណាងរាស្ត្រផ្សេងទៀត ដើម្បីធ្វើញត្តិស្តីបន្ទោសរដ្ឋាភិបាលតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ