កម្ពុជាអនុញ្ញាតឲ្យក្រុមហ៊ុនឯកជនមួយវិនិយោគលើប្រព័ន្ធ OTT ផ្តោតលើវិស័យព័ត៌មាន និងសោតទស្សន៍
ប្រព័ន្ធបច្ចេកវិទ្យាទំនើប OTT ដែលជាសមិទ្ធផលថ្មីខាងវិស័យព័ត៌មាន និងសោតទស្សន៍ ត្រូវបានរដ្ឋាភិបាល ផ្តល់សិទ្ធិវិនិយោគនៅកម្ពុជា។ ប្រព័ន្ធ OTT គឺជាទូរស្សន៍អ៊ីនធឺណេត ដែលប្រើបច្ចេកវិទ្យា ផ្សព្វផ្សាយចំរុះ មានកម្មវិធីប្លែក និងអាចប្រើបានគ្រប់ទីកន្លែងដែលមានភ្ជាប់អ៊ីនធឺណេត។ ការបង្ហាញពី ការវិនិយោគលើវិស័យផ្សព្វផ្សាយនេះ ត្រូវបានធ្វើឡើងនៅក្នុងសិក្ខាសាលាស្តីពីការប្រើប្រាស់ប្រព័ន្ធ OTT នៅព្រឹកថ្ងៃទី ៣០ កក្កដានេះ នៅឯសណ្ឋាគារសុខាភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ក្រុមហ៊ុន SuperNet បានទទួលអាជ្ញាប័ណ្ណពីក្រសួងព័ត៌មាន ចាប់តាំងពីឆ្នាំ ២០១៤ ដើម្បីធ្វើការវិនិយោគទៅលើប្រព័ន្ធ OTT នៅកម្ពុជា។ ប្រព័ន្ធ OTT (Over The Top Platform) គឺជាទូរទស្សន៍ អ៊ីនធឺណេត ដែលប្រើបច្ចេកវិទ្យាផ្សព្វផ្សាយសំបូរបែប។ សម្រាប់កម្មវិធីទូរទស្សន៍អាចមើលថយក្រោយ បានរហូតដល់ទៅ ៧ថ្ងៃ ឬ យូរជាងនេះទៅទៀត អាស្រ័យទៅលើការកំណត់របស់អាជ្ញាធរស្ថាប័នមាន សមត្ថកិច្ច និងក្រុមហ៊ុនប្រតិបត្តិករ។
លោកខៀវ កាញារីទ្ធិ រដ្ឋមន្ត្រីក្រសួងព័ត៌មានបានលើកឡើងនៅក្នុងឱកាសសិក្ខាសាលានេះថា ឆ្លងតាមការប្រើប្រាស់សាកល្បងនេះ ក្រុមហ៊ុនក៏ដូចជាក្រសួងស្ថាប័នមួយចំនួនទៀត ដែលមានដូចជាការសហការគ្នារវាងក្រុមហ៊ុន និងក្រសួងធម្មការ និងសាសនា រួមគ្នាបង្កើតប៉ុស្តិ៍សាសនា ក្នុងគោលបំណង លើកកម្ពស់ការប្រតិបត្តិសាសនាព្រះពុទ្ធ សហការគ្នាជាមួយនឹងក្រសួងការងារបណ្តុះបណ្តាលវិជ្ជាជីវៈ បង្កើតកម្មវិធីបណ្តុះបណ្តាលវិជ្ជាជីវៈតាមបណ្តាញអ៊ីនធឺណេត ក្នុងគោលបំណងពង្រីកការបណ្តុះបណ្តាលតាមប្រព័ន្ធបច្ចេកវិទ្យាទំនើបឲ្យសមស្របតាមស្ថានភាពសង្គម ដើម្បីអភិវឌ្ឍធនធានមនុស្សនៅកម្ពុជា។
សូមបញ្ជាក់ថា នៅពេលថ្មីនេះក៏មានក្រុមហ៊ុនចិនមួយឈ្មោះថា South East Asia Telecom co, Ltd បានវិនិយោគទឹកប្រាក់ចំនួន ៤០០លានដុល្លារអាមេរិក បើកបណ្តាញអ៊ីនធឺណេត 4G នៅកម្ពុជាផងដែរ។ ក្រុមហ៊ុននេះបានចាប់ផ្តើមសាងសង់តបណ្តាញរបស់ខ្លួនចាប់តាំងពីឆ្នាំ ២០១៤មក ហើយរហូតមកទល់នឹងពេលនេះ បណ្តាញអ៊ីនធឺណេត 4G ត្រូវបានគ្របដណ្តប់នៅតាមបណ្តារាជធានីខេត្ត និងតំបន់ទីប្រជុំជនចំនួន ១៧ ក្នុងនោះរួមមានរាជធានីភ្នំពេញ ខេត្តកណ្តាល ខេត្តព្រះសីហនុ ខេត្តសៀមរាប និងខេត្តបាត់ដំបងជាដើម ព្រមទាំងគ្របដណ្តប់ទាំងស្រុងតាមផ្លូវជាតិលេខ ១ លេខ៣ លេខ៤ លេខ៦ និងផ្លូវជាតិលេខ២ ពីភ្នំពេញទៅតាកែវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ