សមាជិកព្រឹទ្ធសភាបក្សសម រង្ស៊ី ប្រកាសមិនចូលរួមត្រួតពិនិត្យសេចក្តីស្នើច្បាប់NGOs
លោកគង់ គាំ ប្រធានគណបក្សសម រង្ស៊ី បានថ្លែងប្រាប់វិទ្យុបារាំងអន្តរជាតិនៅព្រឹកថ្ងៃព្រហស្បតិ៍នេះថា សមាជិកព្រឹទ្ធសភាទាំងអស់របស់គណបក្សសម រង្ស៊ី នឹង មិនចូលរួមប្រជុំពេញអង្គរបស់ព្រឹទ្ធសភា ដើម្បីត្រួតពិនិត្យសេចក្តីស្នើច្បាប់ស្តីពីសមាគម និង អង្គការមិនមែនរដ្ឋាភិបាលនៅថ្ងៃសុក្រ ស្អែកនេះនោះទេ។
ចុះផ្សាយនៅថ្ងៃ៖
ស្តាប់ - ០២:០៦
មូលហេតុដែលសមាជិកព្រឹទ្ធសភាគណបក្សសម រង្ស៊ី គ្រោងនឹងធ្វើពហិកានេះ គឺដោយសារតែពួកគេយល់ថា សេចក្តីស្នើច្បាប់ស្តីពីសមាគម និង អង្គការមិនមែនរដ្ឋាភិបាល មិនស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។ ម្យ៉ាងទៀត សេចក្តីស្នើច្បាប់នេះ គឺផ្ទុយនឹងកតិកាសញ្ញាអន្តរជាតិ និងសេចក្តីថ្លែងការណ៍ជាសាកលរបស់អង្គការសហប្រជាជាតិស្តីពីសិទ្ធិមនុស្ស។ លោកគង់ គាំ ប្រធានគណបក្សសម រង្ស៊ីបានហៅការប្រជុំរបស់ព្រឹទ្ធសភានៅថ្ងៃស្អែកនេះ ថា គ្រាន់តែធ្វើឡើង ដើម្បីបង្គ្រប់កិច្ច ដោយនឹងមិនមានការកែប្រែអ្វីនោះទេ។
លោកសុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា គម្រោងធ្វើពហិកានេះ មិនមែនជារឿងប្លែកនោះទេ សម្រាប់គណបក្សប្រឆាំង ព្រោះកាលនៅរដ្ឋសភាគណបក្សសង្គ្រោះជាតិក៏បានធ្វើពហិកាបែបនេះផងដែរ។ លោកបញ្ជាក់ថា ការធ្វើពហិកាជាសិទ្ធិរបស់គណបក្សប្រឆាំង តែដំណើរការបើកការប្រជុំ ដើម្បីត្រួតពិនិត្យសេចក្តីស្នើច្បាប់នេះនៅតែប្រព្រឹត្តទៅជាធម្មតា។ សមាជិកសភារបស់គណបក្សសង្គ្រោះជាតិ កាលពីថ្ងៃទី ១៣ កក្កដា កន្លងទៅ ធ្លាប់បានធ្វើពហិកាម្តងរួចមកហើយ ដោយមិនចូលរួមប្រជុំសភា ដើម្បីពិភាក្សា និងអនុម័តសេចក្តីព្រាងច្បាប់ដ៏ចម្រូងចម្រាសនេះ។
ស្របពេលដែលគណបក្សសម រង្ស៊ី បានប្រកាសធ្វើពហិកានេះ មជ្ឈមណ្ឌសិទ្ធិមនុស្សកម្ពុជា បានស្នើសុំព្រឹទ្ធសភាពិចារណាកែប្រែជាបន្ទាន់ឫបដិសេធចោលសេចក្តីស្នើច្បាប់ស្តីពីសមាគម និងអង្គការមិនមែនរដ្ឋាភិបាល។ តាមរយៈលិខិតចំហរបស់ខ្លួនទៅកាន់លោកសាយ ឈុំ ប្រធានព្រឹទ្ធសភាកាលពីថ្ងៃពុធ មជ្ឈមណ្ឌសិទ្ធិមនុស្សកម្ពុជា បានសម្តែងការព្រួយបារម្ភដោយបញ្ជាក់ថា ប្រសិនបើច្បាប់នេះ ត្រូវបានអនុម័ត និងប្រកាសឲ្យប្រើប្រាស់នោះ នឹងបណ្តាលឲ្យមានការរឹតបន្តឹងយ៉ាងធ្ងន់ធ្ងរលើការសិទ្ធិសេរីភាពខាងបង្កើតសមាគម សេរីភាពខាងបញ្ចេញមតិនិងជួបប្រជុំនិងសិទ្ធិចូលរួមក្នុងជីវភាពសាធារណៈ។
ជាមួយគ្នានេះ អ្នករាយការណ៍ពិសេសអង្គការសហប្រជាជាតិ ទទួលបន្ទុកខាងសិទ្ធិសេរីភាពក្នុងការជួបប្រជុំដោយសន្តិវិធី និងស្តីពីការបង្កើតសមាគមកាលពីថ្ងៃទី១៥ កក្កដា ក៏បានជំរុញឲ្យព្រឹទ្ធសភា បដិសេធសេចក្តីស្នើច្បាប់ស្តីពីសមាគម និងអង្គការមិនមែនរដ្ឋាភិបាលនេះផងដែរ។
លោកគង់ គាំ បានលើកឡើងថា ការស្នើរបស់អង្គការជាតិ និងអន្តរជាតិទាំងនេះនឹងមិនមានប្រសិទ្ធភាពនោះទេ ព្រោះថាព្រឹទ្ធសភាកម្ពុជាមិនដែលខ្វាយខ្វល់នឹងសំណើណាមួយពីសង្គមស៊ីវិលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ