បញ្ញត្តិករ៖ក្រុមហ៊ុននិងសាខាចែកចាយនៅតែលក់ស៊ីមដោយគ្មានអត្តសញ្ញាណប័ណ្ណ
ជាថ្មីម្ដងទៀតបញ្ញត្តិករទូរគមនាគមន៍កម្ពុជាបានរំលឹកទៅ ប្រតិបត្តិករផ្ដល់សេវាទូរស័ព្ទចល័តទាំងអស់ ទាំងភ្នាក់ងារលក់ឬចែក ចាយ ឲ្យបញ្ឈប់ជាបន្ទាន់នូវការលក់ស៊ីមកាតឬផ្ដល់ស៊ីមកាតដោយគ្មាន អត្តសញ្ញាណប័ណ្ណដល់អតិថិជន។ ការរំលឹកនេះធ្វើឡើងបន្ទាប់ពីបញ្ញត្តិករមើលឃើញថា ក្រុមហ៊ុននិងសាខាចែកចាយបន្តនៅតែលក់ស៊ីមដោយគ្មានអត្តសញ្ញាណប័ណ្ណ ហើយអ្នកប្រើប្រាស់សេវាទូរស័ព្ទចល័តនៅតែមិនមកបំពេញបែបបទជា ថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
បញ្ញត្តិករទុកឱសានវាទបីខែចាប់ពីថ្ងៃទី២២កញ្ញារហូតដល់ថ្ងៃទី២២ ខែធ្នូឆ្នាំ២០១៥ដល់ក្រុមហ៊ុនទូរស័ព្ទចល័តនិងអ្នកប្រើប្រាស់ក្នុងការបញ្ឈប់លក់ស៊ីមកាតដោយគ្មានអត្តសញ្ញាណបណ្ណ័ហើយចំពោះអ្នកប្រើប្រាស់ត្រូវមកបំពេញបែបបទថ្មីនៅក្រុមហ៊ុនទូរស័ព្ទចល័ត។
ប៉ុន្តែមកទល់ពេលនេះបញ្ញត្តិករទូរគមនាគមន៍កម្ពុជាមិនទាន់ឃើញក្រុមហ៊ុនឬភ្នាក់ងារចែកចាយបន្តរបស់ក្រុមហ៊ុននិងអ្នកប្រើប្រាស់សេវាទូរស័ព្ទចល័តទាំងអស់មិនទាន់អនុវត្តតាមការណែនាំរបស់ស្ថាប័នជំនាញនៅឡើយទេ ហើយនៅតែបន្តចែកចាយឬលក់ស៊ីមកាតទូរស័ព្ទចល័តដោយមិនយកអត្តសញ្ញាណប័ណ្ណនិងឯកសារគតិយុត្តសម្គាល់អត្តសញ្ញាណអ្នកប្រើប្រាស់ដដែលជាដដែល។
កាលពីថ្ងៃទី១៧សីហាអគ្គស្នងការនគរបាលជាតិនៃក្រសួងមហាផ្ទៃនិងបញ្ញត្តិករនៃក្រសួងប្រៃសណីយ៍បានចេញសេចក្ដីប្រកាសព័ត៌មានមួយស្ដីពីវិធានការទប់ស្កាត់ការចែកចាយឬលក់ស៊ីមកាតទូរស័ព្ទចល័តដោយមិនយកអត្តសញ្ញាណប័ណ្ណ។ ក្នុងគោលបំណងទប់ស្កាត់លើឧក្រិដ្ឋកម្មធំមួយចំនួនដូចជាៈអំពើភរវកម្ម ឧក្រិដ្ឋកម្មឆ្លងដែន ការជួញដូរគ្រឿងញៀន អំពើជួញដូរមនុស្ស និងការគំរាមជីវិតទាប្រាក់ជាដើម។
ជាថ្មីម្ដងទៀតបញ្ញត្តិករទូរគមនាគមន៍កម្ពុជាអំពាវនាវចំពោះប្រតិបត្តិករផ្ដល់សេវាទូរស័ព្ទចល័តទាំងអស់ត្រូវបញ្ឈប់ជាដាច់ខាតនូវរាល់ការចែកចាយឬលក់ស៊ីមកាតដោយមិនយកអត្តសញ្ញាណប័ណ្ណទោះក្នុងរូបភាពណាក៏ដោយ។ ចំពោះអតិថិជនឬអ្នកប្រើប្រាស់ក៏ដូចគ្នាដែរគឺត្រូវតែទៅបំពេញបែបបទថ្មីសម្រាប់ការប្រើប្រាស់ជាមួយក្រុមហ៊ុនត្រឹមថ្ងៃទី២២ខែធ្នូឆ្នាំ២០១៥។
នៅក្នុងសេចក្ដីណែនាំចុះថ្ងៃទី៤វិច្ឆិកា បញ្ញត្តិករក៏បានព្រមានទៀតថា បើក្រុមហ៊ុនឬភ្នាក់ងារចែកចាយបន្តរបស់ក្រុមហ៊ុនណា មិនព្រមអនុវត្តតាមសេចក្ដីណែនាំនេះទេគឺអគ្គស្នងការដ្ឋាននគរបាលជាតិ សហការជាមួយបញ្ញត្តិករទូរគមន៍កម្ពុជានឹងចាត់វិធានការរដ្ឋបាលឬច្បាប់ជាធរមានដោយម៉ឺងម៉ាត់បំផុត។ នៅក្នុងរយៈពេលបីខែនេះបញ្ញត្តិករតម្រូវឲ្យប្រតិបត្តិករជូនដំណឹងបន្តដល់អតិថិជនអ្នកប្រើប្រាស់ទាំងអស់ទាំងប្រជាពលរដ្ឋខ្មែរនិងជនបរទេសដែកំពុងប្រើប្រាស់បណ្ដាញទូរស័ព្ទចល័តរបស់ខ្លួនហើយពុំមានអត្តសញ្ញាណប័ណ្ណឲ្យមកបំពេញបែបបទស្របតាមការកំណត់ ហើយបើមិនដូច្នោះទេនឹងត្រូវលុបចេញពីបណ្ដាញប្រើប្រាស់ជាស្វ័យប្រវត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ