មាតាធម្មជាតិកប់ខ្លួនក្នុងខ្សាច់ ទាមទារឲ្យក្រសួងរ៉ែបង្ហាញពីតម្លាភាពការនាំចេញខ្សាច់ទៅសឹង្ហបុរី
សកម្មជនចលនាមាតាធម្មជាតិ កាលពីម្សិលមិញ បានកប់ខ្លួនក្នុងខ្សាច់ ជាថ្នូរនឹងការទាមទារឲ្យក្រសួងរ៉ែ បង្ហាញពីតម្លាភាពតួលេខនាំចេញខ្សាច់ពីកម្ពុជាទៅកាន់សឹង្ហបុរី។ កាលពីពេលថ្មីៗនេះ ទិន្នន័យពាណិជ្ជកម្មរបស់អង្គការសហប្រជាតិ បង្ហាញថា រយៈពេល ៨ ឆ្នាំចុងក្រោយកម្ពុជានាំចេញខ្សាច់ទៅសឹង្ហបុរី ជិត ៣ លានតោន ក៏ប៉ុន្តែ ទិន្នន័យសឹង្ហបុរី នាំចូលខ្សាច់ពីកម្ពុជាវិញ មានរហូតទៅដល់ ៧៣ លានតោន ដែលធ្វើឲ្យអង្គការមួយនេះ សង្ស័យថាមានភាពមិនប្រក្រតីក្នុងអាជីវកម្មបូមខ្សាច់នៅកម្ពុជា។ ជាការឆ្លើយតប អ្នកនាំពាក្យក្រសួងរ៉ែ បញ្ជាក់ថា បញ្ហានេះ ក្រសួងគ្មានអ្វីត្រូវលាក់បាំងទេពោលគឺ បើកចំហសម្រាប់អ្នកចង់ដឹងឱ្យមកស្វែងរកទិន្នន័យនៅទីស្ដីការក្រសួង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
តាមបណ្តាញសង្គមហ្វេសប៊ុក លោក ថុន រដ្ឋា ជាសកម្មជនចលនាមាតាធម្មជាតិ នៅថ្ងៃទី ៨ តុលា បានបង្ហោះវីដេអូកប់ខ្លួននៅក្នុងខ្សាច់ ទទូចឲ្យរដ្ឋាភិបាល បង្ហាញពីតម្លាភាពនិង គណនេយ្យភាពនៃទំហំការនាំចេញខ្សាច់ទៅប្រទេសសឹង្ហបុរី រូមទាំងចំណូលពន្ធផងដែរ។
នៅក្នុងវីដេអូរយៈពេល ជាង ២ នាទី សកម្មជនមាតាធម្មជាតិរូបនេះ រៀបរាប់ថា ការនាំចេញខ្សាច់រាប់លានតោនទៅបរទេសរបស់កម្ពុជាក្នុងមួយឆ្នាំៗ បានបំផ្លាញធនធានជម្មជាតិ បង្កហានិភ័យដល់ព្រៃកោងកាង ព្រមទាំងបង្កការលំបាកដល់ជីវភាពរស់នៅរបស់ប្រជាពលរដ្ឋមូលដ្ឋាន អស់រយៈពេលជិត ៨ ឆ្នាំ រួចមកហើយ។
ក្រៅតែពីការរៀបរាប់ពីផលប៉ះពាល់នៃអាជីវកម្មបូមខ្សាច់នៅកម្ពុជានេះ លោក ថុន រដ្ឋា ក៏បានចោទជាសំណួរទៅកាន់ ក្រសួងរ៉ែនិងថាមពលដែរថា៖« តើចំនួនខ្សាច់រាប់លានដុល្លារនាំចេញពីកម្ពុជាបាត់ទីទៅណា» និង ស្នើសុំឲ្យក្រសួងពាក់ព័ន្ធ បកស្រាយទៅកាន់សាធារណៈ ជនឲ្យបានដឹងពីបញ្ហានេះ។
សូមជម្រាបជូនថា កាលពីចុងខែកញ្ញា កន្លងទៅថ្មីៗនេះ ទិន្នន័យអាជីវកម្មរបស់អង្គការសហប្រជាជាតិ ពីឆ្នាំ២០០៧ ដល់ឆ្នាំ២០១៥ បង្ហាញថា កម្ពុជានាំចេញខ្សាច់ទៅប្រទេសសិង្ហបុរីជិត ៣លានតោន (២.៧៧៤.៦១៣) គិតជាទឹកប្រាក់ជាង ៥លានដុល្លារអាមេរិក (៥.៥៥៧.៣៦៩) ។ប៉ុន្តែបើពិនិត្យទិន្នន័យដែលសិង្ហបុរី នាំចូលខ្សាច់ពីកម្ពុជាវិញ មានរហូតដល់ជាង ៧៣លានតោន ដែលគិតជាទឹកប្រាក់ប្រមាណ ៧៥០លានដុល្លារអាមេរិក (៧៥២.៧៦១.៩៧៨)។
យ៉ាងណាក៏ដោយ លោក ឌិត ទីណា រដ្ឋលេខាធិការ និង ជាអ្នកនាំពាក្យក្រសួងរ៉ែ និង ថាមពល បដិសេធមិនធ្វើការអធិប្បាយទៅលើភាពខុសគ្នានៃទិន្នន័យខាងលើនេះទេ។ ប៉ុន្តែ លោក បានបញ្ជាក់ថា ទិន្នន័យពាណិជ្ជកម្មបូមខ្សាច់របស់អង្គការសហប្រជាជាតិនេះ គឺមិនមែនជាទិន្នន័យដែលផ្តល់ដោយក្រសួងនោះទេ ហើយលោកក៏មិនយល់ច្បាស់ ពីដំណើរការចងក្រងទិន្នន័យនេះដែរ។
បើតាម លោក ឌិត ទីណា លេខសរុបនៃការនាំចេញខ្សាច់ទៅបរទេស នៅរយៈពេល ៩ ខែ ដើមឆ្នាំ ២០១៦ មិនទាន់បានបូកសរុបនៅឡើយទេ។ ប៉ុន្តែ លោក ថា បរិមាណខ្សាច់ដែលកម្ពុជា នាំចេញទៅក្រៅប្រទេសពីឆ្នាំ២០០៧ ដល់ឆ្នាំ២០១៥ មានចំនួនជាង ១០លានម៉ែត្រគូប (១០.៦៦៩.២១២,៩៤) ឬស្មើនឹងជាង ១៧លានតោន (១៧.០៧០.៧៤១)។ កម្ពុជាផ្គត់ផ្គង់ខ្សាច់សម្រាប់តម្រូវការក្នុងស្រុកបានប្រមាណជាង ១៧លានម៉ែត្រគូប (១៧.៥០៩.៤៩៦) ឬស្មើនឹងជាង ២៨លានតោន (២៨.០១៥.១៩៤) ដោយឡែក នៅឆ្នាំ២០១៥ ក្រសួងរ៉ែ និងថាមពល ប្រមូលចំណូលពីសួយសារ និងអត្ថប្រយោជន៍បន្ថែមបានជិត ៧លានដុល្លារ (៦.៧២៥.៥៣៣)។
ទាក់ទងនឹងការបូមអាជីវកម្មបូមខ្សាច់នេះដែរ កាលពីដើមឆ្នាំ ឆ្នាំ២០១៦ លោក សុន ឆ័យ មន្រ្តីជាន់ខ្ពស់គណបក្សសង្គ្រោះជាតិ តាមរយៈប្រធានរដ្ឋសភាលោក ហេង សំរិន បានផ្ញើលិខិតមួយច្បាប់ទៅរដ្ឋមន្ត្រីក្រសួងរ៉ែ និងថាមពល លោក ស៊ុយ សែម ដើម្បីស្នើសុំបង្ហាញឯកសារផ្លូវការទាក់ទងនឹងចំណូលសរុបដែលរដ្ឋទទួលបានពីអាជីវកម្មបូមខ្សាច់។
ជាការឆ្លើយតប លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានផ្ញើលិខិតមួយច្បាប់មករដ្ឋសភាវិញ ដោយអះអាងថា ឯកសារ និងទិន្នន័យពាក់ព័ន្ធនឹងការប្រមួលចំណូលពីអាជីវកម្មបូមខ្សាច់តម្កល់ទុកនៅអង្គភាព និងស្ថាប័នជំនាញ ដោយធានាបាននូវប្រសិទ្ធភាព និងគណនេយ្យភាពក្នុងការប្រមូល និងគ្រប់គ្រងចំណូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ