ក្រសួងការពារជាតិ៖ សេចក្តីថ្លែងការណ៍របស់សង្គមស៊ីវិលធ្វើការផ្នែកបោះឆ្នោត គឺប្រមាថដល់កងទ័ព
ក្រសួងការពារជាតិតាមរយៈអ្នកនាំពាក្យនៅថ្ងៃសុក្រនេះ បានប្រកាសច្រានចោល និងបានថ្កោលទោសលើសេចក្តីថ្លែងការណ៍របស់ក្រុមអង្គការសង្គមស៊ីវិលនៅកម្ពុជានៃបន្ទប់ស្ថានការណ៍សម្រាប់ការបោះឆ្នោត ថាមានចេតនាញុះញង់និងលាបពណ៌មកលើកងទ័ព និងជាការប្រមាថមាក់ងាយដល់កិត្តិយស តួនាទី និងភារកិច្ចរបស់កងទ័ព។ ប្រតិកម្មនេះ កើតឡើងបន្ទាប់ពីក្រុមអង្គការសង្គមស៊ីវិលទាំងនេះបានចេញសេចក្តីថ្លែងការណ៍មួយដោយស្នើឲ្យកងទ័ពត្រូវប្រកាន់អព្យាក្រឹត្យ ដើម្បីធានាដល់ការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីថ្លែងការណ៍របស់ក្រុមអង្គការសង្គមស៊ីវិលនៅកម្ពុជានៃបន្ទប់ស្ថានការណ៍សម្រាប់ការបោះឆ្នោតឆ្នាំ២០១៧នេះ បានធ្វើឡើងកាលពីថ្ងៃទី២៥ ខែឧសភា។ សេចក្តីថ្លែងការណ៍នេះ បានស្នើឲ្យមន្ត្រីជាន់ខ្ពស់នៃកងយោធពលខេមរភូមិន្ទត្រូវគោរពតាមគោលការណ៍អព្យាក្រឹត្យ ឥតលម្អៀង និងផ្តល់កិច្ចសហការជាមួយគ.ជ.ប ដើម្បីសុវត្ថិភាពបេក្ខជនបោះឆ្នោត និងធានាដំណើរការបោះឆ្នោតដោយសេរី ត្រឹមត្រូវ និងយុត្តិធម៌។
ក្រុមអង្គការសង្គមស៊ីវិលចំនួន១៨ បានលើកករណីមកបញ្ជាក់ក្នុងសេចក្តីថ្លែងការណ៍កម្រាស់ពីរទំព័ររបស់ខ្លួនថា ក្នុងអំឡុងពេលឃោសនាបោះឆ្នោត មានមន្ត្រីជាន់ខ្ពស់កងទ័ពបានសេចក្តីថ្លែងការណ៍ឫនិយាយថា ឲ្យកងទ័ពត្រូវប្រឆាំងនឹងក្រុមឫកំចាត់ចោលមនុស្ស និងគណបក្សនយោបាយណាមួយឫក៏និយាយថា នឹងកើតមានសង្គ្រាមដោយសារតែលទ្ធផលបោះឆ្នោតជាដើម។ ក្រុមអង្គការសង្គមស៊ីវិល បានសម្តែងការព្រួយបារម្ភ និងបានស្នើឲ្យគ.ជ.ប និងគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតចេញសេចក្តីរំឮកឫព្រមាន ដើម្បីបង្កបរិយាកាសអំណោយផល និងដោយគ្មានការភ័យខ្លាចដល់ពលរដ្ឋបានចូលរួមឃោសនាបោះឆ្នោត និងចូលរួមបោះឆ្នោតនាពេលខាងមុខ។
លោកឈុំ សុជាតិ អ្នកនាំពាក្យក្រសួងការពារជាតិបានចាត់ទុកការលើកឡើងទាំងអស់នេះថា ជាការរំលោភបំពានធ្ងន់ធ្ងរដល់កទងទ័ព ហើយថាសេចក្តីថ្លែងការណ៍នេះ ហាក់ដូចជាមានចេតនាអ្វីមួយទៅថ្ងៃអនាគត។ សម្រាប់លោកឈុំ សុជាតិ កងទ័ពមិនចាំបាច់ត្រូវការការណែនាំ ឫបង្គាប់បញ្ជាពីក្រុមអង្គការសង្គមស៊ីវិលឡើយ គឺថា គេបានយល់ច្បាស់ពីច្បាប់បោះឆ្នោត និងតួនាទីភារកិច្ចរបស់ខ្លួនក្នុងការចូលរួមក្នុងដំណើរការបោះឆ្នោតឃុំ សង្កាត់នាពេលខាងមុខ។ ត្រង់ចំណុចនេះ លោកឈុំ សុជាតិ បានគូសបញ្ជាក់ថា សកម្មភាព និងអនុសាសន៍របស់មន្ត្រីជាន់ខ្ពស់កងយោធពលខេមរភូមិន្ទមិនប៉ះពាល់ដល់ដំណើរបោះឆ្នោតទេ វាគឺជាការជំរុញដល់ការការពារសន្តិសុខ សុវត្ថិភាពសម្រាប់ការបោះឆ្នោតនៅកម្ពុជាទៅវិញទេ។
ជុំវិញបញ្ហានេះដែរ លោកហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) បានលើកឡើងថា គ.ជ.បមិនដោះស្រាយបញ្ហាទាំងនេះទេ ព្រោះថាគ.ជ.បមិនមែនជាតុលាការសម្រាប់ការដោះស្រាយលើការបញ្ចេញមតិដោយឡែកៗពីគ្នារបស់ក្រុមណាមួយឡើយ។ តែទោះជាយ៉ាងណាក៏ដោយ អ្នកនាំពាក្យរូបនេះ អះអាងថា គ.ជ.ប ដោះស្រាយតែពេលមានបណ្តឹងមកគ.ជ.បតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ