អង្គការសមាគមសុំព្រះរាជអន្តរាគមន៍ពីព្រះមហាក្សត្រលើច្បាប់អង្គការសង្គមស៊ីវិល
អង្គការសង្គមស៊ីវិលប្រមាណជិត ៣០ស្ថាបន បានដាក់លិខិតចំហមួយថ្វាយព្រះមហាក្សត្រកម្ពុជា អន្តរាគមចំពោះសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល។ ក្រោយពីច្បាប់នេះ ត្រូវបានសភាអនុម័តរួចរាល់ កាលពីខែកក្កដា កន្លងទៅ។ ការដាក់លិខិតចំហនេះ គឺដោយសារតែច្បាប់នេះ មានលក្ខណៈគាបសង្កត់សេរីភាពមូលដ្ឋានរបស់អង្គការសង្គមស៊ីវិល។
ចុះផ្សាយនៅថ្ងៃ៖
ស្តាប់ - ០១:៥៧
ច្បាប់ស្តីពីសមាគម និងអង្គការមិនមែនរដ្ឋាភិបាលដ៏ចម្រូងចម្រាស ត្រូវបានក្រុមអង្គការសង្គមស៊ីវិល ចាប់ផ្តើមយុទ្ធនាការថ្មី គឺការសុំឲ្យព្រះមហាក្សត្រទ្រង់ព្រះរាជតម្រិះទៅលើការឡាយព្រះហស្ថលេខា និងអន្តរាគមន៍ជាបន្ទាន់ចំពោះច្បាប់នេះ។ សូមបញ្ជាក់ថា ច្បាប់មួយនេះ ត្រូវបានរដ្ឋសភាជាតិ សម្រេចអនុម័ត កាលពីថ្ងៃទី១៣ កក្កដា ដោយមិនមានសមាសភាពតំណាងរាស្ត្រគណបក្សប្រឆាំងចូលរួមអនុម័តឡើយ។
យោងតាមលិខិតចំហចុះថ្ងៃទី៣០ កក្កដា ថ្វាយព្រះមហាក្សត្រព្រះបាទសម្តេចព្រះបរមនាថ នរោត្តម សីហមុនី ក្រុមអង្គការសង្គមស៊ីវិលបានបញ្ជាក់ថា ច្បាប់នេះផ្តល់អំណាចស្ទើរតែទាំងស្រុងទៅដល់រាជរដ្ឋាភិបាល ដែលលើសពីកម្រិតអនុញ្ញាតមានចែងក្នុងច្បាប់សិទ្ធិមនុស្សអន្តរជាតិ និងអាចប៉ះពាល់ដល់លទ្ធភាពរបស់អង្គការសង្គមស៊ីវិលក្នុងការបំពេញបេសកកម្មរបស់ខ្លួននៅប្រទេសកម្ពុជា។
លោក នី ចរិយា មន្ត្រីជាន់ខ្ពស់របស់សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ( Adhoc) បានបញ្ជាក់ថា ការស្នើសុំឲ្យមានព្រះរាជអន្តរាគមន៍ពីព្រះមហាក្សត្រ គឺដោយសារមានតែព្រះមហាក្សត្រមួយអង្គទេ ដែលអាចឡាយព្រះហត្ថលេខា ដាក់ឲ្យប្រើប្រាស់ច្បាប់មួយនេះ។ ម្យ៉ាងវិញទៀត ក្រុមអង្គការសង្គមស៊ីវិល ចង់ឲ្យព្រះមហាក្សត្រទ្រង់បានជ្រាបពីការរំលោភសិទ្ធិមនុស្សរបស់ច្បាប់ថ្មីនេះ។
កាលពីថ្ងៃព្រហស្បតិ៍ ទី៣០ កក្កដា ក្រុមតំណាងរាស្ត្ររបស់គណបក្សសង្រ្គោះជាតិ ១៣រូប បានធ្វើសំណើមួយទៅកាន់ក្រុមប្រឹក្សាធម្មនុញ្ញ ដោយស្នើឲ្យពិនិត្យធម្មនុញ្ញភាពនៃច្បាប់ស្តីពីសមាគម និង អង្គការក្រៅរដ្ឋាភិបាល ដែលរដ្ឋសភាបានអនុម័តកាលពីពេលកន្លងមក។ សំណើនេះ ត្រូវបាន លោក សុន ឆ័យ តំណាងរាស្ត្រមួយរូបក្នុងចំណោមនោះ បានយកទៅដាក់ផ្ទាល់នៅក្រុមប្រឹក្សាធម្មនុញ្ញ។
បើតាមគេហទំព័ររបស់ក្រុមប្រឹក្សាធម្មនុញ្ញបានឲ្យដឹងថា សមាសភាពអ្នកដែលមានសិទ្ធិដាក់សំណើពិនិត្យធម្មនុញ្ញភាពមុនពេលប្រកាសឲ្យប្រើប្រាស់មានព្រះមហាក្សត្រ ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី តំណាងរាស្ត្រ ចំនួន ១ភាគ១០ និងសមាជិកព្រឹទ្ធសភាចំនួន ១ភាគ៤៕
រហូតមកដល់ពេលនេះ មិនមានការបញ្ជាក់ពីព្រះបរមរាជវាំង ថាតើបានទទួលច្បាប់នេះ ឬយ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ