ក្រុមហ៊ុន Beeline សម្រេចផ្ទេរអាជ្ញាប័ណ្ណនិងទ្រព្យសម្បត្តិទៅឲ្យក្រុមហ៊ុន Metfone
ក្រុមហ៊ុនទូរស័ព្ទចល័ត Beeline បានសម្រេចផ្ទេរអាជ្ញាប័ណ្ណប្រតិបត្តិការ និងទ្រព្យសម្បត្តិទៅឲ្យក្រុមហ៊ុនទូរស័ព្ទចល័ត Metfone ជាផ្លូវការហើយ។ នេះបើតាមសេចក្ដីប្រកាសព័ត៌មាន ដែលក្រុមហ៊ុន Beeline ទើបតែចុះផ្សាយនៅក្នុងទំព័របណ្ដាញសង្គមហ្វេសប៊ុករបស់ខ្លួន កាលពីពេលថ្មីៗនេះ។ មូលហេតុនៃការលក់អាជ្ញាប័ណ្ណនិងទ្រព្យសម្បត្តិនេះ មិនត្រូវបានក្រុមហ៊ុនផ្ដល់មូលហេតុនោះទេ ប៉ុន្តែបើតាមសេចក្ដីប្រកាសព័ត៌មាន ក្រុមហ៊ុនទាំងពីរនេះ នឹងរួមគ្នាដោះស្រាយបញ្ហាទាំងឡាយ ដែលនឹងកើតឡើងក្រោយការផ្ទេរកម្មសិទ្ធិ។
ចុះផ្សាយនៅថ្ងៃ៖
ស្តាប់ - ០១:៤២
ចាប់ពីថ្ងៃទី២៤ខែមីនានេះតទៅ អ្នកប្រើប្រាស់ប្រព័ន្ធទូរស័ព្ទ Beeline ទាំងអស់ នឹងត្រូវផ្ទេរទៅប្រើប្រាស់បណ្ដាញប្រព័ន្ធរបស់ Metfone ដោយស្វ័យប្រវត្តិ។ បើទោះជាត្រូវផ្ទេរប្រព័ន្ធក៏ដោយ ក៏អ្នកប្រើប្រាស់នៅតែអាចរក្សាទុកលេខចាស់របស់ខ្លួនដដែល ប៉ុន្តែត្រូវផ្លាស់ប្ដូរស៊ីមទូរស័ព្ទរបស់ Beeline ទៅជាស៊ីមទូរស័ព្ទរបស់ Metfone វិញ។ នេះបើតាមសេចក្ដីប្រកាសព័ត៌មានរបស់ក្រុមហ៊ុន Beeline ដែលបានចុះផ្សាយនៅក្នុងទំព័រសង្គមរបស់ខ្លួន។
តាមរយៈការផ្ទេរអាជ្ញាប័ណ្ណនិងទ្រព្យសម្បត្តិនេះ ក្រុមហ៊ុន Beeline នឹងបញ្ឈប់កិច្ចសន្យាទាំងឡាយជាមួយអតិថិជនរបស់ខ្លួន ក៏ដូចជាបញ្ឈប់ការផ្ដល់សេវាកម្មទូរស័ព្ទចល័តផងដែរ។ ការផ្ទេរដែលត្រូវបានធ្វើឡើងកាលពីថ្ងៃទី១១ខែមីនាថ្មីៗនេះ មិនត្រូវបានក្រុមហ៊ុនផ្ដល់មូលហេតុនោះទេ ប៉ុន្តែបើតាមសេចក្ដីប្រកាសព័ត៌មាន ក្រុមហ៊ុនទាំងពីរ គឺ Beeline និង Metfone នឹងរួមគ្នាដោះស្រាយបញ្ហាទាំងឡាយ ដែលនឹងកើតឡើងក្រោយការផ្ទេរកម្មសិទ្ធិ។
ក្រុមហ៊ុន Beeline ដែលជាក្រុមហ៊ុនផ្ដល់សេវាទូរស័ព្ទធំទី៤នៅកម្ពុជា បានណែនាំបន្ថែមទៀតថា ចាប់ពីថ្ងៃទី២៤ខែមីនាតទៅ អ្នកប្រើប្រាស់ប្រព័ន្ធទូរស័ព្ទ Beeline គួរតែឈប់បញ្ចូលទឹកប្រាក់ដោយកាតកោសបញ្ចូលលុយ Beeline ដោយងាកទៅបញ្ចូលលុយដោយប្រើប្រាស់កាតកោសរបស់ក្រុមហ៊ុន Metfone វិញ។ ការផ្លាស់ប្ដូរស៊ីមកាតពី Beeline ទៅ Metfone អាចធ្វើទៅបានចាប់ពីថ្ងៃទី២៤ខែមីនាដែរ នៅគ្រប់សាខារបស់ក្រុមហ៊ុនទូរស័ព្ទ Mefone ទូទាំងប្រទេស។
ដោយឡែក ចំពោះតំណាងចែកចាយទូទាំងប្រទេស ក្រុមហ៊ុន Beeline បានស្នើឲ្យទាក់ទងទៅកាន់ខ្លួន ដើម្បីសម្របសម្រួលការប្រគល់ស៊ីមកាត និងកាតកោស Beeline ដែលមិនទាន់ប្រើប្រាស់ ទៅឲ្យក្រុមហ៊ុនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ